GünAz TV: İran hakimiyyəti söz, fikir, mətubat azadılığının düşünməlidir. Bu qənaəti deysən, artıq ölkə rəhbərliyi də qəbul edib. Çünki həmin azadlıqlar üçün şərait yaratmaqla nə addım atılır, nə də təkziblər verilir.

Milli haqlarını tələb edənlərə təzyiqlər etməklə kifayətlənməyən İran rəhbrliyi çeşidli  Güney Azərbaycan türklərinin adi məişət məsələlərinə də qarışır.

Son günlər Azərbaycan şəhərlərində peyk antenalarının yığılması kampaniyasına başlanılıb.

Yerli müşahidəçilərin  dediyinə görə, İran televiziyalarının yayımladığı verilişlər ölkə vətəndaşlarının tələbatını heç bir sahə üzrə ödəmir.Bu üzdəndə onlar xarici ölkələrin TV kanallarını izləmək məcburiyyətindədirlər.

Güney Azərbaycanda, eləcə də İranın bir çox yerlərində daha çox Türkiyə və Azərbaycan Respublikasının (Cümhuriyyətinin) televiziyaları peyk antenaları vasitəsi ilə izlənilir. Yerli sakinlərin sözlərinə görə, hətta fars dillilər də bu ölkələrin televiziya verilişlərinə baxmağa üstünlük verirlər.

Tehran hakimiyyəti bunun qarşısını almaq məqsədi ilə bir sıra hallarda xaricdən fars dilində yayımlanan TV-ləri maliyyələşdirir. İran rəhbərliyi bununla həm də fars dilindən uzaqlaşmanın qarşısını almağa çalışır.

Əksinə Güney Azərbaycanın çeşidli bölgələrində peyk antenalarının yığılması kampaniyasına başlanılıb.

Ötən həftə baş verənləri diqqətinizə çatdırmaq istərdik.

Güney Azərbaycanın Urmiya şəhərinin Hüseynabad məhəlləsində, polislər evlərə hücum edərək çanaq antenalarını yığıblar.

«Öyrənci”-nin məlumatına əsasən, polislər məhkəmə tərəfindən icazələri olmadan evlərə vəhşicəsinə hücum edib, evdə axtarış apardıqdan sonra bu qurğuları müsadirə ediblər.

Müşahidəçilərin sözlərinə görə,  hücuma məruz qalan ilk ev Azərbaycanın tanınmış sənətkarı Aşıq Əli Əlizadənin evi olub. Qeyd edək ki, Aşıq Əlizadə bir neçə gün öncə rəhmətə gedib.

Güney Azərbaycanın Makı şəhərində İslami İnqilab Keşikçilər Qvardiyasının («sipah») hərbçiləri evlərə hücum edərək çanaq antenalarının  yığıblar.

«araz news»-un  «Oğuz xəbər» qrupunun yayıdığı məlumata əsasən, qanunsuz davranışları ilə yanaşı, qvardiyaçılar və basqında iştirak edən məmurlar əhaliyə qorxulu anlar da yaşadıblar. Hakimiyyət nümayəndələri yerli sakinləri çanaq antenalarından istiafdə etdiyi üçün söyməkdən belə çəkinməyiblər.Məlumata görə, hadisəni cib telefonunun kamerası ilə çəkən bir gənc xanım məmurlar tərəfindən möhkəm döyülüb və onun mobil telefonu əlindən alınıb.

GünAzTV-nin məlumatına əsasən, Salmas şəhərndə İranın təhlükəsizlik qüvvələri məhkəmənin uyğun sanksiyası olmadan sakinlərin evlərinə soxularaq, mənzillərdə və onun yan-yörəsində yoxlama aparırlar. Hakimiyyət məmurları «peyk antenası» axtardıqlarını söyləyirlər.

Xəbərlərə əsasən, çanaq antenalarının toplanması kampaniyası zamanı sakinlərdən  tutulan və cərimələnənlər də olub.

Azərbaycan Respublikasına qarşı təbliğatı genişləndirmək məqsədi ilə İran İslam Respublikası (Cümhuriyyəti) “Hadi TV3” adlı daha bir telekanal açıb.

Həmin telekanal «Quran», islam və «Əhli-beyt» təbliğatçısı kimi təqdim edilir.

Məlumata görə, adını çəkdiyimiz telekanal bir neçə gündür artıq sınaq mərhələsini keçirir. İran rəsmilərinin sözlərinə görə, telekanal 2011-ci il sentyabr ayının 14-də (1390-cı il şəhrivər ayının 23-də) rəsmən fəaliyyətə başlayacaq.

Heç şübhəsiz Tehran hakimiyyəti dünyada «ən ədalətli davranınan və doğru danışan» olduğunu götərmək üçün çeşidli informasiya vasitələri də yaradır.Bir neçə il öncə «Press TV» -ni bu məqsədlə təsis etmişdi.

Bir neçə dildə yayımlanan «Səhər» televiziyası vasitəsi ilə öz siyasi-ideoloji düşüncəcini təbliğ edir. Bu TV Azərbaycan Respublikasına qarşı hədyanları və cəfəng çıxışları ilə tanışdır. Ona görə ehtimal olunur ki, «Hadi TV3» də islam təbliğatı adı altında bu siyasəti təbliğ edəcək.

Tehranın «çanaq antenalarını» yığma kampaniyası ölkə ictimaiyyətinin alternativ informasiya mənbələrindən faydalanmasının qarşısının alınmasına yönəlib. Ancaq bir çox hallarda hakimiyyətin cəhdləri səmərə vermir. Çünki bu yeni informasiya texnologiya selidir. Bu selin qarşısına almağa İran İslam Respublikasının isə nə gücü, nə maliyyə imkanı, nə də siyasi – ideoloji təbliğat vasitələri yetərlidir. Əks halda elə İran əhalisi öz ölkəsinin televiziya verilişlərəini izləyirdi də…  

Sədrəddin Soltan