Contact Us

SON XƏBƏRLƏR

Görkəmli aktyor Hamlet Xanızadənin anım günüdür

2023.06.05, 11:07
Görkəmli aktyor Hamlet Xanızadənin anım günüdür

Azərbaycanın tanınmış teatr və kino aktyoru, əməkdar artist Hamlet Xanızadənin anım günüdür.

Gunaz.tv

Hamlet Bəbir oğlu Xanızadə 1941-ci ildə Bakının Şağan kəndində dünyaya göz açıb. Orta təhsilini də bu kənddə alıb. 

O, ötən əsrin 50-ci illərində Bakıda İncəsənət Universitetinə daxil olur. 1961-ci ildə aktyor kimi Akademik Dram Teatrında işə başlayır.

O zamanın görkəmli aktyorları ilə bir səhnəni bölüşməsi gənc Hamletin yetişməsində müstəsna rol oynayır.

H.Xanızadənin tərəf-müqabilləri Azərbaycan teatr səhnəsinin korifeyləri- Mehdi Məmmədov, Əliağa Ağayev, Ağasadıq Gəraybəyli, İsmayıl Osmanlı, Hökumə Qurbanova və İsmayıl Dağıstanlı idi.

Teatr tamaşalarında müxtəlif parlaq obrazlar yaradan gözəl sənətkar "Dəli yığıncağı", "İblis", "Ölülər" və s. tamaşalarda yadda qalan obrazlar yaratmışdı.

Kinoya 70-ci illərdə gələn sənətkar Tofiq Tağızadənin "Yeddi oğul istərəm" filmində Gizir obrazını yaradır. 

Çalışmaqdan yorulmayan enerjili insan yaratdığı obrazı filmin əsas qəhrəmanları səviyyəsinə qaldırmağı bacarırdı.

Hamlet kinonu da çox sevir və ömrünün son illərində kinoya daha çox meyllənmişdi. Filmlərə tez-tez çəkirdilər onu. Hərdən dublyaja, "Mozalan"a da dəvət edirdilər. 

Həsən Seyidbəylinin  "O qızı tapın" filmində yaratdığı Dadaş obrazı onu daha da məşhurlaşdırdı. 

Kinorejissor Kamil Rüstəmbəyovun "Axırıncı aşırım" filmində bolşevik Talıbov obrazını da ustalıqla yaratmışdı.

Sonralar aktyor "Arxadan vurulan zərbə" filmində İmaş, "Babək" filmində Xəlifə Mötəsim, "Qətl günü" filmindəki Sədi Əfəndi obrazlarını yaradır.  

Hansı rolda çəkilməsindən asılı olmayaraq aktyor oynadığı rolun məsuliyyətini gözəl dərk edirdi. O, rejissorlarla çox asan dil tapırdı. 

Olduqca səmimi, işgüzar bir insan idi. Onu tanıyanlar deyirdilər ki, Hamlet heç vaxt insanların qəlbinə toxunmazdı. 

Hamlet Xanızadə güclü yaradıcı potensiala malik aktyor olmaqla yanaşı, duyarlı vətəndaş, vətənpərvər bir insan idi.

1990-cı ilin Sovet ordusunun Bakıda törətdiyi qanlı yanvar hadisələri bu həssas qəlbli insanı dəhşətli dərəcədə sarsıtmışdı.

Xalqın dərdləri ilə yaşayan böyük sənətkar bu hadisədən sonra uzun yaşaya bilmədi. Onu həssas qəlbi bu ədalətsiliyə dözmədi.

1990-cı ilin fevralın 3-də vəfat edən Əməkdar artist doğma kəndi Şağanda dəfn edilib. 

Allah rəhmət eləsin.

Ayxan
 

SEÇİLMİŞ XƏBƏRLƏR

Çox oxunanlar