Bu barədə Azərbaycan Prezidenti İlham Əliyev Türkiyənin milli təhsil naziri Mahmut Özeri və Türkiyə Böyük Millət Məclisinin (TBMM) bir qrup üzvünü videokonfrans formatında qəbul edərkən bildirib. Təhsil sahəsində əməkdaşlıqda böyük nəailiyyətlərin əldə olunduğunu qeyd edən dövlət başçısı Azərbaycan-Türkiyə birgə universitetinin yaradılmasının böyük önəm daşıdığını deyib. 

Qarabağ işğaldan azad olunduqdan sonra universitetlərin filiallarının açılması və ya Bakıdakı ali təhsil müəssisələrinin oraya köçürülməsi də müzakirə olunurdu. Bu barədə çoxsaylı təkliflər mediada səsləndirilirdi. 

Təhsil eksperti Kamran Əsədov bildirib ki, hazırda Azərbaycanda 51 ali təhsil müəssisəsi var: 

"Azərbaycanla birgə bir neçə xarici ali təhsil müəssisəsi fəaliyyət göstərir. Böyük Britaniya, Fransa, Cənubi Koreyanın universitetləri ilə əməkdaşlığımız mövcuddur. 

Azərbaycanda Moskva Dövət Universitetinin filialı var. Bu, vacib məqamdır. Xarici ölkələrin universitetləri birmənalı şəkildə ölkədə rəqabət mühitini formalaşdırır. Azərbayacanda Türkiyə universitetlərinə ehtiyac var. 

Hazırda ölkəmizdə özəl türk liseyləri fəaliyyət göstərir. Qarabağla bağlı məsələ isə tamamilə fərqlidir. İşğaldan azad edilən torpaqlarımızda infrastruktur bərpa edilir". 

Ekspert bildirib ki, Qarabağa köç məsələsində təhsil mütləqdir. Məskunlaşmanın ən ciddi mərhələsini bu ərazilərdə universitetlərin açılması zamanı görəcəyik: 

"Bu, həmişə belə olub. Hətta 70-ci illərdə Bakıda məskunlaşma zamanı ali təhsil müəssisələrinin fəaliyyətini də buna misal göstərə bilərik. Dövlət başçısının diqqəti ilə Qarabağda yeni infrastruktur qurulur, iş yerləri açılır. Bu, əhalinin geri qayıtmasına  təsir göstərəcək. Burada həmçinin ixtisas məsələləri də var. Qeyd etdiyim kimi, ərazi işğaldan yeni azad olunub. Ona görə mütləq şəkildə bir sıra ixtisaslı mütəxəssislərə ehtiyac var. 

Çox təəssüflər olsun ki, Sovet dövründə həmin ərazilərdə ixtisaslı kadrların çatışmazlığı var idi. Olan vəzifələr isə Sovet rəhbərliyinin səyi ilə daha çox ermənilərə həvalə edilmişdi. Hüquq-mühafizə orqanlarını, bir sıra strukturlar və s. buna misal göstərə bilərik". 

Kamran Əsədov bildirib ki, Türkiyə universitetlərinin bir sıra ixtisaslarının Azərbaycanda açılması ölkəmizə böyük töhfə verəcək:

"Qarabağda təhlükəsizliyin təmin olunması üçün Türkiyənin hərbi məktəblərinin, hüquq və eləcə də kənd təsərrüfatı üzrə ixtisaslı universitetlərin açılmasında maraqlı olmalıyıq. 

Türkiyədə şəhərsalma və arxitektura sahəsi inkişaf edib. Qarabağda infrastrukturun qurulması üçün kənd təsərrüfatı, meliorasiya ixtisaslarına da diqqət yetirməliyik. Hazırda Türkiyə universitetləri dünya reytinqindədir. İstər akademik heyət, istər tədqiqat baxımından belədir. 

Türkiyə əmək bazarının tələblərinə cavab verən kadrlar hazırlayır. Düşünürəm ki, Ağdamda, Laçında universitetlər açıla bilər. Şuşa Dövlət Universiteti mütləq şəkildə açılmalıdır". (cebhe.info)

Ayxan