Mirhüseyn Musəvi xanımı ilə Namizədin xanımı prezidentə ultimatum verdi İranda prezident seçkilərinə seçkiqabağı kampaniya gedişində rəqabət kəskinləşir. Bu ilk seçkilərdir ki, namizədlər mübarizədə televiziya debatları formatından istifadə edirlər. Dünən silsilə debatların sonuncusu keçirilib. Axşam saatlarında hazırkı prezident Mahmud Əhmədinecadla İslam İnqilabı Keşikçilər korpusunun sabiq komandanı Möhsün Rezayi canlı yayımda proqramları ətrafında diskussiya aparıblar. Misli görünməmiş bu debatlar seçkiləri canlandırıb. Mahmud Əhmədinecad tərəfindən rəqiblərinin və yaxud da onlarla əlaqəli olan şəxslərin ünvanına korrupsiya ilə bağlı ittihamlar müxtəlif reaksiya doğurub. Bu bəzilərini sarsıtsa da, digərləri tərəfindən rəğbətlə qarşılanıb. Prezidentin opponentləri onun xarici siyasətini tənqid ediblər. Onlar Amerika tərəfindən prezidenti oğurlamaq cəhdləri barədə Əhmədinecadın iddialarını məsxərəyə qoyublar. Lakin cənab Əhmədinecad debatlarda daha hazırlıqlı kimi görünürdü. Beləliklə, İranda prezident seçkilərinin seçkiqabağı kampaniyası özünün həlledici və namizədlər üçün əsəbi mərhələsinə qədəm qoyur. Seçkilərdə hazırkı prezident Mahmud Əhmədinejadın əsas rəqibi Mirhüseyn Musəvi onu özünün tərəfdarlarına şər atmaqla gözdən salmaq cəhdində günahlandırıb. Keçmiş baş nazir ölkənin ali dini rəhbəri Ayətülla Xamneiyə məktubla müraciət edərək rəqibini qeyri-etik fəndlərə əl atmaqda ittiham edib. "Adamlara nə üçün yalan danışırlar?, - deyib Musəvi, - Adamlara yalan məlumatlar vermək nəyə lazımdır? Bu ölkənin mənfəəti üçündürmü? Öz vəzifəsində qalmaq xətrinə, bu postu zəbt etmək, rəqibi vurub çıxarmaq üçün yalan danışmaq nəyə gərəkdir?" Cənab Musəvi deyib ki, cənab Əhmədinejad İran İslam inqilabının 30 illik tarixinə ləkə gətirib: "Prezident kreslosu bu qədər şirindirmi ki, buna görə fəxarətli bir tarixin üstünə ləkə gətirəsən? Buna görə bu qədər ağ yalanlar danışmağa dəyərmi?”- deyib prezidentliyə namizəd. Belə mübahisələrdə son sözü deyən ali dini rəhbər Ayətülla Xamneyi bütün namizədləri təmkinə çağırıb. Bununla belə bir sıra nüfuzlu din və siyasət xadimləri bildiriblər ki, prezident Əhmədinejadı məhkəməyə verəcəklər. Onlar bildiriblər ki, cənab Əhmədinejad onları korrupsiyada ittiham etməklə yalan danışıb. Seçkilərdə milliyətcə azərbaycanlı namizəd, keçmiş baş nazir Musəvinin xanımı Zəhra Rahnəvərd də şikayətçilərin arasındadır. Ötən bazar günü Mahmud Əhmədinejad teledebat zamanı bildirmişdi ki, xanım Rahnəvərd Tehranın Azad Universitetində doktorluq dərəcəsini saxtakarlıqla alıb. "Mən artıq vəkil tutmuşam, -deyib Zəhra Rahnəvərd, - Ona bəzi məsələləri izah etmişəm. Mən prezidentə qarşı iddia ərizəmdə onun üç ittihamına diqqəti çəkirəm. O üzr istəsə ərizəmi geri götürərəm. Mən ona 24 saat vaxt vermişəm."