Türkiyənin Atatürkü və Atatürkün Türkiyəsi.A. Kərimova

SON XƏBƏRLƏR

Türkiyənin Atatürkü və Atatürkün Türkiyəsi.A. Kərimova

2021.10.20, 07:36

Gunaz.tv

Türkiyənin Atatürkü və Atatürkün Türkiyəsi A. Kərimova

Müəllifi Turqut Özakman olan "Bu çılğın türklər" kitabı Türkiyəni yerindən oynatdı. Təxminən 2 milyon nüsxəylə satılan kitab beş dəfə təkrar dərc olundu. Türkiyədə Atatürkün şəxsiyyətinə və qurtuluş savaşlarına roman yeni bir baxış gətirdi. Yazar bu roman üzərində 50 il işləyib. Müəllif topladığı tarixi sənədlərlə, real hadisələrlə, hətta əsərdə adı keçən insanların həqiqi adları ilə böyük bir iş ortaya qoydu. Hadisələr xronoloji ardıcıllıqla anlatılıb, gün içindəki hadisələr də səhərdən axşama doğru sıralanıb. Roman vətən üçün verilən müdhiş bir mübarizəni, ölüm-qalım savaşını və bir liderin bu hadisələr içində necə parladığını, vətənin müqəddəratını necə əzmkarlıqla dəyişdiyini anladır. Bitmiş, tükənmiş Osmanlını son tikələrə ayırmağa çalışan imperalist güclər Vətən üçün ölməyi bacaran milli iradə ilə üz-üzə qaldılar. Daxili xəyanətlər, zəif cəbhəxana, aclıq Türk millətini imperalist güclər önündə çökdürmədi. Mustafa Kamal Vətən torpağından və millətindən güc alaraq düşmənlərinə meydan oxudu. Ön cəbhə bir-neçə savaş təyyarəsindən, köhnə tüfənglərdən, çox az sayda toplardan və mərmilərdən, ayağı yalın, başı açıq, silah işlətməyə bilməyən əsgərlərdən ibarət idi. Arxa cəbhəni isə millətdən toplanan ərzağı, geyimi daşıyan öküz arabaları təşkil edirdi. Bu arabalar qabaqlarında qadınlar Vətənin hər yanından cəbhəyə doğru axırdı. Mənzərənin şahidi olan bir ingilis generalı "Mustafa Kamal bizi bu öküz arabalarıylamı yenəcək" demiş və gülmüşdü. Elə də oldu. Vətən torpağından başqa əllərində itirəcək bir şey qalmayan millət kiçikdən böyüyə qədər hamılıqla ayağa qalxmışdı. Mustafa Kamal savaşı qazanmaqdan daha önəmli olan türkün milli ruhunu oyandıra bilmişdi. Ən önəmlisi bu idi. Əsrlər boyu millətə adı unutdurularaq "Osmanlı" libası geyindirilmişdi və bütün dünya türkü deyil, Osmanlını tanıyırdı. Qurtuluş savaşı dönəmində insanlar türk kəlməsini yenidən dillərinə gətirməyə başladılar. Onların içərisində bu kəlməni ilk dəfə duyanlar da vardı. Turqut Özakmanın bu kitabı türk gəncliyi ücün möhtəşəm bir töhfə oldu. Atatürk mümkünsüzü mümkün etmişdi. Onun sayəsində Türkiyə bu gün ayaqdadır. Dünya bu gün Atatürkü və Türkiyəni tanıyır. Onun sayəsində Türkiyə bu gün qürurla mavi səmalarında bayrağını dalğalandırır. Və dünya öndərlərinin adları arasında bir Mustafa Kamal Atatürk adı var. Bütün bunlara rəğmən dini fanatiklər tərəfindən beyinləri zəhərlənmiş bir qrup gənc televiziyaya çıxıb "Mən Atatürkü deyil, Xomeynini sevirəm. Kaş ki, ingilislər o zaman bizi işğal etsəydilər və bu gün dini özgürlüyümüz əlimizdə qalsaydı" deyir. Bu qədər şəhid qanı üzərinə bu təhlükəli sözlər söylənilir. Ayşə Kərimova GÖNEN gonenay@ hotmail.com 525

GUNAZ.TV

SON XƏBƏRLƏR