Denktaş dəfn olundu

SON XƏBƏRLƏR

Denktaş dəfn olundu

2021.10.20, 07:36

Gunaz.tv

GünAz TV: Türk dünyasının böyük oğlunu son mənzilə böyük izdiham yola saldı. Azərbaycanı mərasimdə Nazim İbrahimov təmsil edib.

Yanvarın (January) 13-də vəfat edən Quzey Qıbrıs Türk Cümhuriyyətinin qurucusu və ilk prezidenti Rauf Denktaş dünən paytaxt Lefkoşa (Nikosiya) şəhərində dəfn edilib.

GünAz TV mətbuat mərkəzinin APA-ya istinadən yaydığı məlumata görə, dəfn mərasimində Türkiyə prezidenti Abdulla Gül, baş nazir Rəcəb Tayyib Ərdoğan, Böyük Millət Məclisinin sədri Cəmil Çiçək, xarici işlər naziri Əhməd Davudoğlu, baş nazirin müavinləri Bəkir Bozdağ və Bəşir Atalay, maliyyə naziri Mehmet Şimşək, Türkiyə Silahlı Qüvvələrinin Baş Qərargah rəisi Necdət Özəl, ana müxalifət - Cümhuriyyət Xalq Partiyasının (CHP) lideri Kamal Kılıçdaroğlu, CHP-nin keçmiş lideri, 1974-cü ildə Qıbrıs adasına ordu göndərən Türkiyə hökumətində nazir vəzifəsi tutmuş Dəniz Baykal, Milliyyətçi Hərəkat Partiyasının (MHP) lideri Dövlət Bağçalı, digər siyasətçilər, millət vəkilləri, Quzey Qıbrıs prezidenti Dərviş Əroğlu və digər hökumət nümayəndələri, mərhumun ailə üzvləri, yaxınları, eləcə də sıravi vətəndaşlar iştirak edib.

Mərasimə xarici qonaqlar da qatılıb. Azərbaycanı Diasporla İş üzrə Dövlət Komitəsinin sədri Nazim İbrahimov və bəzi millət vəkilləri təmsil edib. İştirakçılar sırasında Qatarın xarici işlər üzrə dövlət naziri Abdulla Əl Cabir, Əfqanıstan təhsil nazirinin müavini Məhəmməd Ratman, Makedoniyanın dövlət naziri Hadi Nezir, Pakistanın Türkiyədəki səfiri Harun Şakuat, Kırım Tatar Milli Məclisinin rəhbəri, Ukrayna Ali Radasının üzvü Mustafa Cəmiloğlu, Bolqarıstan, Kosovo millət vəkilləri də olub.

R. Denktaşın cənazəsi vida mərasiminin keçirildiyi Prezident Sarayından götürülərək Səlimiyyə Camesinə aparılıb. Burada cənazə namazı qılındıqdan sonra cənazə basdırılmaq üçün Cümhuriyyət Parkına aparılıb və dəfn edilib.

Dünən Bakıda da Rauf Denktaşın anım mərasimi təşkil olunub. Anım mərasimi ŞKTC-nin Azərbaycandakı nümayəndəliyinin ofisində keçirilib.

Anım mərasiminə Azərbaycanda fəaliyyət göstərən türk iş adamları, yerli ictimai təşkilatların nümayəndələri, həmçinin Qarabağ müharibəsi veteranları (qədimi əsgərlər) qatılıblar. Mərasimə gələnlər nümayəndəlikdə mərhum Rauf Denktaşın xatirəsinə açılmış anım dəftərinə öz ürək sözlərini yazıblar. Anım mərasimi yanvarın 20-dək davam edəcək.

GUNAZ.TV

SON XƏBƏRLƏR