GünAzTv: Şotlandiyanın "The Sunday Herald" qəzetinin üzə çıxardığı məlumata görə, Pentaqon İranın yeraltı nüvə obyektlərini dağıtmaq üçün xüsusi olaraq hazırlanan yüzlərlə nəhəng bombanı Hind okeanında yerləşən Dieqo-Qarsiya adasındakı Hərbi-Hava Qüvvələri bazasına daşıyıb.

ABŞ-ın (Amerika Birləşmiş Ştatları) İrana qarşı olduqca məxfi müharibə hazırlıqları apardığı və bu hazırlıqları böyük ölçüdə tamamladığı üzə çıxıb. Şotlandiyanın "The Sunday Herald" qəzetinin üzə çıxardığı məlumata görə, Pentaqon İranın yeraltı nüvə obyektlərini dağıtmaq üçün xüsusi olaraq hazırlanan yüzlərlə nəhəng bombanı Hind okeanında yerləşən Dieqo-Qarsiya adasındakı Hərbi-Hava Qüvvələri bazasına daşıyıb. Dieqo-Qarsiya adası Böyük Britaniya ərazisidir. Bu adada 1971-ci ildən bu yana Birləşmiş Ştatların Hərbi-Hava Qüvvələrinin ən iri bazalarından biri yerləşir. Həmin baza 1991-ci ildəki Körfəz müharibəsi və 2003-cü ildə İraqa müdaxilə zamanı istifadə olunub. Belə ki, hərbi əməliyyatların birinci fazasında əsas hədəfləri bombalayan strateji bombardmançıların əsas hissəsi məhz Dieqo-Qarsiyadan qalxıb.

Qəzetin əldə etdiyi məlumata görə, bazaya cəmi 385 bunker dağıdan bomba daşınıb. Onlardan 195-i "Blu-110", 192-si isə "Blu-117"-dir. Bu tipli bombalardan hər birinin ağırlığı 1 tona yaxındır, onlar xüsusi olaraq yeraltında yerləşdirilmiş obyektlərin dağıdılması üçün hazırlanıb. Belə bombalar 60 metr betonla örtülmüş bunkerə keçib partlayır. İranın əsas nüvə obyektləri məhz bu cür yeraltı bunkerlərdə, dağların altında və tunellərdə yerləşdirlib. "The Sunday Herald"in verdiyi məlumata görə, ötən ilin payızında Pentaqon Konqresdən gizli olaraq İrana qarşı müharibə hazırlıqları üçün əlavə büdcə istəyib. Həmin hazırlıqlar çərçivəsində Böyük Britaniya və ABŞ arasında xüsusi razılaşma imzalanıb, bu razılaşmaya əsasən Dieqo-Qarsiya adasındakı bazaya bunker dağıdan bombalar daşınıb. Bombaların "Superior Maritime Services" gəmiçilik şirkəti ilə bağlanmış müqavilə əsasında ünvana çatdırıldığı bildirilir. Dieqo-Qarsiya adası Hindistandan 1000 kilometr cənubda yerləşir və oradan qalxan bombardmançı təyyarələr cəmi bir neçə dəqiqədən sonra İran səmasına çata bilər. Adadakı Amerika bazasında "B-2" və "B-52" strateji bombardmançıları, habelə digər tipli yüzlərlə hərbi təyyarə yerləşdirilib. London Universitetinin Beynəlxalq Araşdırmalar və Diplomatiya Mərkəzinin direktoru Dan Pleş qəzetə açıqlamasında bildirib ki, bu hərbi hazırlıq bilavasitə İranla bağlıdır. "Pentaqonun planları İranın bütünlüklə darmadağın edilməsinə hesablanıb. Amerika bombardmançıları elə bu gün, bir neçə saat ərzində İranda 10 min hədəfi məhv etməyə hazırdır" - deyə ekspert bildirib. D.Pleş deyib ki, ABŞ hazırda İrana qarşı hərbi əməliyyatlara hazırlaşmadığını bildirir, lakin bu, vəziyyətin kifayət qədər ciddi olduğunu göstərir. Çünki ABŞ İrana qarşı müharibəyə qəfil başlayacaq və bu səbəbdən hazırlıqların getdiyini inkar edərək İranı arxayın salmaq istəyir. Onun sözlərinə görə, İrana zərbələr istənilən gün prezident Obamanın əmri ilə endirilə bilər. "Amerikalılar hesab edir ki, hərbi-siyasi nöqteyi-nəzərdən İrana İsrailin müdaxiləsini gözləmədən birinci hücum etmək daha əlverişlidir" - deyə ekspert bildirib. Qəzetin bu sensasion məlumatına Pentaqondan heç bir şərh verilməyib. Lakin göstərilir ki, "Superior Maritime Services" şirkəti ilə Dieqo-Qarsiya adasında yük çatdırılması ilə bağlı müqavilə bağlandığı haqda xəbər Pentaqonun saytında da var. Ancaq orada yükün nədən ibarət olduğu göstərilmir. Qeyd edək ki, Qərb mənbələri İranda vurulacaq hədəflərin xəritəsinin hazır olduğu haqda bir neçə dəfə xəbər yayıblar. Bu hədəflər ölkənin əsas hərbi və strateji infrastrukturunu təşkil edir. Bura İnqilab Keşikçiləri Korpusunun bazaları, hava hücumundan müdafiə sistemləri, hərbi dəniz qüvvələrinin bazaları da daxildir. Lakin bombardman zamanı təkcə hərbi obyektlər hədəfə alınmayacaq, İran rəhbərliyinin iqamətgahları, körpülər, hərbi zavodlar və digər iqtisadi infrastruktur da hədəfə alınacaq. musavat