GünAz TV: İranın keçmiş prezidenti və Qurumun Mənafeyini Müəyyənləşdirən Cəmiyyətin (QMMC) sədri Əkbər Haşimi Rəfsəncani xalqın etimadının bərpası məsələsini vurğulayaraq bildirib ki: “əgər ağıllı hərəkət etsək, iki il ərzində sağlam parlament və prezident seçkiləri keçirməklə xalqın itirilmiş etimadını yenidən qazanmaq mümkündür”. 

O, bu fikirləri  oktyabrın (October) 18-də bir qrup keçmiş vali ilə görüşü zamanı parlament, prezident və şuraların seçkilərində şəffaflığın və seçkilərin azad və sağlam keçirilməsinin vacibliyindən söhbət edərkən bildirmişdir. Həmçinin qeyd etmişdir ki, “ancaq belə olan halda əhali inqilabın əvvəllərində olduğu kimi hakimiyyətə yenidən inana bilər”. Rəfsəncani xalqla, xüsusən gənc nəsillə yetkililərin arasında olan məsafənin azadılması məsələsinə də diqqət yetirib. Qeyd edək ki, bundan bir gün əvvəl Haşimi Rəfsəncani islahatçı partiyaların üzvləri ilə görüşü zamanı da bildirmişdi ki, “xalq öz taleyinə və gələcəyinə təsir etmək istəyir və onlar öz səslərinin sadəcə bəzək olmasını istəmirlər”.

Bir yandan müxaliflər bu fikirləri gündəmə gətirərək parlament seçkiləri öncəsi  siyasi fəallıqlarını gücləndirməyə çalışarkən, digər tərəfdən hakimiyyət evdə həbsdə saxlanan müxalif liderlərə və onların ailə üzvlərinə qarşı yeni təzyiqlər göstərməkdədir. Artıq bu liderlərdən Mir Hüseyn Musəvinin qızları bildiriblər ki, 55 gündür ki, valideynlərini görmək və onların durumu ilə tanış olmaq imkanları yoxdur. Onların verdiyi məlumata görə, son görüşlərində Musəvi bildirib ki, belə vəziyyətdə parlament seçkilərinə ümidi yoxdur. Musəvi bu son görüşdə ölkənin gələcək durumunun aydın olacağı xəbərini də qızlarına vermişdir. Qızlar bildirib ki, Musəvinin məhkəmə işçilərinin həmin görüş zamanı onların yanında olmalarından narahat olaraq mübahisə etməsinin ataları ilə 55 gündür  görüşmələrinə mane yaratmış ola bilər. Onlar “Kələmə” vebsaytına müsahibələrində qeyd ediblər ki, məhkəmə yetkilisi bu görüş zamanı Musəvi ilə müzakirə etmək və bir razılıq əldə etmək məqsədi ilə gəlmişdi, lakin Musəvi onunla bu barədə söhbətdən imtina edib. Musəvinin qızları bildiriblər ki, valideyinlərinin hansı evdə saxlandığı barədə heç bir məlumatları yoxdur. Həmçinin, onlar bildiriblər ki, Musəvi son görüşündə “Bir adam ogurluğunun hesabatı” adlı kitabı oxumağı tövsiyyə edibdir. O, bunu yavaşca qızının qulağına pıçıldayaraq deyibdir. Onların sözlərinə görə, bu barədə Musəvi çox ehtiyatla danışırdı. Araztm