GünAz TV mətbuat mərkəzi GünAz Televiziyasının (televizyonunun) başqanı Əhməd bəy Obalının “Amerikanın səsi”nin AzeriDiaspor bloquna verdiyi müsahibəsini olduğu kimi təqdim edir.

"Mənim fikrimcə, həm dünya yavaş-yavaş inanır, həm də İranda yaşayan başqa xalqlar da buna inanır ki, bu dərdləri rejimin içindən çıxan qruplar həll edə bilməyəcəklər, yenidən başqa bir formada burada islahat aparmaq lazımdır"

Dilşad Əliyarlı: Əhməd bəy, siz bu yaxınlarda Urmu gölündə yaranmış ekoloji fəlakət və bu səbəblə keçirilən aksiyaların (yürüşlərin) işıqlandırılması ilə bağlı Günaz TV-də müraciətlə çıxış etmisiniz. Çox emosional (ehsasi) çıxış etmisiniz. Bu çıxışda kəskin tənqidlər səslənib. Məqsədiniz nə idi?

Əhməd Obalı: Atalar deyib ki, uman yerdən küsərlər. Biz küsmürük. Tənqidimiz var, etirazımız var. Mən bir nəticə əldə etmək üçün bilərək çıxıb tənqid etdim. Biz dostlarımız və həmvətənlərimiz elə ağır vəziyyətdə olanda emosional olmaya bilmərik. Gərək də emosional olaq. Onlar bizim ailələrimizdir. Fərqi yoxdur. Mən onların çoxunu heç vaxt görməmişəm. Amma onlar da bizim ailələrimizdir. İnsani baxımdan da adam hər zaman özünə nəzarət edə bilmir. Ailədə bir itki olursa, insan ağlayır. Bu da bizim ailəmizdir. Azərbaycan ailəsi. Bu tənqidlərdən sonra mən arzu edirəm ki, buraya qədər nəticə olub və bundan daha artıq olacaq. Tənqid etdiyimiz televiziyalar və qəzetlər bizə dolayısı ilə, ya da bəzən birbaşa deyib ki, haqlısız, bu məsələləri daha çox işıqlandırmalıyıq. Yəni, görünür, onun nəticəsi olub. Mən öz növbəmdə buna müsbət baxan və hadisələrə daha çox yer verən insanların hamısına təşəkkürümü bildirirəm.

SUAL: Əhməd bəy, çıxışınızın emosionallığına görə sizi də tənqid ediblər. Azərbaycanlılar arasında nəticə əldə etmək üçün məsələlərə indi emosional deyil, daha çox soyuqqanlılıqla, daha praqmatik (əməli) yanaşmaq tərzinə üstünlük verənlər var. Buna münasibətinizi bilmək maraqlıdır.

CAVAB: Haqlıdırlar. Sözdə gözəl məna var. Həmişə praqmatik yanaşmaq çox düzgün yoldur. Məsələ ondadır ki, praqmatik yanaşma nə deməkdir. Bir yerdə ki, millət ayağı qalxıb sözünü deməyəndə dövlət onun sözünə qulaq asmır, o zaman praqmatizm evdə oturmaq mənasında işlədilirsə, bu, dövlətə kömək etmək deməkdir. İran dövləti istəyir ki, millət sakitcə evdə otursun. Amma məsələ həll olunmur. 7 ildir elə biz televiziyada bundan danışırıq. Rejim 10 ildən artıqdır bilir. İndi özləri deyirlər ki, biz 10 ildir bilirdik göl quruyacaq. Amma heç bir iş görməyiblər. Bu il məclisin nümayəndəsinin dediyinə görə, Urmu gölünə gedən suların səviyyəsi sıfra çatıb. Yəni artıq Urmu gölünə heç su buraxılmır. Halbuki oraya ildə 7 milyard kubometrdən (metr-i mükəəb) çox su gedirdi. Amma onun hamısını kəsiblər. Demək, millət ayağa qalxmasa və etirazını bildirməsə, biz Ana dilimizi itirmirik, biz vətəni itiririk. Bu, vətən və ölüm-dirim davasıdır. Burada ayağa qalxıb söz deməkdən başqa heç bir çarə qalmayıb. Ayağa qalxıb söz demək də yanlış yolla yox, sadəcə mədəni yolla sözü demək lazımdır. Milli fəallarımızın çağırışlarına cavab vermişik. Düşünürük ki, belə davam etsə, bir nəticə verəcək. Yoxsa o gölü tamamilə qurutmaq istəyirlər.

SUAL: Əhməd bəy, bir sual da vermək istəyirəm. Bu il əvvəlki illərlə müqayisədə xarici media vasitələrində Urmu hadisələri geniş işıqlandırıldı. Sizcə, bu dəfə beynəlxalq media vasitələrində hadisələrə verilən diqqət nə ilə izah edilir?

CAVAB: Bunun iki səbəbi ola bilər. Birincisi, ərəb ölkələrində baş verən hadisələr diqqəti Yaxın Şərqə yönəltdi. Gözlənilir ki, Suriyada hadisələr başlayandan sonra növbədə İran ola bilər. Bu baxımdam İranda indi nə baş versə, oraya tez diqqət verilir. Bu, məsələnin bir tərəfidir. İkincisi odur ki, Azərbaycan hərəkatı öz səsini yavaş-yavaş çatdırmağa başlayır və bu getdikcə nəticə verməlidir. Mən iki səbəbi göstərdim. Amma bunun bir səbəbi də var. Üçüncüsü, İran rejiminin içindən islahat adı ilə çıxmış qrupların fəalliyyətinin məğlubiyyətə uğramasından ibarətdir. İranda rejimin içindən çıxan islahatçılar hər hansı bir iş görə bilməyəcəklər. Ona görə mənim fikrimcə, həm dünya yavaş-yavaş inanır, həm də İranda yaşayan başqa xalqlar da buna inanır ki, bu dərdləri rejimin içindən çıxan qruplar həll edə bilməyəcəklər, yenidən başqa bir formada burada islahat aparmaq lazımdır.