“Azərbaycan ərazisini 86,6 min kv.km olaraq tanıyırıq, bura Qarabağ da daxildir”- Paşinyan

SON XƏBƏRLƏR

“Azərbaycan ərazisini 86,6 min kv.km olaraq tanıyırıq, bura Qarabağ da daxildir”- Paşinyan

2023.05.22, 14:43

Gunaz.tv

Baş nazirin sözlərinə görə, bunun müqabilində Bakı regionda yaşayan ermənilərə təhlükəsizlik zəmanəti verməlidir.

“Bəli, Ermənistan Azərbaycanın Qarabağ daxil olmaqla 86.600 kvadrat kilometr ərazisini tanıyır. Amma eyni zamanda, söhbət ondan gedir ki, Qarabağ əhalisinin hüquqları və təhlükəsizliyi məsələsi Stepanakert-Bakı (Xankəndi-Bakı:red) formatında müzakirə olunmalıdır”, – Paşinyan bildirib.

Paşinyan hesab edir ki, İrəvanın Qarabağla bağlı hazırkı mövqeyi sülh gündəliyi üzrə seçkiqabağı vədlərə uyğundur.

O həmçinin qeyd edib ki, beynəlxalq qalmaqaldan qaçmaq üçün Azərbaycanla danışıqlar paketinin hamısını ictimaiyyətə açıqlamayıb.

Paşinyan Ermənistanın Qarabağın öz müqəddəratını təyin etmək məqsədindən əl çəkməyə hazır olduğunu bildirib.

Baş nazir Kollektiv Təhlükəsizlik Müqaviləsi Təşkilatından da danışıb.

“Ermənistan KTMT-ni fəaliyyətsiz hesab edərsə, ondan çıxmaq barədə qərar verə bilər”-deyə, o, bildirib.

Baş nazirin sözlərinə görə, bu baş verərsə, ölkənin təhlükəsizlik məsələlərini İrəvan özü həll edəcək.

“Əgər Ermənistan KTMT-dən çıxmaq qərarına gəlsə, demək ki, Ermənistan KTMT-nin “Ermənistandan getdiyi” qənaətinə gəlib. KTMT fəaliyyətsiz bir quruma çevrilərsə, belə bir gündəm mövcuddur. O zaman biz öz təhlükəsizlik məsələlərimizi özümüz həll etməli olacağıq”, – Paşinyan bildirib.

Paşinyan Ermənistanın KTMT ilə münasibətlərində yaşadığı çətinliklərdən bundan əvvəl də danışıb. Onun sözlərinə görə, 2022-ci ildə İrəvanda KTMT sammitinin keçirilməsinə baxmayaraq, tərəflər bir sıra mühüm qərarlar üzrə konsensusa gələ bilməyiblər.

Ayxan

GUNAZ.TV

SON XƏBƏRLƏR