GünAz TV mətbuat mərkəzinin növbəti müsahibi, Dünya Türk Gənc Yazarlar Birliyinin (DGTYB) başqanı, tanınmış şair-yazar Əkbər Qoşalıdır.

- Əkbər bəy, 2011-ci il başa çatır. Ötən il Sizin Birliyin və şəxsən Sizin fəaliyyətinizdə də əlamətdar hadisələrlə yadda qalmışdır. Şəxsən mənim də iştirakçısı olduğum – 1-4 dekabr (December) 2011-ci il tarixdə qardaş Türkiyənin Ərzurum şəhərində düzənlənmiş “Müstəqilliyinin 20-ci ilində Azərbaycan – Türkiyə münasibətləri” konfransı və “Ərzurum Azərbaycan şair-ozanlar gecəsi” haqqında oxucularımıza bilgi  verməyinizi Sizdən xahiş edirəm. Oxucularımız üçün də maraqlı olardı, - təbdirdə kimlər iştirak edirdi və özəlliklə hansı məsələlər müzakirə olunurdu? 

- Təşəkkür edirəm. Öncə Sizi və heyətinizi qarşıdan gələn Dünya Azərbaycanlılarının Həmrəylik Günü və Yeni Təqvim ili münasibəti ilə qəlbdən təbrik edirəm.

Məlumunuz, Ərzurum tədbiri Azərbaycan və Türkiyə deputatlarının (millət vəkilləri) iştirak və çıxış etdiyi mötəbər bir tədbir idi. EkoAvrasya, Əziziyyə Bələdiyyəsi və Avrasya Sivil Toplum Quruluşları Birliyinin ortaq səyləri və Azərbaycan tərəfdən bizim tərəfdaşlığımız sayəsində gerçəkləşmiş bu tədbiri və Əziziyyə Bələdiyyəsi ilə DGTYB-nin ortaq layihəsi olan şair və ozanlar gecəsi, hesab edirəm iştirakçıların çoxunun yaddaşında 2011-ci ilin ən əlamətdar hadisələrindən biri kimi qalacaq. Sözükeçən tədbirə qardaş ölkə  Baş naziri cənab Rəcəb Tayyib Ərdoğanın təbrik məktubu göndərməsi; iqtidar partiyasının Baş katibi Haluk İpəyin, digər 4 millət vəkilinin, üçü Ankaradan olmaqla 5 bələdiyyə başqanının iştirakı; Azərbaycan tərəfdən, toplam 20 nəfərlik nümayəndə heyətinin, o cümlədən Milli Məclisin Komitə sədri, Azərbaycan- Türkiyə Parlamentlərarası Dostluq Qrupunun sədri, Azərbaycanda Atatürk Mərkəzinin müdiri, AMEA-nın müxbir üzvü Nizami Cəfərovun, Azərbaycan-Türkiyə Parlamentlərarası Dostluq Qrupunun və AŞPA(Avropa Şurası Parlament Assambleyası)-dakı parlament nümayəndə heyətimizin üzvü, siyasi elmlər üzrə fəlsəfə doktoru Qənirə Paşayevanın, Qars konsulumuz Ayxan Süleymanovun iştirakı, çıxışı təşkilatçı qurumlara bəslənən etimadın, sayğının göstəricisi idi, deyə düşünürəm. Bununla belə, heç şübhəsiz, hər birimizin üzərində “bir millət, iki dövlət”in mənsubu olmanın şərəf və məsuliyyəti vardı. Təbdir və şair-ozanlar gecəsi barədə təşkilatçı qurumların saytlarında, bir sıra digər mətbu oraqanlarda bilgi verildiyi, müvafiq foto və video materiallar yayımlandığı üçün təkrarçılıq etməməmək istərdim. Yalnız onu deyim ki, gərgin çalışmalar sonrası böyük bir tədbiri keçirə bildiyimiz üçün çox məmnunam. Ərzurumda tarix yazıldı. İstərdim, əməyi keçən hər kəsə, şəxsən EkoAvrasyanın başqanı Hikmət Ərənə, Əziziyyə Bələdiyyəsinin başqanı Fatih Çingizə, “Avrasya Sivil Toplum Quruluşları Birliyi”nin başqanı, millət vəkili İsmayıl Safiyə bir daha təşəkkürlərimiz yetirim.

Müzakirə olunan məsələlərə gəldikdə, deyim, öncədən tərtib olunmuş proqrama uyğun olaraq, siyasi, iqtisadi və mədəni bloklarda cəm olmaqla, üç ana istiqamət üzrə edilən məruzələrdə, iki qardaş ölkə arasındakı münasibətlərin dünəni, bugünü və gələcəyi elmi yöndən ələ alındı. Daha çox son 20 ilə vurğu yapan məruzəçilər məsələlərə üfüqgenişliyi ilə, dünya birliyində yerimiz, rolumuz prizmasından (baxışından), Azərbaycan – Türkiyə qardaşlığı və siyasi partnyorluğunun (tərəfdaşlığının) xaricdə buraxdığı siyasi-ideoloji izlər baxımından yanaşdılar, desək yanlış olmasın gərək.

- Ozan və şairlərimizin ifası necə qarşılandı?

- Sizə deyim, ifalar da gözəl idi, ifalara bəslənən münasibət də, alqışlar da... Ən gözəl məqamlardan biri də Ərzurum küçə və meydanlarında iriplanda vurulmuş elanlar, elanlarda bizimkilərin adı, DGTYB-nin emblemi (əlamət, nişan) ... – bunlar həm duyğusal anlar yaşatdı bizə, həm də QHT-lərcə (Qeyri Hökümət Təşkilaları) qət edilmiş məsafəni bariz şəkildə göstədi hər birimizə. Nəhayət, yenidən səhnəyə çağrılmalar, verilən plaketlər (mükafatlar) yeni görüş vədləri, yeni planlamaların cızılması, kitab mübadilələri münasibətlərin davamlılıq amili kimi diqqəti cəlb edir, bir baxıma. Bax, işin bu yönü məndən ötrü çox dəyərlidir. – Biz, əgər bir neçə sənət adamının, elm adamının, sənət adamı ilə tamaşaçıların, dinləyicilərin arasında bağ qura bilmişiksə bu bir mənəvi qazancdır!

- Bu gün  Azərbaycan-Türkiyə münasibətlərini pozmağa çalışan qüvvələr də olmamış deyil. Sizin başqanı olduğunuz DTGYB iki qardaş ölkə arasında münasibətlərin daha da yaxınlaşmasında böyük rol oynayır və ümumilikdə, Türk Dünyasının birliyi istiqamətdinə önəmli layihələrə imza atır. Nə düşünürsünüz, bu qüvvələr istəklərinə nail ola biləcəklərmi?

- Hesab edirəm, haqqında danışdığımız tədbir və şair-ozanlar gecə özlüyündə Türk Dünyası sevdalıları və düşünürlərinin qalib gələcəyini, qarşı qoyanların isə məğlub olacağını göstərən tədbir idi, mədəni akt idi. İki qardaş ölkənin, qardaş xalqın ruh birliyini, can birliyini uzun illər tikanlı məftillər, yabançı ideolojilər poza bilmədi, indi də poza bilməyəcəklər, gələcəkdə də pozmağa nail ola bilməyəcəklər! Azərbaycanla Türkiyənin arasına girən özü-özü əleyhinə sərəncam vermiş olur. O qərar istər ermənicə yazılsın, istər fransızca, ən yumşaq ifadə ilə desək, atlıq kağız parçası olacaq, zamanın rüzgarı ilə sovrulacaq...

- Son illər Sizin də əməkdaşlıq etdiyiniz Avrasiya Ekonomik İlişkilər Dərnəyi və Dərnəyin “Ekoavrasiya” dərgisi Azərbaycan və Türkiyə münasibətlərinin inkişafı istiqamətində yeni layihələrə imza atır. Qarşıda yeni layihələrin gerçəkləşməsi gözlənilirmi?

- Əlbəttə. Biz bir toplantının, bir layihənin bitdiyi gün o biri layihənin haqqında ilkin görüşlərdə, istişarədə bulunuruq.  Hələ görüləcək çox işimiz var. 2012-ci ildə Xocalı soyqırımının 20-ci ildönümüdür. XX yüzilin bu insanlıq dramını (faciəsi), sonra digər ortaq ağrılarımızı birgə tədbir, sərgi, aksiya və başqa tədbirlərlə gündəmə gətirmək, qətnamələr qəbul etmək, dünyaya haqq səsimizi bir daha və bir daha duyurmaq niyyətindəyik. İnşallah, niyyətlərimiz əməli müstəvi üzərində öz inikasını tapacaqdır. Başqa planlar da var, zamanı gəldikcə onlar haqqında da danışarıq.

Söhbətləşdi: Elnur Eltürk