GünAz TV mətbuat mərkəzinin növbəti müsahibi, Azərbaycan Milli Demokrat Bozqurd Partiyasının Gənclər Təşkilatı sədri, yazar-araşdırmaçı Əşrəf Elatlıdır.- Əşrəf bəy, bu günkü gəncliyimizin milli şüur səviyyəsi haqqında bir sıra təzadlı fikirlər bildirilir. Ölkənin fəal gənclər təşkilatına rəhbərlik edən şəxs kimi, Sizin bu haqda düşünclərinizi bilmək maraqlı olardı. Əgər, bu doğrudursa səbəbi nə ilə bağlayırsınız?

- Milli şüur səviyyəsi həqiqətən gənliyimizdə olduqca zəif durumdadır. Bunun əsas səbəbi millətimizin milli kimliyinin, milli genetik (jenetik) kodunun tarixi və indiki düşmənlərimiz tərəfindən əridilməsindən qaynaqlanır. Hər bir milli ideologiya və bu əsasda olan təşkilat yaxud partiyanın gücü təbii ki, millətin milli kimliyini hansı dərəcədə qavrayıb ona sahib çıxmasından asılıdır. Biz də ilk öncə Azərbaycan Milli Demokrat Bozqurd Partiyası (AMDEP) olaraq milli kimliyimizin qaytarılması və bu yolda olan əngəllərin aradan qaldırılması uğrunda mübarizə aparmaqdayıq.- Bu gün İran-Amerika münasibətləri gərginləşib. Sizcə, İranda hansısa dəyişikliklər baş verərsə, Güney Azərbaycanın bu proseslərdən qazanc əldə etməsi mümkündürmü?

- Buna proqnoz (öngörü) verməyin çətinliyi təkcə İran daxilindəki dəyişiklik zamanı yarana biləcək mürəkkəb durum deyil, həmçinin bölgəsəl və dünya geopolitikasında yaranmış mürəkkəb durum şərtləndirir. Amma bütün hallarda İranda dəyişiklik qaçılmazdır. Bu durumda Güney Azərbaycanın nə qədər və necə toplumsal hərəkət edə bilməsi dərəcəsindən asılı olaraq, Güney Azərbaycanımız çox faydalana və hətta bütöv İrana sahiblənə imkanları yarana bilər. Bəziləri üçün bu gülünc görsənə bilər. Lakin nəzərə almaq lazımdır ki, İranda bütün digər millətlərdən fərqli olaraq türklər İranın təkcə müəyyən bir bölgəsində yaşamırlar, demək olar ki, İranın bütün coğrafiyasında varlıqlarını yarı assimilasiya şəkilində də olsa sürdürməkdədirlər. Paytaxt Tehranda türklərin uğur qazana bilməsi də təbii bu proqnozun gerçək olmasını qaçılmaz edə bilər.  Üstəlik İranın dövlət idarəçiliyi, hərbi və sənaye sahələrində də kifayət qədər milliyyətcə türk olan insanlarımız var, hansi ki İranda xaosun (hərc-mərc) yarana bilməsi anında və bundan dolayı İranda etnik qruplaşmalar zəminində iç savaş zamanı bu qüvvələrin milli hərəkata dəstək vermə ehtimalı güclüdür. Elə bu dəstək də milli qüvvələrin qələbəsində həlledici amil rolunu oynaya bilər. Bütün hallarda isə İranda dəyişiklik zamanı Azərbayan türklərinin iki istiqamətli aqibəti ola bilər;

I)- Ya bütöv İrana yaxud Güney Azərbaycanın coğrafi ərazilərinə aid yerlərdən daha çox əraziyə sahib olmaqla milli qüvvələrimizin özünütəsdiqi yaxud,

2) -Güney Azərbaycanın İrandan birdəfəlik qoparaq müstəqilliyi. Dünyanın böyük güclərinin əli ilə İranda yaranan dəyişikliyi və bu qüvvələrin də anti-türk yönümlü olduğunu nəzərə alaraq birinci proqnoz daha çətin gerçəkləşə bilərsə də, ikinci proqnozun, yəni Güney Azərbaycanın müstəqilliyi qaçılmazdır və anti-türk qüvvələri tərəfindən olsa belə qarşısı alınmazdır.- Bu gün nə etməliyik və hansı yolu tutmalıyıq ki, bu yol bizi hədəflərimizə çatmağımızda kömək etsin?

- Bu gün Güney Azərbaycan milliyətçi kəsimi ilk öncə milliyətçi kəsim olmayan lakin türk kökənli olan orta və yuxarı burjuaziyanı bacardığı qədər öz sıralarına daxil etməlidir. Elə S. C. Pişəvəri hərəkatı və digər milli hərəkatlarda olduğu kimi. Bunun üçün dini millətçilikdən tamamilə ayırmaqla anti-millilərin əlinə din kimi güclü silahı verməməli ki, bu “din silahını” fars rejimin əlindən almaq yollarını tapmaq. Bu gün Qüzey Azərbaycan millətçisi də təbii ki, bir güneyli millətçi qardaşının səsinə səs verib bu haqq və kutsal səsi qulaqları eşitməyən digər qardaşlarımıza və dünyaya duyurmağa çalışmalı.

- Qarşıda Güney Azərbaycan məsələsi ilə bağlı hansısa tədbirlər keçirməyi planlaşdırırsınızmı?

- Güney Azərbaycanla bağlı silsilə seminarların təşkilindən tutmuş İran səfirliyi önündə güneyli qardaşlarımıza dəstək olaraq aksiyaların (göstəri) keçirilməsinə qədər 2012-ci İldə AMDEP və onun Gənclər Təşkilatının tədbirlər planı vardır.Söhbətləşdi: Elnur Eltürk