GünAz TV: Ötən gün ərzində Tehranın imam cüməsi də daxil olmaqla, İranın bir çox axundu “Maliyyə Tədbirləri üzrə İşçi Qrupu”nun İrandan qara siyahıya daxil olmamaq üçün bir neçə layihə qəbul etməsini tələb etməsinə qarşı çıxıblar. Ali Məsləhət Şurasının üzvü Qulamrza Mesbahi Müqəddəm isə bildirib ki, “Maliyyə Tədbirləri üzrə İşçi Qrupu”nun layihələrinin qəbulu İranın “formal şirkətlər qura bilməsinə əngəl törədəcək”.

Tehranın imam cüməsi Kazım Sadiqi fevralın 8-də cümə xütbəsi zamanı deyib: “Bəziləri demişdilər ki, həm nüvə fəaliyyətləri davam etməli, həm də insanlar rahat yaşamalıdılar, amma bu gün bunların heç birinin reallaşmadığının, əksinə hər iki halda zərərlərlə üzləşdiyimizin şahidiyik.”

O, bu sözü ilə prezident Həsən Ruhaniyə işarə edir. Ruhani 2013-cü il prezident seçkilərində təbliğat- təşviqat prosesləri zamanı bu cür fikir səsləndirmişdi.

Sadiqi xütbəsinin sonunda FATF layihələrinə qarşı dayandığını və bunun “ölkənin zərərinə” olduğunu vurğulayıb.

Ali Məsləhət Şurasının üzvü Qulamrza Mesbahi Müqəddəm də dünən Tehranda cümə namazı xütbəsindən öncə etdiyi çıxışda bildirib: “Sanksiyaların hökm sürdüyü bir dövrdə ölkənin iqtisadiyyatı barədə məlumatları Amerika, İsrail və Səudiyyə Ərəbistanına təqdim etməyimiz doğru deyil. İran sanksiyalardan yayınmaq üçün həm ölkə daxilində, həm də xaricdə formal şirkətlər təsis edir. Lakin FATF-ın təklif etdiyi konvensiyalara qoşulmaqla bu yolla ticari əlaqələr qurmaq imkanımız olmayacaq.”

Xatırladaq ki, Ali Məsləhət Şurası martın 2-də hicri təqvimlə bu il ərzindəki son iclasında 4-cü dəfə “Palermo” ilə bağlı bir nəticəyə gələ bilməyib. Şura layihənin hicri təqvimlə gələn il səsverməyə qoyulması ilə bağlı qərar qəbul edib.

Bundan sonra İran Milli Məclisinin Ümid Fraksiyasının üzvü Məhəmmədrza Tabeş bildirib ki, “bizdə olan məlumatlara görə, Ali Məsləhət Şurası Palermo layihəsini qəbul etməyəcək”.

Digər tərəfdən, İranın bəzi media orqanlarının dərc etdikləri məlumatlarda qeyd edilir ki, dövlət Ali Məsləhət Şurasından novruz bayramından əvvəl qiymətlərin qalxmasına təsir göstərməmək üçün “Palermo”nun qəbulunun rədd edilməsini bayramdan sonraya qədər təxirə salsın.

“Maliyyə Tədbirləri üzrə İşçi Qrupu”- FATF Parisdə 1 həftəlik iclasından sonra fevralın 22-də İrana bu Qrupun qara siyahısına daxil olmamaq üçün iyun ayına qədər irəli sürülmüş layihələri qəbul etmək üçün möhlət tanıyıb. Qrup bu vaxta qədər İrana bu sahədə 4 dəfə möhlət verib.

“İkinci addım bəyanatının əksinə hərəkət etmək imam Zamanın zühuruna xəyanətdir”

Məşhədin imam cüməsi Əhməd Ələmülhüda isə dünənki xütbəsində bildirib ki, “kim Əli Xamneyinin son bəyanatına əməl etməsə, onun əksinə olaraq digər sənəd, yol, hərəkat və partiya təşkil etsə, o, imam Zamanın zühuruna xəyanət etmiş hesab edilməlidir”.

Qeyd etmək lazımdır ki, Əli Xamneyi İran inqilabının 40-cı ildönümü ilə bağlı yaydığı bəyanatda bildirmişdi: “İslam respublikası həmişə yumşaq mövqedən çıxış edib və artıq yol verdiyi səhvlərini düzəltməyə hazırdır. Lakin bu inqilab passivlik tərəfdarı deyil və öz idelalarında hər hansı bir dəyişiklik etməyəcək. İslam Respblikası mövcud durumla bağlı edilən tənqidlərə müsbət həssaslıqla yanaşır və bu tənqidləri Allahın neməti sayır. Lakin heç bir bəhanə adı altında öz əvvəlki dəyərlərindən vazkeçmək, uzaqlaşmaq fikrində deyil.”

Ə.A