GünAz TV: Dünən Media Mərkəzində “Güney Azərbaycanında artan fəallıq və Azərbaycan hökumətinin reaksiyası (əksüləməli)” mövzüsünda dəyirmi masa keçirilib.

Tədbirdə çıxış edən “Atlas” Araşdırmalar Mərkəzinin direktoru Elxan Şahinoğlu Güneydə narahatedici hadisələrin baş verdiyini deyib.

 O bildirib ki, Urmu gölünün quruması təkcə gölün ətrafında yaşayan azərbaycanlılar üçün deyil, bütövlükdə bölgə üçün ekoloji fəlakətə səbəb ola bilər.

 “Orada yaranan duz ətraf rayonlara (məntəqələrə), o cümlədən Naxçıvana da yayıla bilər. Məsələnin narahatedici tərəflərindən biri də odur ki, İran hökuməti bu hadisəyə biganə yanaşır. Bu isə öz növbəsində Urmu gölünün qurumasının arxasında İranın siyasi maraqlarının durması və gölün qurumasının İranın azərbaycanlılara qarşı assimilyasiya (asimilasyon) siyasətinin təzahürü olması barədə qənaət yaradır”.

 Tədbirdə çıxış edən müstəqil ekspert (karşünas) Sülhəddin Əkbər İran məsələsinin hələ 2006-cı ildən qərbin gündəmində olduğunu bildirib.

 “Hələ İranın nüvə proqramı məsələsi ortaya gəlməmişdən İran bir şərq dövləti olaraq totalitar rejim kimi gündəmə gəlmişdi. Sadəcə olaraq o vaxt Putinin müdaxiləsi İranı xilas etdi. İndi Yaxın Şərqdə baş verən proseslərin (sürəclər) Suriyaya çatması o deməkdir ki, növbə İranındır.

 İran rejimi özünü təhlükədə hiss etdiyinə görə, ölkədə baş qaldıran hər bir etiraz aksiyasını (etiraz yürüşünü) boğmağa çalışır”.

 O bildirib ki, İran həmişə Azərbaycana qarşı hər hansı təxribat törətməyə hazır olub.

 “Sadəcə, hələ ki, Rusiya bu məsələdə İranı neytrallaşdırır (xunsa edir). Lakin Azərbaycanın İrana qarşı etibarlı və təbii müttəfiqi olmalıdır. Bu, müttəfiq də təbii ki, Türkiyədir”.      

 Güneydən olan Araz Obalı Güney Azərbaycanında yaşayan soydaşlarımızın etiraz aksiyalarının mütəşəkkil və ardıcıl şəkil aldığını bildirib.

 “Artıq Urmu gölü ilə bağlı aksiyalar üç həftədir davam edir. Yaxın günlərdə isə eyni gündə və saatda Güneyin bütün şəhərlərində insanların küçələrə axışıb etiraz aksiyaları keçirməsi nəzərdə tutulub”.

 A.Obalı bildirib ki, Şimali Azərbaycan istəsə də, istəməsə də İran onu özünə düşmən saymaqdan vaz keçməyəcək.

 “İran ideoloqları SSRİ (Şurəvi) dağılandan sonra müstəqil Azərbaycanı ən qatı düşmənləri kimi görürlər. Bunu dəyişmək mümkün deyil. Ona görə də, Azərbaycan hökumətinin ehtiyatlı siyasət yeritməsi, İranın daxili işlərinə qarışmaması vəziyyəti dəyişmir. Əksinə, İran getdikcə daha azğın surətdə Azərbaycanın üstünə gəlmək istəyir. Generalları Azərbaycanın İran torpaqları olmasını iddia edir, hərbi qüvvələri sərhəddə təlim keçir və sairə”.

 A.Obalı Güneydə baş verən hadisələrdə Azərbaycanlıların şimaldakı qardaşlarına ehtiyacları olduğunu vurğulayıb. “Mən artıq xaiş etmirəm, yalvarıram, bizə kömək edin”.

 Millət vəkili Fazil Mustafa isə qərbin İranla bağlı planlarının (tərhlərinin) masa üzərində olduğunu deyib.

 “Lakin orada gələcək İranda azərbaycanlıların yeri dəqiq göstərilməyib. Ona görə də güneydəki soydaşlarımız hər şeyi ölçüb-biçməli, zərbəni birinci öz üzərinə götürməyə çalışmamalıdır”.

 Azərbaycan hökumətinin məsələyə reaksiyasına gəlincə, millət vəkili bu reaksiyanı qənaətbəxş saydığını bildirib. 

 “Çünki bu reaksiya beynəlxalq hüquqdan kənara çıxmır. Bu, düzgün mövqedir”.

Qızılgül Abdinova

Gün.Az