İranın nüvə fəaliyyəti təhlükəli səviyyəyə çatıb

SON XƏBƏRLƏR

İranın nüvə fəaliyyəti təhlükəli səviyyəyə çatıb - 3 Avropa ölkəsi xəbərdarlıq etdi

2024.06.05, 12:49

Almaniya, İngiltərə və Fransa İranın nüvə proqramını inkişaf etdirmək və bu sahədə gərginliyi gücləndirmək istiqamətindəki hərəkətlərini tənqid edib, Tehranın nüvə proqramının təhlükəli səviyyəyə çatdığını bildiriblər.

Gunaz.tv

Bu barədə adı çəkilən ölkələrin iyunun 5-də yaydıqları birgə bəyanatda deyilib.

Bəyanatda bildirilib ki, İran rəsmilərinin nüvə silahı istehsal etmək qabiliyyəti, eləcə də İran hökumətinin nüvə doktrinasının dəyişdirilməsi ehtimalı ilə bağlı son bəyanatları Tehranla beynəlxalq ictimaiyyət arasında etimadı daha da zədələyib.

Üç Avropa ölkəsi öz bəyanatlarında həmçinin İrandan nüvə silahı istehsal etmək təhdidini dayandırmağı və nüvə danışıqları çərçivəsində, xüsusilə uranın zənginləşdirilməsi ilə bağlı öhdəliklərinə əməl etməyi tələb ediblər.

Böyük Britaniya, Fransa və Almaniya İranın nüvə proqramı ilə bağlı aydınlıq gətirilməsinə, həmçinin Tehranla Beynəlxalq Atom Enerjisi Agentliyinin əməkdaşlığına ehtiyac olduğunu vurğulayaraq, Tehran hökumətini əlavə protokolu tez bir zamanda təsdiqləməyə və onu yenidən həyata keçirməyə çağırıblar. .

Qeyd edək ki, iyunun 4-də Avropa Birliyi Beynəlxalq Atom Enerjisi Agentliyinin Qəyyumlar Şurasına ünvanladığı bəyanatda İranın nüvə silahı əldə etməməsinin bu Birliyin əsas təhlükəsizlik prioritetlərindən biri olduğunu yazıb.

Avropa Birliyinin məlumatına görə, Tehran hökumətinin nüvə proqramı regionda nüvə silahının yayılması böhranı ehtimalını artırıb.

Britaniya, Fransa və Almaniya bəyanatlarında həmçininİrandan beynəlxalq agentliyin bir sıra təcrübəli müfəttişlərinin fəaliyyətinə qadağa qoyulması ilə bağlı əvvəlki qərarını ləğv etməyi istəyiblər.

GünazTV

GUNAZ.TV

SON XƏBƏRLƏR