“The Times of Israel” qəzeti Benetdən sitat gətirərək yazır ki, İranın nüvə proqramı “İsrailin gələcəyinə kölgə salır”. Naftali Benet açıqlamasını bu şəkildə davam edir:

"İlk dəfə İranın potensial reaksiyasından qorxmadan hərəkət etmək üçün imkan yaranıb. İranın terror rejimi ilk dəfə ifşa olunur və müdafiəsiz vəziyyətdədir. İran rejiminə və onun nüvə proqramına ciddi ziyan vurmaq üçün həm legitimliyimizin, həm də qabiliyyətimizin olduğu üçün bu fürsətdən yararlanmaq lazım olduğunu düşünürəm".

Qeyd edək ki, 2021-ci ilin iyunundan 2022-ci ilin iyununa qədər İsrailin baş nazir vəzifəsində olan Benetin açıqlaması müzakirə mövzusuna çevrilib. 

İsrailin cavab zərbəsi necə olacaq? Nüvə silahına son dərəcədə yaxınlaşmış İran rejimi, nüvə obyektlərinin məhv edildiyi təqdirdə nüvə silahı əldə etmək imkanını itirəcək. Bu zaman İranın mühafizəkar rejimi hansı addımı ata bilər?

Mövzu ilə bağlı "Günaz TV"-in sualını cavablandıran "Atlas" Araşdırmalar Mərkəzinin rəhbəri Elxan Şahinoğlu hesab edir ki, əgər İsral İranın nüvə silahı əldə etməsinə çox yaxın olduğunu hesab edirsə, uranın zənginləşdirilməsi mərkəzinə zərbə endirməsi barədə ciddi düşünəcək.

"Son gərginlik fonunda İranın mühafizəkar dairələri atom silahını əldə etmək üçün çalışmalarını sürətləndirə bilər. İran mühafizəkarlarının fikrincə İsrailin nüvə silahının olması, İranın isə nüvə silahının olmaması balansın pozulması anlamına gəlir. Lakin, düşünürəm ki, İsrail ilkin mərhələdə SEPAH-ın İrandakı hərbi məntəqələrinə və qaz-neft mərkəzlərinə zərbələr endirmək barədə düşünür."

Siyasi şərhçi açıqlaması zamanı əlavə edib ki, İsrailin İranın nüvə mərkəzlərini hədəf almaması ilə bağlı əsas faktor ABŞ-dır.

"ABŞ İsraildən İranın nüvə obyektlərini hədəf almamasını israr edir. Çünki bundan sonra proseslər məcrasından çıxa bilər. ABŞ bu müharibə fonunda enerji qiymətlərinin artmasından da narahatdır. Bu səbəblə ilkin mərhələdə İsrail SEPAH hərbi qərargahlarını və neft-qaz mərkəzlərini hədəf ala bilər."

Elxan Şahinoğlu hesab edir ki, İsrailin əsas məqsədi İranı son dərəcə zəiflətmək və nüvə silahını əldə etməsinin qarşısını almaqdır.

"İsarilin zərbələri qarşısında İran da İsrailə hansısa formada zərbə vurarsa, artıq bu mərhələdə İsrail uranın zənginləşdirilməsi mərkəzlərini hədəf götürəcək. İsarilin məqsədi budur ki, İran elə bir zərbə alsın ki, bundan sonra rejim nüvə silahı əldə etməyə yaxınlaşmasın. Bu səbəblə İsrail uranın zənginləşdirilməsi mərkəzlərinə zərbə endirməyi planlaşdırır."

Siyasi şərhçi hesab edir ki, İsrailin belə planı olsa da, bu planı hansı mərhələdə həyata keçirəcəyi sual altındadır. Çünki, İsrail, strateji müttəfiqi, ABŞ-ın da tövsiyələrini nəzərə almaq məcburiyyətindədir.    

Şahin Elxanoğlu

GünazTV