Dr.Asif Qurbanov: ”DAK-ların birləşməsi diaspor və güney məsələsinə böyük mənəvi-siyasi dəstək olacaq”

SON XƏBƏRLƏR

Dr.Asif Qurbanov: ”DAK-ların birləşməsi diaspor və güney məsələsinə böyük mənəvi-siyasi dəstək olacaq”

2021.10.20, 07:36

Gunaz.tv

GünAz TV mətbuat mərkəzinin növbəti müsahibi, Dünya Azərbaycanlıları Konqresi İdarə Heyətinin üzvü, Dr. Asif Qurbanovdur.

- Necə düşünürsünüz İran Azərbaycana qarşı apardığı ideoloji-siyasi təxribatlarının dayandırmamasının əsas səbəbini nə də görürsünüz?

- Kimsə İranın Azərbaycana apardığı ideoloji-siyasi təzyiqlərinin dayandıracağını düşünürsə, yanılır. İran heç bir zaman Azərbaycana qarşı apardığı ideoloji-siyasi mübarizəsini dayandırmayacaq. Çünki qonşuluq amili, ölkənin inkişaf etməsi və İranda milyonlarla Azərbaycan türkünün yaşaması İranın Azərbaycana qarşı siyasətini formalaşdırır və İran buna görə hərəkət etməyə məcbur olur. İstər-istəməz dövlət qurumlarının bir bölümü Azərbaycan məsələsinə vaxt ayıracaq və zaman-zaman müxtəlif açıqlamalar veriləcək, hətta müdaxilə etməyə çalışacaqlar. Bunu gözləmək və ona görə addım atmaq lazımdır. Azərbaycanda öz dövlət qurumları fəaliyyətlərini bu istiqamətdə qurmalı və buna yönəlik siyasət yürütməlidirlər.

- Bu gün Amerika və beynelxalq qurumlar İrana qarşı sanksiyalar (təhrimlər) tətbiq edir. Bu, İran üçün nə ilə nəticələnə bilər?

- Bu məsələ dərin məsələdir. Sanksiya tətbiq edən ölkələrin (bu ölkələrin üzv olduğu uluslarası təşkilatlar) böyük şirkətləri ora yatırımlar qoyublar və böyük qazanc əldə edirlər. Bu şirkətlərin orada milyardlarla vəsaitləri var. İranın bu formada davam etməsini istəyən böyük dövlətlər və güclər var. Buna baxmayaraq, biz İranda yaşayan Azərbaycan türklərinin öz dillərində oxumasını, milli mədəni haqlarına sahib olmalarına çalışmalıyıq və bu yolda da fəaliyyətlərimizi gücləndirməliyik.

- Son günlər Dünya Azərbaycanlıları Konqresinin birləşməsi məsələsi gündəmə gəlib. Sizcə, bu ideya baş tutsa, birlik qurultayı diaspor və güney hərəkatına nə verəcək?

- Bu sevindirici hadisədir və bunu ancaq alqışlamaq lazımdır. Bilirsiniz ki, biz birləşmək üçün müraciət etmişik. Sevindirici odur ki, bu müraciətə dəstəkləyici məktublar, cavablar gəldi və birləşmə yolunda mənəvi dəstəklər aldıq. Atalarımız yaxşı deyib: “Birlikdən güc doğar”. Nə qədər ki, tez bir zamanda bu birləşmə gerçəkləşərsə, bunun nəticəsi çox yaxşı olacaq. Birləşmə diasporumuza və Güney Azərbaycan məsələsinə böyük mənəvi-siyasi təsir edəcək. Hadisələrin inkişafına təkan verəcək. Artıq birləşib bir milli təşkilatın yaranmasının zamanıdır. Buna qarşı çıxanlar isə, gələcəkdə mən Azərbaycan diasporuna və güney məsələsinə xidmət edirəm sözünü deyə bilməzlər və deyərlərsə belə, bu insanlara heç kim inanmayacaq.

Söhbətləşdi: Elnur Eltürk

GUNAZ.TV

SON XƏBƏRLƏR