- Rəcəb Tayyib Ərdoğan prezident seçiləcəksə hesab edirəm ki, bu günə qədər yeridilən siyasət davamlı olacaq. O cümlədən Türk Dövlətləri Təşkilatı və türk birliyinə yönəlik siyasət bundan sonra da aktiv şəkildə davam etdiriləcək. Çünki Türkiyədə bu siyasəti son 20 ildə həyata keçirən əsas siması cənab Ərdoğan və onun komandasıdır.

Onlar türk dünyası ilə kifayət qədər yaxından maraqlanırlar, sıx əlaqələr qurulub. 

Türkiyənin Azərbaycanla yanaşı Orta Asiyanın türk cümhuriyyətləri ilə də əlaqələr xeyli inkişaf edib. Bu dövlətlərlə yüksək tərəfdaşlıq haqqında sənədlər imzalanıb. Bir çox sahələrdə ciddi əməkdaşlıq formatları yaradılıb və bu əlaqələr inkişaf etməkdədir.

Hesab edirəm ki, Ərdoğan hakimiyyətdə qalacaqsa bu siyasət eynən dövrümüzün çağırışlarına  uyğun davam etdiriləcək. 

-Xarici ölkələrdə yaşayan bir qrup güneyli siyasi fəal Milli  Dövlətçilik Şurasının (MDŞ) yaradıldığı elan edib. 15 nəfər xaricdən, 15-dən çox Güneydən Mərkəzi Şura üzvü secilib. Bu qurum Güneydə Milli Hərəkata necə təsir edə bilər?
-Güney Azərbaycan Milli  Dövlətçilik Şurasının yaradılması əhəmiyyətli bir hadisədir. Bu Şurada iştirak edən şəxsləri şəxsən tanıyırıq. Onların mübarizə yolları, şəxsiyyətləri ilə bağlı kifayət qədər məlumatlıyıq. 

Onlar Azərbaycan cəmiyyətinin həm Güneydə, həm Quzeydə etimadını, etibarını qazanmış şəxslərdir.  Bu insanların əksəriyyəti müasir dövrümüzün  çağırışlarını düzgün qəbul edən və ona uyğun hərəkət edə bilən şəxslərdir.

Hesab edirəm ki, bu qurumun Güney Azərbaycandakı Milli Hərəkatı təsiri ancaq pozitiv yöndən olacaq.

Oradakı hərəkatın bundan sonrakı inkişafına ciddi rol oynayacaq.

-Prezident İlham Əliyev Türk Birliyinin başqanı Bağdad Amreyevlə görüşdə İranda azərbaycanlıların ana dilində təhsil problemindən danışmışdı. Güney Azərbaycan türklərinin ana dili hərəkatına hansı yolla dəstək verməliyik?

-Azərbaycan Prezidenti İlham Əliyevin Güneydə yaşayan soydaşlarımızı hüquqları, o cümlədən xaricdə yaşayan soydaşlarmızın ana dilində təhsil problemləri ilə bağlı məsələ qaldırması çox mühüm məsələdir. 

Bu, güneyli soydaşlarımız və ümumiyyətlə dünyada yaşayan azərbaycanlılar tərəfindən müsbət qarşılanıb. Bu bəyanatla ölkə prezidenti dünyada yaşayan bütün azərbaycanlıların probleminin həm də Azərbaycan dövlətinin problemi olduğunu göstərməyə çalışdı. 

Onların problemlərinin həllinə imkanı çatdığı qədər yardım edəcəyini və bu prosesə biganə qalmayacağını nümayiş etdirdi. Bu, əslində kifayət ciddi bəyanat idi. Əslində dövlətin rəsmi mövqeyi kimi təqdim olunmalıdır.

Güney Azərbaycanla əlaqələrimiz davam etməlidir. Bu, bütün səviyyələrdə olmalıdır. 

Xüsusilə də elm və təhsil sahəsində çalışanlarımızın güneyli soydaşlarımızla əlaqələri genişlənməlidir. Radio yayınları ilə maarifləndirici işlər aparılmalıdır. Güneyli soydaşalrımızın Azərbaycan universitetlərində güzəştli şərtlərlə təhsil almasına şərait yaradılmalıdır. 

-Əbülfəz Elçibəyin sağlığında Bakıda Güney Azərbaycana dəstək hərəkatı güclü idi, güneyli soydaşlarımızın hüquqlarını qoruyan çoxlu təşkilatlar, media orqanları var idi. İran Azərbaycana qarşı təxribatlarını davam etdirir. Sizcə Azərbaycanda güneyə dəstək hərəkatı yenidən güclənə bilərmi? Bunun üçün nə lazımdır?

-Elçibəyin sağlığında Güney Azərbaycan mövzusu Azərbaycanda kifayət qədər populyar mövzu idi. Çünki Elçibəyin siyasi fəaliyyətinin ana xəttlərindən biri Bütöv Azərbaycan idealı idi. Elçibəy hələ ötən əsrin 70-ci illərindən həbs olunanda ona qarşı irəli sürülən ittihamlardan biri onun Güney Azərbaycanla bağlı olan fikirləri idi. 

Hələ o zaman yazdığı yazılarında Bütöv Azərbaycan ideyası ilə bağlı fikirlərini yazırdı. 

“Azərbaycanın birləşdirilməsi üzərində düşüncələr” adlı bir əsəri də vardı. Məhz bu ideya Elçibəyin fəaliyyətin əsas istiqamətlərindən biri idi. 90-cı illərdə də, Kələkidən qayıdandan sorna Bütöv Azərbaycan Birliyini yaradaraq onu siyasi müstəviyə keçirdi, dünyanın gündəminə gətirdi.

90-ların sonlarında həm mediada kifayət qədər yazılar gedirdi. 

İctimai-siyasi təşkilatla bu mövzuya ciddi diqqət yetirirdi. Hazırda bu proses səngimiş kimi görünsə də hesab edirəm ki, hansısa bir məqamda bu hərəkat yenidən güclənəcək.

Çünki bu ideya insanların qəlbində daşıdığı bir ideyadır. Onun közərməsi üçün bir qığılcım lazımdır ki, alova çevrilsin.  

Hesab edirəm ki, tarixi şəraiti yaranan kimi Quzeydə də bu proses ciddi şəkildə güclənəcək. Bu da Güneydəki proseslərə ciddi təsir edəcək.

Ayxan