GünAz TV: Bir neçə gün bundan əvvəl İran hökumətinin Səudiyyə Ərəbistanının ABŞ-dakı (Amerika Birləşmiş Ştatları) səfirinə qarşı terror aksiyası həyata keçirmək cəhdinin qarşısının alınması və bu əməlin ifşa edilməsi özünü dünya müsəlmanlarının lideri kimi təqdim etməyə çalışan rəsmi Tehranı çıxılmaz vəziyyətə qoymuşdur.

Görünür İran hökuməti belə bir aksiya (əməl) ilə özünün bir neçə gizli hədəfinə çatmaq niyyəti güdürmüş. İslam dünyasında özünə əsas rəqib hesab etdiyi və son zamanlar Yəməndə, eləcə də Bəhreyndə baş verən hadisələrlə əlaqədar münasibətlərini gərginləşdirdiyi Səudiyyə Ərəbistanına bu üsulla mesaj göndərmək, eyni zamanda ABŞ-la sözügedən dövlət arasında qarşıdurma yaratmaq niyyətlərinin İranın qeyd olunan planında (tərhində) əks edildiyi istisna olunmur.

Lakin hər məsələdə olduğu kimi bu işdə də xalqının deyil, özünün mənafeyini güdən İran hökuməti bu əməli ilə də öz vətəndaşlarını beynəlxalq ictimaiyyət, o cümlədən islam dünyası qarşısında sıxıntılı bir duruma salmışdır. Axı artıq bu bir gerçəkdir ki, “İran”ın adı fəaliyyət baxımından “Əl-Qaidə” ilə eyni mənanı verməyə, terrorla sinonim təşkil etməyə başlamışdır. “İran” adı öz vətəndaşlarını utandırıcı bir vəziyyətə salmışdır. İran rejimi başa düşmür ki, vətəndaşları onun əməllərinə görə niyə fərəh duymağa deyil, utanmağa məhkum olmuşlar. Onların günahı nədir, iranlı olmaları? Bəlkə vətəndaşlıqlarını dəyişsinlər? Necə ola bilər ki, özünü islam dünyasının hamisi adlandıran bir dövlət məkrli əməlləri ilə bu dünyanın adının terrorçuluqla bir hallandırılmasına zəmin yaratsın? Bu islamı ləkələmək deyilmi? İslam dünyası nə vaxta qədər İranın çirkli əməllərinə görə əziyyət çəkməli olacaqdır? Bəlkə İranın adının islamdan təmizlənməsinin vaxtı gəlib çatmışdır? 

Sözügedən terror aksiyası ilə regionda (bölgədə) hansı siyasi və iqtisadi dəyişikliklərin baş verə biləcəyini proqnozlaşdırmaq (öngörmək, pişbini etmək) çətindir? Görəsən iranlı mollalar bunu fikirləşmişlər? Bəlkə onları regionda baş verə biləcək geosiyasi (jeopolitik) dəyişikliklər maraqlandırmır? Bəlkə onlar regionda vəziyyətin daha da gərginləşməsini istəyirlər? Bəlkə də hadisələrin sonrakı axarını proqnozlaşdırmağa onların siyasi savadlarının kasadlığı imkan vermir? Hər halda bu sualların məntiqə uyğun şəkildə cavablandırılması yaxşı olardı. Təəssüf ki, İran hökumətinin adı ilə “məntiq” ifadəsi arasında da ciddi fərq vardır.         

Təbii ki, əsl islam dəyərləri ilə qidalanmış bir ölkə heç bir zaman bu tipli hərəkətin planlaşdırılmasında iştirak etməzdi. Amma görünən odur ki, 1979-cu il inqilabından sonra İranın xarici və daxili siyasəti getdikcə artan militarizm meylləri ilə güclənmişdir. Xalq isə İranın cinayətkar dövlət deyil, hörmət qazanmış ölkə kimi tanınmasını istəyir. Xalqa İranın regionda ümid çırağı olacağına söz verilsə də, İslam İnqilabını Mühafizə Korpusunun (İİMK-SEPAH) fəaliyyəti bu ölkəni beynəlxalq aləmdən təcrid olmağa məhkum etmişdir. İİMK–nın “Əl-Qüds” Qüvvələrinin (ƏQQ) fəaliyyəti beynəlxalq terrorçuluğun əsas nümunələrindən birinə çevrilmişdir. İran bu kimi əməlləri ilə özünü “Əl-Qaidə” səviyyəsinə salmışdır.

ƏQQ-nın rəhbəri Q.Süleymani isə İranın siyasi dairələrində əvvəllər qeydə alınmamış səviyyəyə qalxaraq ölkənin xarici və daxili siyasətinin yürüdülməsində iştirak edir və ali dini liderlə söhbətlərində ona tay-tuş münasibəti bəsləyir. Bu şəxsin hərəkətlərinə İranın siyasi dairələri tərəfindən nəzarət edilirmi? Məgər o, heç kimə tabe olmur və istədiyini edə bilər? İran xalqına təhdid yaradan onun aqressiv (mühacim, saldırqan) hərəkətləri yalnız şəxsi məqsədlərinə nail olmaq üçün istiqamətləndirilmişdir? Bəlkə də Süleymani tərəfindən atılan addımlar xalqın diqqətinin İİMK-nın artan müdaxiləsi nəticəsində ölkə iqtisadiyyatında yaranmış problemlərdən yayındırılması məqsədini güdür.

Bəlkə də yuxarıda sadalanan məsələlərin bir çoxuna cavab tapmaq olar, amma islam dininin hər hansı bir dövlət, xüsusən də İran tərəfindən “inhisarlaşdırılmasına” heç kimin haqqı yoxdur. Axı özündə sülh, dostluq, ədalət və s. bu kimi dəyərləri əks etdirən islamın adını çirkin əməllərlə ləkələmək olmaz. Tövbə və bağışlanmağa qapılara hər zaman açıq olan islam dini İrana da belə bir şans verə bilər və yaxşı olar ki, İran rəsmiləri bundan sonrakı əməllərində islamın bu kimi üstünlüklərindən istifadə etsinlər. Belə olan halda onlar 31 illik fəaliyyətləri nəticəsində həyata keçirdikləri (və ya hər hansı bir şəkildə iştirak etdikləri) müxtəlif terror əməliyyatları ilə əlaqədar islam dininə vurduqları ləkəni təmizləmiş olacaqlar. Onlar dərin düşünsələr görərlər kimi belə bir addım atmaları üçün hələ gec deyil!

Araztm