GünAz TV mətbuat mərkəzinin növbəti müsahibi, Türkiyə Böyük Millət Məclisinin Cümhuriyyət Xalq Partiyasının İstambuldan olan millət vəkili Əli Özgündüzdür.

- Ermənistan Azərbaycanın işğal etdiyi Qarabağ torpaqlarını azad etmək istəmir...

- Ermənistan mütləq işğal etdiyi Azərbaycan torpaqlarından çıxmalıdır və bunun başqa alternativ (əlavə) yolu yoxdur. Eyni zamanda, Qarabağ məsələsi ATƏT (Avropa Təhlükəsizlik və Əməkdaşlıq Təşkilatı) və beynelxalq hüquq çərçivəsində həll edilməlidir. Sülh yolu nəticə verməsə, Azərbaycan prezidenti cənab İlham Əliyev dediyi kimi, müharibə yoluyla Azərbaycan öz torpaqlarını Ermənistan işğalından azad edəcək. Onu qeyd edim ki, o torpaqlar işğal altında qaldıqca vətən uğrunda şəhid olan insanlarımızın sümükləri sızlayır, buna görə vətən bizi bağışlamaz və başımız aşağı olur.

Bu gün gəldiyimiz əsas nəticə odur ki, Azərbayca ordusu öz torpaqlarını azad etməyə qadirdir və artıq bu güc özünə açıq şəkildə göstərir.

- Türkiyənin bu məsələdə mövqeyi nədən ibarət olmalıdır? Üstəlik, Ermənistan Türkiyədən də Ağrı Dağı istəyir. Sizcə, Ermənistan belə siyasətlə hara gedir?

- Türkiyə üzərinə düşəni etməlidir ki, Rusiya müharibəyə qarışmasın və vəziyyət daha da çətinləşməsin. İşğalçı erməni hakimiyyətinə Ağrı dağ məsələsi ancaq xəyal kimi görünə bilər, Türkiyə istəsə bir saat içində İrəvanı azad edər. Sarkisyanın açıqlaması sadəcə olaraq ölkədaxili vəziyyətə hesablanan və amma boş-boğazlıqdan başqa bir şey ola bilməz. Sarkisyan öncə ölkəsində yaşayan bir necə milyon erməni vətəndaşlarının qarnını doydursun və həddini aşacaq sözlər danışmasın.

- Azərbaycan-Türkiyə münasibətlərinin inkişafı Sizi qane edirmi?

- Nə yazıq ki, Türkiyə ilə Azərbaycan arasındakı ticarətin həcmi bizim istədiyimiz şəkildə deyil. Bakı-Tiflis-Ceyhan çıxmaq şərtilə, iri layihələr gerçəkləşmir. Bu yaxınlarda tamamlanması gözlənilən Bakı-Tiflis-Qars dəmiryolunun açılması xarici ticarətin inkişaf etdirilməsi üçün böyük imkanlar açacaq.

İki dövlət arasında strateji əlaqələr gücləndirilməli, hər iki ölkənin işadamları ortaq yatırımlar həyata keçirilməli, xüsusilə Azərbaycanın enerji ehtiyatları və neft kimya sənayesi dünya bazarına çıxarılmasında Türkiyə körpü rolunu oynamalıdır.

Türkiyə ilə Azərbaycan qonşu ölkə olmaqla yanaşı, eyni zamanda “bir millət, iki dövlət”dirlər. Türkiyənin istiqlal savaşında, Canaqqallada Azərbaycan oğulları türk qardaşları ilə birgə savaşaraq, qəhrəmancasına xarici işğalçılara qarşı döyüşürdülər. Türkiyə Respublika (cümhuriyyət) elan olunan da Azərbaycan dövləti öz maddi dəstəyini verib. Eynilə, Azərbaycanın müstəqilliyini ilk tanıyan ölkə Türkiyədir. Bu gün Azərbaycanın müqəddəs şəhidlər xiyabanında Nuru Paşanın komandlığı altında Bakıya gələn türk əsgər və zabitlərinin xatirəsinə abidə ucadılıb. Bu, iki qardaş ölkə arasında əlaqələrin qırılmaz tellər üzərində olduğunu göstərir.

-Bildiyimiz qədər Siz özünüz əslən Azərbaycan türksünüz? Babalarınız buralardan gediblər.

- Bəli, mənim əslim Gəncə şəhərindəndədir. Oradan da İğdıra köç edərək, sonra isə İstambulda yaşamışıq. Bir Azərbaycan əsilli və Mustafa Kamal Atatürkün partiyasının üzvü olaraq Çümhuriyyət Xalq Partiyasının İstanbul  millət vəkili kimi, Türkiyə-Azərbaycan arasındakı qardaşlıq münasibətlərinin inkişaf etdirilməsi, bunun daha irəli aparılması üçün, Türkiyədə Azərbaycanla bağlı məsələlərin gündəmə gətirilməsi və onun həlli istiqamətində bütün fəaliyyətimi gücləndirəcəm.

- Sabah Azərbaycanın müstəqilliyinin yaranmasının 20-ci illiyidir. Bu haqda ürək sözlərinizi eşitmək istərdik.

- Azərbaycanın müstəqilliyi ilə qürur duyur və fəxr edirəm. İnşəallah, ən qısa zamanda Azərbaycanın işğal altında qalan torpaqları azad olunandan sonra müstəqillik bayramını dünya Azərbaycanlıları ilə birgə Qarabağda qeyd edəcəyik. Mən, Türkiyə parlamentində bütün Laçına, Şuşaya, Kəlbəcərə, Sumqayıta, Naxçıvana, Gəncəyə, xüsusilə Qarabağa salam olsun deyirəm. Biz, güclənən Azərbaycanla fəxr edir və bundan sonra daha da güclənməsi üçün əlimizdən gəldiyi qədər çalışacağıq.

Söhbətləşdi: Elnur Eltürk