GünAz TV: ABŞ (Amerika Birləşmiş Ştatları) və İsrail Murad Karayılanın tutulduğunu deyir, İran isə təkzib edir.

PKK-nın 2 saylı lideri Murad Karayılanın həbs olunması barədə xəbərin dünən rəsmən yayılmasından sonra kürdlərə məxsus “ROJ TV” onun görüntüsünü yayımlayıb. Telekanal reportajın (quzarişin)  Karayılanın həbsi xəbəri yayılandan sonra hazırlandığını iddia edir. “ROJ TV”-də hazırlanan reportajın həmin kadrlarında M.Karayılan PKK terror təşkilatının 1984-cü il, avqustun 15-də Eruh və Şemdinli rayonlarına (məntəqələrinə) hücumla başladığı ilk qanlı aksiyalarının (əməllərinin) ildönümündə kürdlərin mübarizəsindən danışıb.

ABŞ kəşfiyyatçıları və analitikləri (təhlilçiləri) M.Karayılanın İranın İraqla sərhədində tutulmasının daha inandırıcı və həqiqətəuyğun olduğunu bildiriblər. Bu məlumatlar həm də İsrail mətbuatında yayılıb. İsrail mətbuatı Mossadın təsdiqləmədiyi məlumatları adətən heç vaxt yaymır. Bundan əlavə, məhz İsrail M.Karayılanın dəstəsinə son 2 ildə dəstək verən ikinci dövlətdir. İsrail və ABŞ müəyyən geostrateji maraqlara görə bu terrorçunun tutulmasında maraqlı deyil. Təsadüfi deyil ki, ABŞ dövlət katibi Hillari Klinton türk həmkarı Əhməd Davudoğluna məhz dünən zəng vurmuşdu.

Bu arada isə Karayılanın İran tərəfindən həbsini ötən gün təsdiqləyən İran parlamentinin Xarici Siyasət və Beynəlxalq Təhlükəsizlik Komissiyasının rəhbəri Əlaəddin Burucerdi İHA-ya xüsusi açıqlamasında bu məlumatı verdiyini təkzib edib. Ə.Burucerdi M.Karayılanın tutulduğunu söyləmədiyini, tutulmasının lazım gəldiyini dediyini vurğulayıb. Amma bir qədər əvvəl Ə.Burucerdi “Fars” informasiya agentliyinə (ajansına) açıqlamasında M.Karayılanın ələ keçdiyini demişdi: “Bu xəbərlər doğrudur. İran təhlükəsizlik qüvvələri PKK-nın ikinci şəxsini yaxalayaraq çox vacib bir işi bacarıblar”.

“Anadolu” agentliyinin məlumatına görə, Türkiyənin xarici işlər naziri Ə.Davudoğlu İran xarici işlər naziri Əli Əkbər Salehi ilə danışıb. Xəbərlərə görə, Ə.Ə.Salehi M.Karayılanın İran tərəfindən tutulduğuna dair əllərində bir bilgi olmadığını söyləyib.

Siyasi ekspert İbrahim Nəbioğlunun fikrincə, əgər Karayılanın İrandan Türkiyəyə ekstradisiyası (iadəsi) baş tutarsa, artıq kürd terroru ilə mübarizə siyasi müstəviyə çıxacaq: “Bu da Yaxın və Orta Şərqdə bütün dəngələrə yenidən baxılması anlamına gələcək”.

M.Karayılanın Türkiyənin Şanlıurfa vilayətinin Birecik bölgəsində yaşayan qardaşları və ailəsi də onun ələ keçməsi barədə xəbərlərə inanmadıqlarını deyiblər. Qazal, Mehmet Əli və Mehmet Emin Karayılan qardaşlarının dediklərinə görə, Murad Karayılanın tutulması barədə onlarda heç bir xəbər yoxdur.

Bu arada isə PKK ilə sıx bağlı olan “ROJ TV” kabel televiziyasının lisenziyasının (mücəvvizinin) ləğvi ilə əlaqədar Danimarkanın paytaxtı Kopenhagendə məhkəmə prosesi (sürəci) başlayıb. Danimarkanın baş prokuroru (dadistan-i koll) Yorgen Stin Serensen deyib ki, “ROJ TV” separatçı (bölücü) PKK-nın fəaliyyətinə dəstək verdiyinə görə bağlanmalıdır.

PKK-nın hərbi birləşmələr komandanı (fərmandehi) Dozdar Amon AK-Nyus agentliyinə verdiyi bəyanatda İrandan Türkiyəyə gedən qaz kəmərinin PKK tərəfindən partladılmasını təsdiqləyib. Bunun da Karayılan məsələsi ilə bağlılığı araşdırılır. Yeni müsavat