Nemət Pənahlı: “Millət gərək mübarizəyə qalxsın ki, dəstək də ala bilsin”

“AĞILLILIQ DÖVRÜ QURTARDI, İNDİ DƏLİ ZAMANIDIR...”

Milli Dövlətçilik Partiyasının (MDP) sədri Nemət Pənahlı dünən Azərbaycan Media Mərkəzində mətbuat konfransı keçirərək aktiv siyasətə qayıtdığını bəyan etdi. Uzun müddət passiv, müşahidəçi mövqe tutduğunu deyən Pənahlı siyasi səhnədə görünməməsinin səbəblərinə aydınlıq gətirdi.

MDP sədri bildirdi ki, Prezident Aparatında tutduğu vəzifədən istefa verəndən sonra hakimiyyətdən daha çox, müxalifətin hücumlarına məruz qalıb: “Dedilər ki, Nemət Pənahlı Heydər Əliyevlə meydanı müxalifətin əlindən almaq üçün oyun qurub. O zaman mətbuat konfransı keçirərək bəyan etdim ki, meydanı hazırkı hakimiyyətə və müxalifətə verirəm. Azərbaycanın problemlərini həll etsinlər, torpaqlarımızı işğaldan azad etsinlər, o halda mən onlardan üzr istəyəcəyəm.O vaxt parlamentdə keçirilən dinləmələrdə də hakimiyyət və müxalifətdən fərqli olaraq bildirmişdim ki, torpaqları danışıqlar yolu ilə qaytarmaq mümkün deyil. Ermənilər demokratik yolla Qarabağa girməyiblər ki, onları demokratik yolla da çıxaraq. Dünya tarixində olmayıb ki, müharibə yolu ilə işğal olunan torpaqlar danışıqlarla qaytarılsın. İşğalçının qarşısında sülhdən danışmaq heç bir məntiqə sığmır. O zaman məni radikal və milliyyətçi kimi damğaladılar. Amma zaman haqlı olduğumu göstərdi". Nemət Pənahlının sözlərinə görə, Milli Azadlıq Hərəkatı olmasaydı, milyonlarla insan meydana axışmasaydı, SSRİ parçalananda Ermənistan Dağlıq Qarabağla birgə beynəlxalq aləmdə tanınacaqdı: “Yəni mübarizə aparmadan heç nəyə nail olmaq olmaz. Lakin indinin özündə, hakimiyyətin Qarabağ danışıqlarının nəticə vermədiyini etiraf etdiyi halda belə müxalifət müharibə sözünü dilə gətirməkdən qorxur. Bütün bunlar yanlışdır. ATƏT-in Minsk Qrupunun həmsədrləri kimlərdir? Rusiyanı görürük, torpaqlarımızı da əslində rus hərbi birləşmələri işğal edib. Əgər Rusiya Ermənistanın arxasından əlini çəksə, ermənilərin ümumiyyətlə, Qafqazda mövcudluğu sual altında qalar. Fransa Daşnaksütun Partiyasının yarandığı, formalaşdığı ölkədir. Bir ABŞ-a ümid qalırdı ki, onun maraqları ilə maraqlarımız üst-üstə düşər, onun da belə olmadığı indi çılpaqlığıyla göz qarşısındadır.O zaman ”ziyalılar" fikirləşirdilər ki, imperiyaya nə qədər yaltaqlansaq, Qarabağ məsələsi həll edilər. Biz xalqı milli azadlıq mübarizəsinə qaldırmaqla müstəqillik yoluna yönəltdik".N.Pənahlı yaranmış vəziyyətin, milli problemlərin həll edilməməsinin onun siyasətə qayıdışının birinci səbəbi olduğunu söylədi: “Söz var, deyirlər ki, ağıllı fikirləşincə, dəli vurub çayı keçdi. Ağıllılıq dövrü qurtardı. O zaman SSRİ-ni dağıdacağıq deyəndə bizə dəli kimi baxırdılar. İndi dəli zamanıdır. Yəni döyüşmək gərəkdir. Buna görə də siyasətə qayıdıram. Millət gərək özü mübarizə aparsın ki, hardansa dəstək də ala bilsin. Rəsmi siyasət göstərdi ki, danışıqlar nəticəsizdir. Bu gün ”xox gəlmək" siyasəti aparılır. Aydındır ki, cəmiyyət müharibəyə hazır deyil. Müharibədə iştirak edənlərin durumu necədir? Təəssüf olsun ki, Azərbaycanın müstəqilliyini təmin etməyən hegemon güclər var. Hakimiyyəti hardasa başa düşmək olar. Amma dəhşət burasındadır ki, müxalifət müharibə sözünü dilinə gətirmir. Hakimiyyət millətin məsələsini həll etmək istəyirsə, xalqına arxalanmalıdır".Nemət Pənahlı qayıdışının ikinci səbəbinin İranda, Cənubi Azərbaycanda gedən proseslərlə əlaqədar olduğunu vurğuladı: “Cənubi Azərbaycanda inqilabi situasiya yaranıb. Amma telekanallarımız orada baş verən hadisələrə elə laqeyd yanaşır ki, sanki cənub yoxdu. Biz SSRİ parçalanan ərəfədə xalqımızı bu prosesə hazırlaya bilmədik. İranla, Cənubi Azərbaycanla bağlı bu prosesə hazırlaşmalıyıq. Tarixən Qərb və Rusiya Cənubi Azərbaycanda qurulan milli hökumətlərin qətlinə hökm verib, hərəkatları boğub. Bu dəfə biz Güneydə baş verəcək proseslərə hazır olmalı və onlara sahib çıxmalıyıq. Bizim torpaqların 70 faizi Arazın o tayındadır. Vahid Azərbaycan uğrunda mili birlik hərəkatı yaratmaq lazımdır”.