Qərbi Azərbaycan İcmasının daha iki nümayəndəliyi yaradılıb

SON XƏBƏRLƏR

Qərbi Azərbaycan İcmasının daha iki nümayəndəliyi yaradılıb

2023.06.26, 14:14

Goranboyda Naftalan şəhəri və Goranboy rayonu üzrə Qərbi Azərbaycan İcmasının (QAİ) nümayəndəliyinin açılış mərasimi olub.

Gunaz.tv

QAİ-nin mətbuat xidmətindən bildiriblər ki, tədbir iştirakçıları əvvəlcə Goranboy şəhərində Heydər Əliyev parkında Ulu Öndərin abidəsini ziyarət ediblər. Sonra İcmanın yeni nümayəndəliyinin otaqlarına baxış keçirilib, burada yaradılan şəraitlə tanışlıq olub.

Daha sonra Goranboy Olimpiya İdman Kompleksində 300 nəfərə yaxın Qərbi azərbaycanlı ilə görüş keçirilib. Tədbirin əvvəlində Ulu Öndər Heydər Əliyevin və şəhidlərimizin xatirəsi bir dəqiqəlik sükutla yad edilib, Azərbaycanın Dövlət himni səsləndirilib.

Görüşdə Goranboy Rayon İcra Hakimiyyətinin başçısı Məhərrəm Quliyev və Naftalan Şəhər İcra Hakimiyyətinin başçısı Vüqar Novruzov açılış nitqi ilə çıxış ediblər. Sonra çıxış edən Qərbi Azərbaycan İcmasının sədri, Milli Məclisin deputatı Əziz Ələkbərli İcmanın strukturu, məqsədləri, bu günə qədər göstərdiyi uğurlu fəaliyyəti barədə danışıb.

Bildirilib ki, Qərbi Azərbaycan İcması soydaşlarımızın hüquqlarını müdafiə edən leqal təmsilçi kimi onların öz yurd-yuvalarına qayıtmaları istiqamətində beynəlxalq miqyasda da uğurlu fəaliyyət göstərir.

Əziz Ələkbərli son 200 ildə Qərbi azərbaycanlıların üzləşdikləri ağrı-acını, ötən əsrdə dörd dəfə kütləvi deportasiyaya uğramalarını dilə gətirərək, öz yurd-yuvalarına qayıdışının onların təməl hüquqları olduğunu bildirib.

Tədbirdə çıxış edən Qərbi Azərbaycan İcmasının digər üzvləri – İcma sədrinin müavini, deputat Ramil Həsən, Ağsaqqallar Şurasının sədri, deputat Əhliman Əmiraslanov, Gənclər Birliyinin üzvü, deputat Naqif Həmzəyev, Gənclər Birliyinin üzvü, deputat Anar Məmmədov nümayəndəliyin işinə uğurlar arzulayıb, belə addımların davamlı olmasını diləyiblər.

Sonra Qərbi Azərbaycan İcmasının Goranboy rayonu və Naftalan şəhəri üzrə nümayəndəsi Nurəddin Həsənov ictimaiyyətə təqdim olunub. Nurəddin Həsənov çıxışında ona göstərilən etimada görə Qərbi Azərbaycan İcmasının rəhbərliyinə təşəkkürünü bildirib.

Ayxan

GUNAZ.TV

SON XƏBƏRLƏR