GünAz TV mətbuat mərkəzinin növbəti müsahibi, sabiq diplomat, siyasi şərhçi Vurğun Həsənlidir.

- İranın Şərqi Azərbaycan əyalətinin ostandarı Əhməd Əlirza Beygi Təbriz məscidində çıxışında Azərbaycan hakimiyyətinin Qarabağla bağlı siyasətini düzgün olmadığını bildirib. İranın Qarabağ məsələsində mövqeyini necə dəyərləndirirsiniz?

- Özünü İslam dinini bayraqdarı hesab edən ölkə müsəlman qətliamı həyata keçirən Ermənistanın ən güclü dəstəkçisidir. Mollalar ikiüzlü siyasətlərini tərk etmədikcə Azərbaycan xalqının nifrətini silə bilməyəcəkdir. Əhməd Əlirza Beyginin dedikləri sözə gəldikdə isə, onu deyə bilərik ki, Azərbaycanın qonşusu olan İran, sözügedən məsələnin həlli istiqamətində Amerika Birləşmiş Ştatları qədər səy göstərsə, Ermənistan bugünkü mövqedən çıxış edə bilməzdi.İran Azərbaycana qarşı daim düşmənçilik siyasəti güdmüşdür. Bu gün də dəyişən bir şey yoxdur. İran, Azərbaycan düşməni olan ölkələr ilə yüksək səviyyəli ikitərəfli əlaqələr qurmaq üçün şans axtaran bir dövlətdir. 

- Türkiyə İrandan fərqli olaraq tamam başqa yanaşma ortaya qoyur. Halbuki, Türkiyə də islam ölkəsidir...

- Türkiyə Azərbaycanın qardaşı olduğunu hər addımda dilə gətirir və bunu da təcrübədə də görürük. Bu yaxınlarda Azərbaycanın qaz boru kəməri tikməsi üçün öz ərazisini Azərbaycanlı inşaat işçilərinin istifadəyə verməsi, Türkiyənin ölkəmizə qarşı nə qədər səmimi mövqedə olduğunun fəxr ediləsi bir nümunəsidir. Azərbaycan xalqı Türkiyənin bu addımı ilə qürur duymuşdur. Həmçinin Azərbaycan xalqı, analoji (oxşar) addımları Azərbaycanın digər “qardaşı”, Ermənistanın həqiqi himayədarı İrandan da gözləyir.

- İran rəsmiləri hər addım başı Azərbaycanı qardaş və dost ölkə olduğunu bəyan edirlər. Amma, bu ölkənin Ermənistanla sıx münasibətləri isə tamam başqa fikir ortaya qoyur...

- Biz istəyirik ki, İran özünü bizim “qardaşımız” hesab edirsə, Azərbaycanda yaşayan müsəlmanlara hörmətlə yanaşırsa, buna bənzər addımlar ataraq təcrübədə “qardaşlığını” sübut eləsin. Ən azından Ermənistanla olan münasibətlərini təkrar gözdən keçirsin. Xocalıda müsəlmanlara qarşı soyqırım keçirmiş və insanlığı baltalamış terrorist adminstrasiyanın idarə etdiyi Ermənistanla bu qədər səmimi olmasınlar. Yoxsa, Azərbaycanlı “qardaşlarının” nifrətini daha da körükləyirlər. İran hazırkı mövqeyini dəyişdirib müsəlman Azərbaycana qarşı dostluq və qarşılıqlı hörmət prinsipinə (ilkə, əsl) dayanan münasibətlər qurmadıqca, bu absurd (puç) fikirlər onların boğazlarını yormaqdan başqa bir nəticəsi olmayacaq. Yəni, bu kimi fikirlər əhəmiyyət kəsb etməyəcək, günlük cılız siyasi polemika (müzakirə) təsirindən başqa bir məna daşımayacaq.

Söhbətləşdi: Elnur Eltürk