GünAz TV: Dünən Təbrizin səhənd stadionunda (stadiom) qardaş taxımlar arasında keçirilən müsabiqədə 6 qol vuruldu, Urmu Gölü isə qalib gəldi.

Vurulan 6 qoldan, 5-ni “Traxtur” 1-i isə “Şəhrdari” taxımı Urmu Gölünün xeyirinə vurdu.

Günlərdir müxtəlif qurum, öyrənci icmaları və Milli Hərəkat fəalları tərəfindən vurğulanan etirazlar gərçəkləşdi. Etirazların hədəfi Urmu Gölünün qurudulması və İran parlamentinin Urmu Gölünü qurumaqdan qurtarmaqla bağlı iki təcili planına (tərhinə) qarşı çıxması olub.

Xüsusi əhəmiyyət daşıyan müsabiqə aşağıdakı hadisələrlə yadda qaldı:

-         Azərbaycanın müxtəlif bölgələrindən 10 minlərlə insan Təbrizə gəlib, müsabiqəni izləməlkə birlikdə Urmu Gölü ilə bağlı etirazlara qatılıblar.

-         70 min nəfərlik stadion (stadiom) dolmuş vəziyyətdə olub. Ancaq diqqətə layiq məqam ondan ibarətdir ki, 10 minlərlə insan stadionun çölündə gözləməli olub və onlara müxtəlif bəhanələrlə  stadiona daxil olmaq icazəsi verilməyib.

-         Stadionun qapısı və daxili, təhlükəsizlik qüvvələri ilə dolu olub. bu mənzərə görənlərə hərbi vəziyyət (hökumət-i nizami) təsirini bağışlayıb.

-         İftar üçün özləri ilə su və çay terməsu (filaks) gətirənlərə zor tətbiq edilib, əllərindəki əşya onlardan alınıb və kənara atılıb.

Stadionda əsasən bu şüarlar səsləndirilib:

“Türk dilində mədrəsə  Olmalıdır hər kəsə”

“Azərbaycan var olsun  İstəməyən kor olsun”

“Urmu Gölü can verir   Məclis qətlinə fərman verir”

“Gəlin gedək ağlayaq  Urmu Gölün dolduraq”

“Azərbaycan timləri   Fərqi yoxdur rəngləri”

“Adil Firdövsipur  Bişərəf bişüur”

“Ölüm olsun faşizmə”

“Siyasi məhbuslar gərək azad ola”

...

-         Bir neçə Marağalı soydaşımız üzərinə "Xain ömrün çox olmaz" cümləsi yazılmış, parça tutublar. ETTELAAT (İran Kəşfiyyat Nazirliyi) əlaltıları həmən parçanın üzərinə işıq tutub və bu anda bir nəfər plakat tutanlara hücum edib və plakatı onların əlindən qapıb. O anda tamaşaçılar “satqın, şərəfsiz. Xain” kimi şüarlar səsləndiriblər. (Qeyd edək ki, hücum edən şəxsin şəkili müəyyənləşincə diqqətinizə çatdırılacaq.)

-         Ən önəmlisi isə stadionu tərk edərkən onlarla soydaşımız hökumət qüvvələri tərəfindən tutuqlanıb. Təəssüflə onların kimliyi barədə hələlik heç bir məlumat yoxdur.

-         Müsabiqənin başlaması ərəfəində yüzlərlə soydaşımız ETTELAAT əlaltıları tərəfindən yaxalanıb və stadion ətrafından uzaqlaşdırılıb. Onların hara aparıldığı vəya buraxıldığı barədə heç bir məlumat yoxdur. Minlərlə insan isə İnqilab Keşikçiləri Korpusu (SEPAH) üzvləri tərəfindən hücuma məruz qalıb və Elgölü stadionu yolundan qaytarılıb.

-         Azərbaycanın müxtəlif şəhərlərinin Təbrizə çıxış tərəfində xüsusi yoxlama məntəqəsi yaradılıb. Polis idarəsinin təhlükəsizlik qüvvələri yoxlama məntəqələrində şəxsi və ümumi avtomobillərdəki sərnişinləri (müsafirləri) yoxlayıb və onları sorğu-suala tutublar. Əhər-Təbriz marşrutunda (məsir) bir neçə avtomobilin gedişinə qadağa qoyulub və onlar geri qayıtmalı olublar. Qoşaçay-Təbriz marşrutunda (məsir) isə avtobusların (otubus) birində 20 nəfəri tutub və onların Təbrizə getməsinə maneə olublar. Tutulan soydaşlarımız 3 saat sorğu-suala tutulduqdan sonra sərbəst buraxılıblar.

-         Qeyd etdiyimiz kimi qardaş taxımların müsabiqəsində “Traxtur” tərəfindən 5, “Şəhrdari” tərəfindən isə 1 qol vurulub.