Xalq yazıçısı Çingiz Abdullayev dünən Sumqayıtda oxucuları ilə görüşündə “Birinci Qarabağ Müharibəsi” ifadəsini işlətməməyi xahiş edib.

“Birinci Qarabağ müharibəsi deməyin! Bu müharibə olmayıb, yalandır. Ermənilər Sovet qoşunlarına pul verib, tanklarından istifadə edib bizim torpaqlarımızı alırdılar. Bizim ordumuz olmayıb. Xocalıya girən 366-cı alayda komandirlərin hamısı erməni idi. Əsl müharibə indi olub. 44 günlük müharibə ki, bizim müstəqil ordumuz olub, komandiri olub”, - o deyib.

Bununla yanaşı, Xalq yazıçısı bir müddət əvvəl də Vətən müharibəsi haqda özünün “Facebook” hesabında paylaşım etmişdi:

“Mən “Birinci” və “İkinci Qarabağ savaşı” terminlərinin əleyhinəyəm. Birinci Qarabağ müharibəsi olmayıb. Müharibə iki dövlətin orduları arasında silahlı konfliktə deyilir. Bu isə sadəcə yox idi! Sovet süquta uğradığı vaxtda sadəcə xalqın özünün müdafiə məqsədli yaratdığı könüllülər dəstəsi var idi. Qonşularımızın isə yetərincə sayda hazırlıqlı zabitləri olsa da, keçmiş sovet komandirlərinə pul ödəyərək onların texnika, hətta canlı qüvvəsindən istifadə edirdilər”.

Qeyd edək ki, Çingiz Abdullayevin olmadığını iddia etdiyi Birinci Qarabağ müharibəsində 18 500 nəfər şəhid olub, 3700 nəfər itkin düşüb, 39 500 nəfər isə yaralanıb. Xalq yazıçısının bu açıqlaması cəmiyyət tərəfindən birmənalı qarşılanmayıb və onun barəsində çox kəskin tənqidlər səsləndirilib. Ç.Abdullayevin rusdilli olduğunu nəzərə alsaq, fikrini düzgün ifadə etmədiyini və qərəzli olmadığını düşünmək olar.

Bu fikirləri “Facebook” hesabında paylaşmaq və oxucuları ilə görüşdə səsləndirmək nə dərəcədə doğrudur? Nəzərə alaq ki, Qarabağ bizim həssas nöqtəmizdir.

Qarabağ müharibsi şəhidi, Milli Qəhrərman Allahverdi Bağırovun bacısı Almaz Bağırova deyib ki, belə fikirlər şəhidlərimizə və qazilərimizə hörmətsizlikdir:

“Müharibəyə getməyənlərin hamısı indi kişi çıxıb! Əgər qeyrətli oğul idilərsə, onlar da müharibəyə gedərdi. Heç biri döyüşmədi, burunları belə qanamadı. Döyüşə gedənlər ya şəhid oldu, ya da qazi. Çingiz Abdullayev indi guya ağıllı çıxıb və qabağa gedir, amma mənimkilərin hamısı şəhid oldu. Deyirlər ki, qardaşların şəhidlik zirvəsinə ucalıblar. Çingiz Abdullayev kimilərində ailəsindən kimsə şəhid olsun, qoy onlarda şəhidlik zirvəsinə ucalsınlar. 

Axı nəyə görə onların zəhmətlərin itirirlər? İndi kimlərsə ağzına gələni danışır və Ağdama gedir. İndi ora hər kəs gedə bilər. Biz orada minlərlə şəhid verdik. Bu gün isə orada obyekt almağa gedirlər. 3 qardaşımdan biri sağ qalmadı.

Qarabağ torpaqlarına görə yalandan ssenari yazaraq Eldarı öldürtdülər. O, həmin gün Ayaz Mütəllibova sənəd təqdim etmişdi, axşam vurdular. Əvvəlcədən hər şeyi planlamışdılar. Eldardan sonra Allahverdi döyüşürdü, amma o da şəhid oldu.

İndiyə kimi Eldara şəhid adı belə verməyiblər. Guya Allahverdi və Elməddin üçün nə etdilər? Bu gün onların xəstə övladlarına mən təkbaşıma baxıram. 30 ildir ki, onların övladların mən saxlayıram. Bu gün mən nə üçün ona-buna möhtac olmalıyam? İndi nədən danışırlar, nə edirlər?

Hazırda yaşayışa yararsız evdə qalırıq, amma heç kim bizimlə maraqlanmır. Mən öləndə kim götürəcək məni? Minnəti şəkildə ölmək istəmirəm”. (cebhe.info)

Ayxan