GünAz TV mətbuat mərkəzinin növbəti müsahibi, bu günlərdə yeni fəaliyyətə başlayan Türkel Araşdırmalar Qurumunun təsisçilərindən biri Vuqar Bəyturandır.

- Vuqar bəy, ilk öncə yeni yaranan araşdırma mərkəzi haqqında oxucularımıza məlumat verəsiniz və mərkəz hansı zərurətdən yarandı?

-Türkel adı ilə araşdırma qurumunun yaradılması ideyası çoxdan var idi və məqsədimiz dünyada və o cümlədən, türk dünyasında baş verən hadisələrə ictimai-siyasi, ideoloji, ruhani prizmadan yanaşma tətbiq edərək, milli yükü olan, əsaslı araşdırmalar aparaq, həmin araşdırmaları ictimai fikrə təqdim edək. Hesab edirik ki, cəmiyyətimizin ciddi maariflənməyə ehtiyacı var, maarifçilik xətti bizim yeni qurumda aparıcı xarakter (xüsusiyyət) daşıyacaq. Doğrudan da bu gün ideoloji, ruhani boşluq, siyasi passivlik, ictimai ədalət mövcuddur və nə qədər iddialı səslənsə də, bu problemlərin həlli istiqamətində konkret (açıq, müşəxxəs) addımlar atmağı planlaşdırırıq (tərhini tökürük). Bölünmüş, ərazisi müxtəlif dövlətlərin, ruhu və ideolojisi yad dəyərlərin işğalında olan bir millətin köklü devrimlərə ehtiyacı var.

Qurumda məndən başqa, Mütləqə İnam Ocağının Yükümlüsü Soylu Atalı, Güney Azərbaycandan olan ziyalı, araşdırmaçı yazar Aqşin Ağkəmərli və milli mücadilənin ünlü isimlərindən olan Abil Ulusoy təsisçi qismində çıxış edir. Yeni yaranmış araşdırma qurumu instisional struktura (araşdımalara üstünlük veriləcək) malik olacaq, müxtəlif problemlərlə məşğul olacaq Odalar yaradılacaq.

- Xüsusilə, TAQ  araşdırmalarında hansı mövzulara önəm verəcək?

- Türk millətini maraqlandıran, millətimizə birbaşa və dolayısı ilə aidiyyatı olan bütün məsələlər diqqətimizdə olacaq. Azərbaycanda yerləşirik və bu baxımdan əsas diqqət Azərbaycan türkünün millət kimi formalaşma və dövlət qurma prosesinin (sürəcinin) qarşısında duran hər bir maneəyə yönəldiləcək. Biz belə hesab edirik ki, millətimizin taleyində ciddi dönüşə nail olmaq üçün əsas açar rolunu Güney Azərbaycan məsələsi oynayacaq. Bu mövzu ilə yanaşı Qarabağ, Borçalı, Qərbi Azərbaycan, Dərbənd, Kərkük problemləri, Türk Dünyasının birliyi, türkün yad təsirlərdən qorunması və öz inamına, öz dəyərlərinə sahib çıxması müzakirələrimizin əsas istiqamətlərini təşkil edəcək. İstəyimiz Azərbaycanın siyasi bərpasını gerçəkləşdirmək üçün elmi-ideoloji, ictimai-siyasi, ruhani əsasları müəyyənləşdirmək və xalqa təqdim etməkdir.

- Güney Azərbaycan məsələsi ilə bağlı hansı layihələri həyata keçirməyə planlaşdırırsınız?

- Təsadüfi deyil ki, təsisdən sonra ilk müzakirəmiz “Güney Azərbaycanın müstəqilliyinə konseptual (idraki) baxış” mövzusunda olacaq. Bu gün Quzey Azərbaycan dövləti və xalqı tarixi Azərbaycan torpaqlarının və milli gücünün çox cuzi bir hissəsini təşkil edir. Azərbaycanımızın taleyi birmənalı şəkildə Güneyimizdə həll olunacaq. Bütövləşəriksə, kiçik millətlər, yad dəyərlər bizə meydan oxuya bilməyəcək. Məsələnin psixoloji –tarixi tərəfi də var ki, millət bütövlüyə nail ola bilsə, onun enerjisi özünə qayıdacaq, milli gücü tamlaşacaq, dünyanı öz dəyərləri ilə humanitar (insani) işğala məruz qoyacaq. Ona görə əsas prioritet (öncəlik) mövzularımızdan biri məhz Güney məsələsidir.

- Bəs, ümumilikdə qarşıda hansı layihələrin həyata keçirilməsi gözlənilir?

- Biz müzakirə edəcəyimiz bütün məsələlərə konseptual araşdırmar yanaşmağa çalışacağıq. Mövzularımızın hələlik bir hissəsi müəyyən olunub. Müzakirələrdə müxtəlif sahələrin mütəxəssislərinin də fikirlərini alıb, ciddi araşdırmaıar aparmaq, nəticələri cəmiyyətə çatdırmaq, kitab, xüsusi buraxılış formasında nəşrlərlə maarifçilik işi aparmaq niyyətindəyik. Digər bizim tipli qurumlarla da əməkdaşlıq etmək fikrimiz var.

Söhbətləşdi: Elnur Eltürk