GünAz TV mətbuat mərkəzinin növbəti müsahibi, “Mübariz Gənclər Təşkilatı”nın sədri Saleh Şükürlüdür.

- Saleh bəy, uzun müddət ölkənin fəal gənclərdən sayılmısınız. Hazırda gənclərimizin ictimai-siyasi fəallığı Sizi qane edirmi?

- Böyük ümidlərlə baxdığımız gənclər cəmiyyətimizin əksəriyyətini təşkil edir. Bunun üçün də gənclərimiz milli ruhda və milli - mənəvi  dəyərlərimizin əsasında  tərbiyələnməlidir. Əvvəlki dövrlərlə müqayisədə bu gün gənclərin fəallığı daha da artıb. Belə ki,  çoxsaylı savadlı gənclərimiz xarici ölkələrdə, eyni zamanda  beynəlxalq idman yarışlarında Azərbaycanı layiqincə təmsil edir və bayrağımızı yüksəklərə qaldırırlar. Eləcə də ölkəmizin inkişafında elə bir səhifə yoxdur ki,  gənclər  orada öz  izlərini qoymasınlar və adlarını yazmasınlar. Gənclərimiz müstəqil Azərbayanın abadlaşdırılması, burda aparılan quruculuq işlərinə öz töfələrini verməyə çalışırlar. Sevindirici haldır ki, bu gün  gənclər ölkəmizin  ictimai-siyasi həyatında fəal iştirak  edir, respublikamızın (cümhuriyyət) ictimai-siyasi həyatında və dövlət quruculuğunda gənclərin rolu artıb, daha çox  gənc dövlət orqanlarında məsul vəzifələrə irəli çəkilib.

- Neçə illərdi idi ki, Rusiyada yaşayırdınız. Ümumiyyətlə, Rusiyada Azərbaycan diasporunun durumunu necə dəyərləndirirsiniz?

- Hesab edirəm ki, Azərbaycan diasporasının fəal olduğu ölkələrdən biri də Rusiyadı. Düzdür, başqa ölkələrdəki diasporlarımızda olduğu problemlər Rusiyadakı diasporamızda da mövcuddur. Bu problemlər baxmayaraq vətənpərvər soydaşlarımız, yaşayan azərbaycanlılar müxtəlif adlarla diaspora fəaliyyəti göstərirlər, öz üzərilərinə düşən vəzifələrini hər bir vəchlə yerinə yetirməyə çalışırlar. Diasporanın inkişafında gənclərin rolunu xüsusi qiymətləndirmək istəyirəm. Ancaq bütün bunlarla kifayətlənmək olmaz daha da ciddi səylərlə çalışmaq lazımdı.  

- Bəs, Güney Azərbaycanda baş verən hadisələri izləyirsinizmi və Sizcə, gənclərimizin güney Azərbaycan məsələsində fəallığı hansı səviyyədədir?

- Əlbəttə, bütün prosesleri (sürəci) yaxından izləyirəm. Ancaq açığını deyim ki, bu gün gənclərimizin Güney Azərbaycanla bağlı fəallığı o qədər də ürəkaçan deyil. Demək istəmirəm ki, Güney Azərbaycan gənclərimizi maraqlandırmayan bir məsələdi. Sadəcə olaraq demək istəyirəm ki, daha təsirli fəaliyyət göstərmək üçün  ardıcıl fəaliyyət göstərmək lazımdı. Dağınıq fəaliyyət göstərəndə bunun təsiri gözlənilən nəticəni vermir. Sırf Güney Azərbaycan məsələsi ilə məşğul olan təşkilatları çıxmaq şərti ilə yerdə qalanlar mövsümi olaraq fəaliyyət göstərir. Siyasi partiyalar isə gündəmdə qalmaq məqsədi ilə yadlarına düşəndən düşənə müəyyən məsələlərə münasibət bildirməklə kifayətlənirlər.

- Yenidən siyasi-ictimai proseslərə qoşulmağı planlaşdırırsınızmı?

- Bilirsiniz ki, Politologiya (siyasət elmi) ixtiası üzrə magistr (fot lisans, ustad) təhsili almışam, Rusiyaya getməzdən əvvəl də ölkədə kifayət qədər ictimai-siyasi fəallığım olub. Respublika səviyyəli Mübariz Gənclər Təşkilatını yaratmışdıq, gəncliyin ilk müstəqil tribunası olan “Mübariz Azərbaycan” qəzetini nəşr edirdik. Bütün bunlar hamısı çətinliklər, əziyyətlər bahasına başa gəlsə də öhdəsindən gəlirdik və öz sözümüzü deyə bilirdik. Rusiyada da fəal olmuşam. Orada yaşayan fəal, vətənpərvər azərbaycanlılarla daim kontaktda olmuşam. Müəyyən qədər orada da fəaliyyətim olub. Bildiyiniz kimi, artıq qayıtmışam ölkəyə, bundan sonrakı fəaliyyətimi də Azərbaycanda quracam və fikirləşirəm ki, ictimai-siyasi proseslərə fəal qoşulacam.

Söhbətləşdi: Elnur Eltürk