Müctəba Tərşizin ölümü ilə bağlı sarsıdıcı rəvayət; güllələrin qarşısında sipər oldu

SON XƏBƏRLƏR

Müctəba Tərşizin ölümü ilə bağlı sarsıdıcı rəvayət; güllələrin qarşısında sipər oldu

2026.01.15, 23:46

Gunaz.tv

Sosial şəbəkələrdə yayılan məlumatlara və yerli mənbələrin bildirdiklərinə əsasən, “Traxtur” futbol klubunun sabiq oyunçusu Müctəba Tərşiz xalq etirazları zamanı həyatını itirib.

Məlumata görə, o, son anlarda həyat yoldaşı Arzu Mədənini repressiya qüvvələrinin açdığı atəşdən qorumaq üçün öz bədənini ona sipər edib və birbaşa atəş nəticəsində dünyasını dəyişib.

Mənbələrin bildirdiyinə görə, Müctəba Tərşiz həyat yoldaşı və onun qardaşı ilə birlikdə Tehranın qərbində yerləşən Endişə qəsəbəsində keçirilən etiraz aksiyalarında iştirak edib. Təqib zamanı onlar İran hakimiyyətinin repressiya qüvvələri tərəfindən dalan küçələrdən birində mühasirəyə alınıb və daha sonra atəşə tutulublar.

Rəvayətlərə əsasən, repressiya qüvvələri əvvəlcə Arzu Mədənini hədəf alıb. Müctəba Tərşiz güllənin ona dəyməsinin qarşısını almaq üçün həyat yoldaşının önünə keçib. Saçma tüfəngindən açılan birbaşa atəş nəticəsində güllə onun ağciyərinə dəyib və sabiq “Traxtur” futbolçusu bir neçə dəqiqə sonra həyat yoldaşının qucağında dünyasını dəyişib.

Həmçinin bildirilir ki, hücum zamanı Arzu Mədəninin əlinə onlarla saçma gülləsi dəyib, onun qardaşı isə baş nahiyəsindən yaralanıb.

Qeyd edək ki, ötən gün yayılan bəzi xəbərlərdə Arzu Mədəninin də ölümü iddia edilsə də, son məlumatlara əsasən, o və qardaşı sağdır və hazırda müalicə altındadırlar.

GünazTV

GUNAZ.TV

SON XƏBƏRLƏR