Suriya prezidenti təzyiqlərə boyun əyir

SON XƏBƏRLƏR

Suriya prezidenti təzyiqlərə boyun əyir

2021.10.20, 07:36

Gunaz.tv

GünAz TV: Suriya diktatoru Ərəb Birliyinin təkliflərinə əməl etməyə razılıq verib. Qərb ölkələri isə diktatoru yıxmaq üçün müxalifətə gizli silah yardımı göstərir.

Ərəb Birliyi Suriyada qarşıdurmaları sona çatdırmaq üçün Qətər xarici işlər naziri Hamad bin Cesim əl-Tani tərəfindən Bəşər Əsədə ünvanlanan planla (tərhlə) bağlı Dəməşq rəhbərliyi ilə razılaşma əldə edildiyini açıqlayıb. Əlcəzair xarici işlər naziri Murad Medelsi Suriya hökumət nümayəndələri ilə razılaşma əldə edildiyini təsdiqləyib. Xəbəri açıqlayan Əl-Ərəbiyyə telekanalı isə razılaşma ilə bağlı detallı (coziyyat, təfərrüat) məlumat verməyib.

Buna qədər Qətər xarici işlər naziri əl-Tani birliyin Suriyaya «müsbət və ciddi» bir təklif təqdim etdiyini açıqlamış və «görüşlərimiz səmimi oldu» deməklə kifayətlənmişdi. Ərəb Birliyinin təklifinin də detalları bilinmir. Amma birlik daha əvvəlki müzakirələrdə Suriya prezidenti Bəşər Əsəddən hərbi qüvvələrini geri çəkməsini və prezident seçkilərinə getməsini istəmişdi. Suriya xarici işlər nazirinə Ərəb Birliyinin silahsız vətəndaşların öldürülməsinə son verməsini tələb edən mesajı da çatdırılıb. Birlik Suriya rejimi ilə müxalifətə Misirin paytaxtı Qahirədə bir araya gəlmələri üçün çağırış edib.

Əl-Tani Ərəb Birliyinin Suriya ilə bağlı atacağı addımları Dəməşqdən alacaqları cavaba əsasən çərşənbə günü müəyyən edəcəklərini də bildirmişdi. Bəşər Əsəd isə «Sunday Telegraph» qəzetinə verdiyi açıqlamada Qərbin Suriyaya müdaxiləsinin «zəlzələyə gətirib çıxaracağını və bütün bölgənin yanacağını» bildirməklə hədələmişdi. O, belə bir müdaxiləninin «daha bir Əfqanıstanın ortaya çıxmasına səbəb olacağını» bəyan etmişdi.

Suriyada hakim və yeganə Bəəs partiyasının yüksək səviyyəli məmurlarından Fayez İzzəddin də Suriyanın maraqlarına uyğun gəlməyən qərarların qəbul edilməsi halında Ərəb Birliyinə rədd cavabı verəcəklərini, Suriyanın suverenliyinə zidd olan heç bir təklifi qəbul etməyəcəklərini söyləmişdi.

Bu arada İngiltərənin «The Times» qəzeti Qərbin Suriyada Bəşər Əsədi devirməyin yollarını aradığını yazıb. Qəzet yazır: «Qərbin Suriyaya hərbi müdaxiləsinin perspektivləri (çeşməndaz) dumanlı olaraq qalmaqdadır. Amma Əsədin hər hansı müdaxilə nəticəsində regionda (bölgədə) «zəlzələ» yaşanacağını deməsi onun narahatlığından xəbər verir. Suriyada zorakılığın güclənməsi və silahlı müxalifətin formalaşması Qərbi və Avropanı hazırda effektiv (təsirli) ola biləcək müdaxilə formaları üzərində baş sındırmağa məcbur edir. Variantlar (seçənəklər) müxtəlifdir – müxalifət üçün qaçaqmalçılıq yolu ilə gizli silah yardımı və rabitə sistemindən tutmuş İraq nümunəsi əsasında rejimi devirmək üçün birbaşa hərbi müdaxiləyə qədər. Amma sonuncu variantın reallaşması ehtimalı azdır. Gizli hərbi yardım variantı isə daha realdır». Bizim yol

GUNAZ.TV

SON XƏBƏRLƏR