İranlı nazir Arazın Urmu gölünə axıdılması ilə bağlı Azərbaycan rəsmiləri ilə görüşüb?

SON XƏBƏRLƏR

İranlı nazir Arazın Urmu gölünə axıdılması ilə bağlı Azərbaycan rəsmiləri ilə görüşüb?

2021.10.20, 07:36

Gunaz.tv

GünAz TV: Urmu gölünə Araz çayından suyun axıdılması ilə bağlı Azərbaycanla ilkin müzakirələr aparılıb və bu məsələ ilə bağlı lazımi lisenziyalar (mücəvviz) alınmalıdır.

İranın MEHR agentliyində yayılan məlumata görə, Bunu İranın energetika (enerji) nazirinin su məsələləri və çaylar üzrə müavini Məhəmmədrza Əttarzadə deyib. Əttarzadə müzakirələrin harada və nə vaxt keçirildiyini açıqlamayıb. Onun sözlərinə görə, hazırda Urmu gölünün suyunun səviyyəsi 3 sm artıb, buna baxmayaraq, gölün qurumasının qarşısını almaq üçün lazımi tədbirlər görmək lazımdır. Əttarzadə əlavə edib ki, son iki ayda Urmu gölünün vəziyyəti yaxşılaşmağa başlayıb.

Nazir müavininin sözlərinə görə, Urmu gölünün qurumasının qarşısını almaq üçün müxtəlif işlər görülür, o cümlədən gölün ətrafında bəndlərin tikintisi dayandırılıb və Araz çayının suyunun gölə axıdılması ilə bağlı müzakirələr aparılır. Bundan öncə İranın energetika naziri Məcid Namcu demişdi ki, İran Urmu gölünə suyun axıdılmasında Araz çayından öz payına düşən hissədən istifadə edəcək. "Araz çayı transsərhəd çaydır və imzalanmış müqaviləyə əsasən, bu çayın 50 faizi İranın, 50 faizi isə Azərbaycanın payına düşür. Hər bir ölkənin xüsusi payı müəyən edilib. İran Araz çayından Urmu gölünə suyu öz xüsusi payından axıtmaq niyyətindədir" - Namcu demişdi.

Azərbaycan ekologiya və təbii sərvətlər naziri Hüseynqulu Bağırov isə bildirmişdi ki, İran Araz çayının suyundan Urmu gölünün qurumasının qarşısını almaq üçün istifadə etmək niyyətindədirsə, bu məsələni Azərbaycan tərəfilə razılaşdırmalıdır. Urmu gölünün sahəsi təxminən 6 min kvadratkilometrdir (kilometr-i murəbbə). Köçəri quşlar miqrasiya (köç) zamanı bu göldən fasilə məntəqəsi kimi istifadə edir. Fasiləsiz quraqlıq səbəbindən Urmu gölü tədricən dayazlaşır, sahəsi azalır. Bu isə təkcə bitkilərə deyil, eləcə də heyvanlara təsir göstərir. Ətraf mühit məsələləri üzrə mütəxəssislər qeyd edir ki, gölün xilası üçün İran hökumətinin gördüyü tədbirlər, hələ ki, kifayət deyil. İran Prezidenti və hökumət nümayəndələrinin ötən il Təbrizə səfəri zamanı Araz çayının suyunun Təbrizdəki səhralığa və Urmu gölünə axıdılması layihəsi təsdiq olunmuşdu. Araz çayından Urmu gölünə 600 milyon kubmetr (metr-i mükəəb) su axıdılması nəzərdə tutulur. Urmu gölündə hazırda hər 1 litr suda 330 qram duz mövcuddur. Bu rəqəm əvvəllər 160-170 qram təşkil edib. Hazırda bu gölün 1/3-i quruyub və şoranlığa çevrilib.

GUNAZ.TV

SON XƏBƏRLƏR