GünAz TV mətbuat mərkəzi IzRus.co.il İsrail-Rusiya portalının baş redaktoru (sər dəbiri) və Cənubi Qafqaz üzrə ekspert (karşünas) Aleksandr Qoldenşteynin “Gün.az”-a verdiyi müsahibəni olduğu kimi təqdim edir:

- İran silahlı qüvvələrinin baş qərargah rəisinin Azərbaycan rəhbərliyinin ünvanına etdiyi kəskin bəyanatını necə şərh edirsiniz?

 - Bizim müdrik bir hökmdarımız təxminən 3000 il bundan əvvəl deyib ki, Günəşin altında yeni heç nə yoxdur. Azərbaycan ilə İsrailin münasibətləri artıq çoxdandır ki, İranın boğazında sümük olub ilişib. Təəssüf ki, rəsmi Bakı bu qədər qüdrətli və narahat qonşu ilə sərhəddə Yəhudi dövləti ilə ikitərəfli münasibətlər potensialını tamamilə həyata keçirə bilmir.

 Amma bu, anlamağa imkan verir ki, özgələrin işinə müdaxilə etmək olmaz. İki il əvvəl, İsrail Prezidenti Şimon Peresin Bakıya səfəri zamanı da İran sərt etiraz etdi və hədələdi. Amma Azərbaycan Respublikasının (Cümhuriyyətinin) rəhbərliyi Tehranı başa saldı ki, başqasının işinə qarışmaq olmaz.

- Azərbaycan-İsrail əməkdaşlığı ilə əlaqədar İran tərəfindən belə bir qəbul edilməməni nədə görürsünüz?

 - Qədim Fars böyük bir dövlət idi. İndiki İran isə neftsiz, geridə qalmış, yoxsul və primitiv (ibtidai) bir dövlətdir. İsrail olmasaydı, İran hakimiyyəti öz vətəndaşları qarşısında çox sadə bir suala cavab verməli olacaqdı: Nə üçün bizim ölkədə insan haqları boğulur? Nə üçün demokratiya yoxdur? Nə üçün qonşu Azərbaycanda islam ümumi bəşəri dəyərləri ilə müqəddəs sayılır, biz isə Orta əsrlərdə olduğu kimi, insanları kranlarla (cərəssəqillərlə) yuxarı dartıb asırıq? Öz qəzəbini xarici düşmənə yönəltmək üçün İrana əsasən İsrail lazımdır.

 Yəqin ki, məşhur “Qoca Xattabıç” kitabındakı epizod (bölüm, hissə) yadınıza gəlir: bəs nə üçün sizin Amerikada zəncilərə o cür amansız divan tuturlar? Burda da belədir: İran vətəndaşlarının narazılıq dolu suallarına da Əhmədinejad məhz buna bənzər cavab verir: İsraildə isə…

- Azərbaycan Xarici İşlər Nazirliyi (XİN) İrana etiraz notası göndərdi. Bu addım Azərbaycanla münasibətlərin korlanmasına çalışan bəzi İran dairələrinin ayılmasına səbəb ola bilərmi?

 - Harınlamış fanatikə (ifrati təəssübkeş) qarşı yönələn etiraz notası nə verə bilər axı? Bu lap küçə tüfeylisini məktəbdən qovulacağı ilə hədələməyə bənzəyir…

- Yeri gəlmişkən, İrandan Azərbaycanın ünvanına səslənən neqativ (mənfi) fikirlər təkcə İsraillə bağlı olmur. İran rəhbərliyinin belə davranışını İsrail faktorundan başqa nə ilə izah etmək olar, İran bir tərəfdən Azərbaycanla qardaş olduğunu bəyan edir, digər tərəfdən də belə gözlənilməz hərəkətlər edir?

 - Azərbaycan İran üçün kiçik, amma uğur qazanan bir qardaşdır. Demək olar ki, bütün böyük dövlətlər, eləcə də Avropa İttifaqı ölkələri İranı bölgə üçün təhlükə mənbəyi hesab edirlər. Azərbaycan isə hamı ilə dostluq edir. Əlbəttə ki, Ermənistandan başqa. İranın harınlamış hökuməti də, prezidenti də öz ədabazlığı ilə gah Hitleri, gah da istedadsız komediya (komodi) aktyorunu (bazigərini) xatırladır.

 Prezident İlham Əliyev isə sakit və təmkinli adamdır. Ona Moskvada olduğu kimi, Yerusəlimdə və Vaşinqtonda da çox hörmət edirlər. Bakıda qadınlar rahat şəkildə dəbə uyğun yubka (damən) geyinə bilərlər, İranda isə buna görə adamın başını kəsərlər.

 Onların belə vəziyyəti adama lap məyus edir. Ən başlıcası, Bakı ayətullahın və Əhmədinejadın göstərişlərinə qulaq asmaq niyyətində deyil, ancaq ki İran hərbi gücünə görə sizin respublikadan (Cümhuriyyətdən) daha güclüdür. İkiqat məyusedici haldır…

F.H.