Qələbəyə təşnəlik Bu köşənin yazılma ideyası futbol tarixinə möhtəşəm səhifə kimi düşən Türkiyə-Xorvatiya qarşılaşmasını ekrandan sonsuz həyəcanla izləyən zaman meydana gəldi. Ürəküzücü oyun zamanı açılmayan hesabın doğurduğu gərginlik içərisində daxilən qələbəsinə inandığım Türkiyə yığmasının şərəfinə bu yazını yazacağıma özlüyümdə söz verdim. Bu köşə türklərin şanlı qələbəsi ilə yanaşı, futbol adına top qovmaqla məşğul olan dost-doğma azərbaycanlılarımızın beynəlxalq miqyasda qazana bilmədiyi qələbələrə, qələbələr bir tərəfə, hərdən gülünc hesablarla nəticələnən fiaskolara, türk-azəri qardaşlığına və bir çox şeylərə ithaf olunur. Amma qeyd etmək istədiyim iki əsas məqam var. Birincisi odur ki, Avropa nə qədər türk dünyasının ən öndə gedən cümhuriyyətlərindən birini ən müxtəlif bəhanələrlə özündən aralı saxlamağa çalışsa da, faktiki olaraq bunu bacarmır. İncə siyasətlə kənara itələnən Türkiyə bu zaman başqa üsulla, məsələn,elə futbolla özünü təsdiqləyir. Avropanın güclü hesab olunan yığmalarına qalib gəlməklə həm də kandarında dayandığı Avropa Birliyinin qapılarına maksimum yaxınlaşır. Əminəm ki, Türkiyə üzünə qapadılmaq üçün hər zaman fürsət gözlənilən o qapını birdəfəlik itələyib, açaraq Avropaya daxil olacaq və əslində daxilən türklərdən çəkinən, soyuqqanlı avropalıları və Avropanı öz istiqanlılığı, özünəməxsus türk coşğunluğuyla ram edə biləcək. Avropalılar əvvəl-axır bununla barışmalı olacaqlar. Uzun-uzun əsrlər bundan qabaq türklər tərəfindən qılınc gücünə fəth olunan və gözü qorxan Avropa indi də türk futbolunun, siyasətinin, mədəniyyətinin qüdrəti ilə ələ alınacaq. İkinci mühüm məqam da mənə 2 saat davam edən gərgin oyun zamanı, o həyəcan içində azarkeşlərin sırasında dalğalanan müqəddəs Azərbaycan bayrağını görəndə aydın oldu... Türkiyə-Xorvatiya qarşılaşmasının oyunsonrası sevincini yaşayarkən anladım ki, millətimiz qələbə - böyük hərflərlə yazılacaq QƏLƏBƏ üçün acdır. Xalqımın daxilində, təhtəlşüurunda əsl bir qalibiyyəti bayram etmək ehtiyacı var. Tam təbiidir. İllərdən bəri davam edən Qarabağ danışıqları hələ heç bir nəticə verməyib. Buna görə də torpağının 20 faizi işğala məruz qalan, əhalisinin səkkizdə biri qaçqın və məcburi köçkün olan xalqımızın gərilən əsəbləri qələbə arzulayır. Millətimiz qələbəyə susayıb. Gecənin bir aləmi hayqıraraq içindəki enerjini, qələbəyə olan təşnəsini çöllərə səpələyən soydaşlarımın şəhəri silkələyən bağırtıları belə qənaətə gəlməyə əsas verir. Türkiyə-Azərbaycan dostluğu, o tükənməz sevgi futbolda daha parlaq şəkildə özünü göstərə bilir. Bu oyunlardan sonra həmvətənlərimizin coşqusu bir daha bu qardaşlığın qan birliyinə, can birliyinə, gen birliyinə dayandığını isbat edir. Azarkeşlik hisslərimin ifadəsindən sonra bir şey qalır- Arzulamaq... Planlaşdırılan Türkiyə-Almaniya futbol qarşılaşmasında doğma türklərin növbəti qələbəsini və ən vacibi - bitməmiş Qarabağ müharibəsinin qələbə sevincini... O qələbə əlahəzrət tarixə nə zaman həkk olunacağından asılı olmayaraq həmişə, son nəfəsəcən gözləniləndir. Necə ki, Azərbaycan xalqı qalib ordumuzun qələbə harayının Şuşadan havalanaraq Göyçə gölünün ləpələrində əks-səda verəcəyi günü gözləyir. 525