GünAz TV mətbuat mərkəzinin növbəti müsahibi, Türk Hərəkatı İctimai Birliyinin sədri Həbib Ələkbərsoydur.

- Həbib bəy, bu gün Azərbaycan-türk gəncliyinin fəallığı və milli məsələlərə baxışını necə dəyərləndirirsiniz?

- Sualınızın birinci hissəsi ilə bağlı deyə bilərəm ki, Azərbaycan gəncliyinin fəallığını görmək üçün hansısa bir ictimai birlikdə fəaliyyət göstərmək lazım deyil. Bu məmləkətdə yaşayan hər kəs bilir ki, istər rus işğalı dönəmində, istərsə də, müstəqillik qazandığımızdan sonra Azərbaycan gəncliyi həmişə öz fəallığı ilə fərqlənib. Hətta müxtəlif xarici qüvvələrin həmişə bununla bağlı narahatlığı olub. Lakin gəncliyin milli məsələlərə baxışına gəldikdə isə bu, birbaşa təbliğat aparatlarının (dəstqahlarının) işi necə qurması ilə bağlı məsələdir. Təbii ki, bugünkü dünyanı bürümüş yalan xəbər tufanında gənclərin doğrunu tapa bilməsi, həqiqətə yiyələnməsi o qədər də asan deyil. Hər tərəfdən ölkəmizə soxulan separat (bölücülük) ideologiyalar, mənəviyyatımızı bürümüş mənəvi terror dalğaları altında əziyyət çəkən gəncliyimizin milli məsələlərə tam açıq gözlə baxmasını gözləyəcək qədər də sadəlöhv olmaq olmaz. Gəncliyin milli məsələlərə aydın baxması üçün Azərbaycanda qeyri-hökumət və hökumət ideoloji aparatların fəaliyyətinin durmadan artması lazımdır ki, anti-təbliğata sinə gələ bilək. Lakin zamanla bu məsələni izlədikdə, nikbinlik yaranır. Mən gənclərlə işləməyə üstünlük verən bir hərəkatçı kimi, ölkəmizdə milli düşüncənin sürətlə yayılması və inkişaf etməsini müşahidə edirəm.

- Bu gün cəmiyyətdə tez-tez eşitdiyimiz ifadələrdən biri də, gənclərimiz fəal deyillər, milli məsələlərə biganəlik nümayiş etdirirlər və s. Deyilən fikirlərə münasibətinizi bilmək maraqlı olardı.

- Həmişə nəsillər arasında gizli bir mübarizə, gizli bir çəkişmə olub. Heç yerdə və heç bir dövrdə bir nəsil özündən sonra gələni qəbul etmək istəməyib. Hətta gənclik belə özündən sonra gələn yeniyetmələri qəbul etmək istəmir. Bugünkü gənclik milli məsələlərə nə qədər biganə olsa da, nə qədər passiv (qeyri fəal) olsa da, onu qınayanlardan fərqli olaraq azad bir cəmiyyətdə böyüyüb və müstəqil bir cümhuriyyətin tərbiyəsini aldıqları üçün özündən əvvəlki nəsildən daha aktivdir və milli düşüncəyə malikdir.

Ancaq təbii ki, bu gün dünyada inkişaf etmiş ölkələrin apardığı təbliğat və onlarda olan biganə həyat tərzinə bizdə yaranmış maraq gəncliyimizə ciddi təsir göstərir. Lakin bu da o demək deyil ki, dünya gəncliyi patriotizm (vətənpərvərlik) üzərində formalaşır və bizim gənclik məhv olur. Əsla, dünyanın inkişaf etmiş ölkələrində sorğu büroları öz gəncləri ilə daha həyəcanlı xəbərlər yayır və dövlətləri nə qədər ayıq olsa da, çalınmış bu həyəcan təbillərindən diksinmir. Ancaq mən onun da tərəfdarı deyiləm ki, əcnəbilərin halından təsəlli taparaq susaq. Yenə də biz, bütövlükdə toplum olaraq milli mənəvi dəyərlərin aşağı düşməsinin qarşısını almaq üçün səfərbər olmalıyıq. Həqiqətən də, cəmiyyətdə bu mövzuda xoşagəlməzliklər hədsizdir.

- Hazırda İran Azərbaycana qarşı ideoloji-siyasi təxribat maşını işə salıb. İranın hərbi-siyasi mollakratiyasının üzvləri Azərbaycanın əleyhinə sərt bəyanatlar verirlər. Sizcə, İran Azərbaycandan nə istəyir?

- Əvvəla anti-demokratik ölkələrin hər birində bu cür gərginlik mövcuddur. Çünki ölkəni, xalqı güclə idarəetmə dövlətin özünü stressdə saxlayır ki, bu da birbaşa onun xarici siyasətində də özünü göstərir.

İrana gəldikdə isə, bugün  özunu necə adlandırsa da, İran bir fars dövlətidir. Türk toplumu üzərində qurulmuş bir fars dövlətini qorumaq isə, o qədər də asan deyildi. Bütün gücünü hakimiyyətin qorunmasına sərf edən hərbi-siyasi molla rejimi bununla İranı bütövlükdə inkişafdan saxlayırdı ki, ölkənin qonşuluğunda onların əsarətdə saxladığı bir topluma məxsus olan yeni bir türk cümhuriyyətinin qurulması da sanki sarsıdıcı zərbə oldu, İran üçün. İran dövlətinin təbliğatına baxmayaraq, əhalisinin böyük bir hissəsinin İranı deyil də, Azərbaycanı öz dövlətləri hesab etməsi və yeni yaranmış bu türk cümhuriyyətinin qısa zamanda inkişaf edərək yaşayış səviyyəsi baxımından İranı ötməsi və ən əsası İrandan fərqli olaraq Azərbaycandakı demokratik quruluş, soydaşlarımızın bizə marağını, molla rejiminin isə təlaşını artırdı.

Yəni, bunun şərhə ehtiyacı yoxdur ki, hər kəsə aydın olduğu kimi İranın təlaşı sadəcə öz çürük sistemlərinin dağılmasının qarşısını ala bilməmələrindən yaranır ki, bu da yıxılanın səbəb axtarması kimi bir şeydir.

- Dünyada ciddi siyasi dəyişikliklər baş verir və dəyişiklik dalğası sərhədləri aşmaqdadır. Belə olan halda Güney Azərbaycan milli Hərəkatı öz fəaliyyət istiqamətini necə qurmalıdır?

- Diqqət etsəniz, əslində baş verən dəyişikliklərdə bir düzənlilik var. Düşünmürəm ki, hələ sərhədlər aşır. Sərhədlər o zaman aşacaq ki, türk dövlətləri və toplumları güclü bir Türk Birliyini yaratmağa nail olacaqlar. O zaman nə bizim Təbriz, Şuşa və s. kimi yaralarımız olar, nə Türkiyənin PKK, nə uyğurların dünyanın gözü önündə yaşadığı soyqırım və s. O zaman dünyaya da bir ədalət gələr – necə ki, Türklər tarix boyu nə vaxt güclü olublar.

Bu günkü proseslərin (sürəcin) fonunda (zəminəsində) Güney hərəkatımızın istiqamətinə gəlincə isə, təbii ki, mən buna cavab verə bilmərəm. Hərəkat liderləri mövcud şəraitə uyğun fəaliyyət istiqaməti müəyyən edirlər. Mən yalnız onu deyə bilərəm ki, Türk Hərəkatı İctimai Birliyi İranın tarixən olduğu kimi, yenidən bir türk dövlətinə çevrilməsinin tərəfdarıdır.

Söhbətləşdi: Elnur Eltürk