GünAz TV: İran rəsmiləri Azərbaycan Respublikasına (Cümhuriyyətinə) qarşı kin, nifrət və iddialarını din adı altında bəyan etməkdədirlər.

Bu ölkənin rəsmi informasiya vasitələrinin yaydığı məlumata əsasən, İran hərbi qüvvələrinin baş qərargah rəisi, general Seyidhəsən Firuzabadi Azərbaycan Respublikasının prezidenti İlham Əliyevi hədələyib.

O, ölkədə «islam oyanışının qarşısının» alınmayacağını əmin olmaq istədiklərini söyləyib: «Azərbaycan Respublikasında islama qarşı bəzi hərəkətlər edilməkdədir. Bəzi müsəlman ölkələri ilə əlaqələrimiz olduğu halda təəssüflər olsun ki, onların qapılarını sionistlərə (İsraili nəzərdə tutur-S.S.) açdığını və islamın bir sıra ehkamlarını yasaqlayan addımlar atır.

Azərilərin könlündə yatan aslanın uca islam dini olduğunu və insanların islama aşiq olduqlarını hər kəs çox gözəl bilir.

Hörmətli İlahm Əliyev iqtidarının güclənməsinə vəsilə ola biləcək bu məsələlərə diqqət etməsini umuruq. Yoxsa onu qara bir gələcək gözləyir».

Bunun ardınca Firuzabadi şiə-sünni münaqişəsinə, Səudiyyə Ərəbistanı ilə ABŞ (Amerika Birləşmiş Ştatları) əlaqələrinə və s. bu sayaq məsələlərə diqqəti çəkərək, dini savadını nümayiş etdirməyə çalışıb.

Son zamanlar bölgədə baş verənlərdən aydın olur ki, İranlı generalın bu iddialı çıxışı  islam təəssübünə dayanmayıb. Çünki bu ölkədə sünnilərin haqlarının tapdandığına dair çox saylı örnəklər var.

Elə bir müddət öncə Sistan-Bəlucistan əyalətinin mərkəzi Zahidan şəhərinin imam cüməsi Mövləvi Əbdülhəmid “Came” məscidində çıxışı zamanı ölkədə sünni məzhəbli vətəndaşlara qarşı təzyiqlərə, ayrı-seçkiliyə son qoyulmasını tələb etmişdi.

Qeyd edək ki, bu əyalətdə əsasən milliyyətcə bəluc olan sünni məzhəbli müsəlmanlar yaşayır.

Mövləvi Əbdülhəmid deyib:«Sünni məzhəbli bəluc xalqının ölkə rəsmilərindən gözlədiyi odur ki, onların məzhəb azadlığına, öz dini vəzifələrini yerinə yetirməsinə hörmətlə yanaşılsın və bu yolda əngəllər aradan götürülsün. Ölkədə müxtəlif xalqların və məzhəblərin mövcudluğu ixtilafa səbəb olmamalıdır. Biz hamının xeyirxahlığını və bərabər hüquqluğunu istəyirik. Biz ölkə Ana Yasasında tanınan hüquqlarımıza qoyulan məhdudiyyətlərin vahiməsi altında yaşamamalıyıq. Biz istəyirik ki, özümüzə məxsus dini mədrəsələr fəaliyyət göstərsin, sərbəst şəkildə öz məzhəbimizi təbliğ etməyimizə imkan verilsin.

Şiələrlə sünnilərin bir-birinə qardaş olduğunu nəzərə alaraq biz istəyirik ki, onlar arasındakı hüquq bərabərliyinə riayət edilsin və məzhəbindən asılı olmayaraq hamıya bir gözlə baxılsın. İranın müxtəlif sərhəd zonalarında (məntəqələrində) yaşayan sünnilər bu vətən və ölkənin müdafiəsi uğrunda qurbanlar veriblər. Elə buna görə də, bizim umacağımız odur ki, sünnilərə qarşı hər hansı ayrı-seçkilik ortadan qaldırılsın və ədalətə riayət edilsin.

Sünni əhlinin hakimiyyətdən gözlədiyi odur ki, onların da balaları silahlı qüvvələrdə işə götürülsün və onlar da öz vətənlərinin torpağını və müstəqilliyini müdafiə edə bilsinlər. Hazırda İran islam inqilabının bərqərar olunmasından 32 il keçsə də, təəssüflər olsun ki, bizim tələblərimizin heç biri yerinə yetirilməyib. Ölkədə hələ də təəssübkeşlik və ayrı-seçkilik davam edir. Yazıqlar olsun ki, rəsmilərimiz dildə iddia etdikləri qardaşlıq, ədalət və nisbi bərabərliyi bərqərar edə bilməyiblər. Biz sünnilər milli birlik və təhlükəsizliyimizin qorunması üçün həmişə dözmüşük və həmişə belə bir ümidlə yaşamışıq ki, bizə qarşı olan bu təzyiq və ayrı-seçkiliyə nəhayət bir gün son qoyulacaq. Daha doğrusu, biz sünnilərə təzyiq ediləcəyini gözləmirdik».

İslama inanların haqlarının pozulduğuna dair bu sayaq məsələlərə çoxlu sayda örnəklər də göstərmək olar. Odur ki, generalın əsas niyyətinin heç də dinimizlə bağlı olmadığına aid bəzi mülahizələri yazmaq istərdik.

Heç kimə sirr deyil ki, Türkiyə ilə Azərbaycan arasında bütün bağlar səmimidir. Bunadan başqa Azərbaycanla ABŞ-da müttəfiq sayılır.

Tehran hakimiyyətinin qıcıqlandıran da daha çox budur.

Son zamanlar Türkiyənin də Suriya prezidenti Bəşşar Əsədə təzyiqləri artırması generalın niyyətini ortaya çıxarır.

«Associated Press»-in məlumatına əsasən, rəsmi Vaşinqton Bəşşar Əsəddən prezident səlahiyyətlərinin icarsının dayandırmağı tələb etmək niyyətindədir. Suriyadakı rejimin başçısı etiraz aksiyalarını (yürüşlərini) əzəcəyini bəyan etdikdən sonra Ağ Evin bunu tələb edəcəyi məlum olub.

Türkiyənin baş naziri Rəcəb Taib Ərdoğanın «rəsmi Ankara Suriyada baş verənləri kənardan müşahidə etmək niyyətində deyil» bəyan etdi: «Suriyada baş verən zorkılığa dözümümüz tükənib.

İndiyə kimi biz dözdük və gözlədik. Düşündük ki, onlar danışıb vəziyyəti düzəltmək olar. Ancaq bizim dözümümüz son həddədir.Suriyada baş verənlərə kənar müşaihdəçi kimi baxmağımız yolverilməzdir. Biz Suriyadan səslər eşidirik. Həmin səslərə çavab vermək bizim borcumuzdur.Suriyadakılar bizim iç işimizdir».

Türkiyənin xarici işlər naziri Əhməd Davudoğlu ötən gün Dəməşqdə Bəşşar Əsədlə görüşüb. Ölkəsinə döndükdən sonra türkiyəli diplomat bildirib ki, öz «xalqına qarşı zorakılığı dayandırmazsa» o zaman B.Əsədin taleyi Liviya lideri Müəmmar Qəddafininkinə oxşayacaq.

Səfərdən öncə keçirdiyi mətbuat konfransında Əhməd Davudoğlu bu il martın 21-də Türkiyə hərbi hava limanlarından (frudqahlarından) birinə məcburi endirilən İran təyyarəsi haqda məlumat verib.

Xatırladaq ki, «YasAir Cargo Airlines» hava şirkətinə məxsus təyyarə Tehrandan Suriyaya uçurmuş. Yoxlama zamanı oradan yasaqlanmış «hərbi təyinatlı yük» aşkarlınb.

Həmin yükə bunlar daxil olub : 60 ədəd «AK-47»-avtomat Kalaşnikov, 14 ədəd «BKC/Bixi» tipli pulemyot (müsəlsəl), avtomat (otumatik) və pulemyot üçün 8 min sursat, 60 mm çaplı üçün 560 və 120 mm çaplıya isə 1288 ədəd minaatan sursat.

Bundan başqa Azərbaycan Respublikasının ABŞ-dan hərbi silah satın almaq niyyətində olduğuna dair xəbərlər yayılıb.

Nəzərə almaq lazımdır ki, Azərbaycan indiyə kimi Amerikadan silah almayıb.Bu sahədə əməkdaşlıq, eləcə də birgə hərbi təlimlər ABŞ-ı sevməyənləri təbii qıcıqlandırır. Amerika ilə bu sayaq əməkdaşlığı həm də NATO ilə daha sıx əlaqə kimi də dəyərləndirmək olar.

Beləliklə, general Firuzabadinin çıxışının mahiyyəti bəlli oldu. Tehran hakimiyyəti Türkiyəyə qarşı birbaşa çıxış edə bilmədiyindən «islam ehkamları pozulur» adı altında Azərbaycanda pozuculuq fəaliyyəti göstərməklə rəsmi Ankaraya təzyiq etməyə çalışır. Bununla onların Suriyaya basqılarını azaltmağa səy göstərir.

ABŞ-la Azərbaycan arasında hərbi sahədə əməkdaşlığın genişləndirilməsi niyyətindən Tehran ciddi rahatsızdır. Elə Səudiyyə Ərəbistan-ABŞ münasibətlərini  xatırlatmaqla Firuzabadi bu vəziyyətin ürəklərincə olmadığını bildirib. Sədrəddin Soltan