GünAz TV: Misirdə keçmiş diktatorun məhkəməsi başladı, küçələrdə isə onun tərəfdarları ilə əleyhidarları arasında toqquşmalar gedir.

Misirdə keçmiş prezident Hüsnü Mübarəkin məhkəməsi başlayıb. Devrilmiş diktatoru Qahirənin mərkəzindəki Polis Akademiyasının akt zalında (salonunda) qurulmuş məhkəməyə Şarm əl-Şeyx hospitalından (bimaristan, xəstəxana) çarpayıda gətiriblər və onu dəmir qəfəsdə yerləşdiriblər. Qəfəsə Mübarəklə birlikdə onun iki oğlu, habelə keçmiş daxili işlər naziri də daxil olmaqla cəmi 6 müttəhim salınıb.

Misirlilərin tələblərinə uyğun olaraq məhkəmə prosesi (sürəci) canlı yayımlanır. Misir televiziyasının xəbərlərinə görə, 83 yaşlı eks-prezidenti (keçmiş prezident) öncə təcili yardım maşınında aeroporta (hava limanı, frudqah) aparıblar və təyyarəyə mindiriblər. Təyyarə Qahirə yaxınlığındakı aviabazada (payqahe həvayi) yerə enib. Daha sonra Mübarəki xüsusi reanimasiya (xüsusi baxım, xüsusi muraqibət) vertolyotu (helikopter) ilə məhkəmənin keçirildiyi binaya aparıblar. Onu vertolyotdan təkərli çarpayıda düşürüblər və dəmir barmaqlıqlar arxasında yerləşdiriblər.

Bildirilir ki, Hüsnü Mübarək səhhətinin ağırlaşması səbəbindən yeriyə, ayaq üstə dayana və qidalana bilmir. Bu səbəbdən o, məhkəməsini çarpayıdan izləməli olacaq.

Mübarək və onun oğlu da daxil olmaqla, müttəhimlər bu ilin yanvar-fevral aylarında Misirdə kütləvi etirazları yatırmaq üçün nümayişçilərə atəş açmaq əmri verməkdə, korrupsiyada (fəsade mali) və digər cinayətlərdə ittiham olunurlar. İttiham aktında (əməlində) Misir prezidentinin yaxın dostu və ortağı, biznesmen Hüseyn Salemin də adı yer alır. Lakin o, hazırda İspaniyada həbsdə olduğu üçün qiyabi mühakimə olunacaq.

Mübarəki müdafiə etmək üçün 800-dən çox vəkil müraciət edib, onlardan 50-si məhkəməyə buraxılıb. Hakim məhkəməyə müttəhimlərdən keçmiş daxili işlər naziri Həbib əl-Hədlinin barəsindəki ittihamı oxumaqla başlayıb. Bildirilib ki, nümayişçilərə atəş açılması nəticəsində 850-yə yaxın adam həlak olub. Keçmiş daxili işlər naziri Mübarəkdən aldığı göstərişlər əsasında nümayişçilərə döyüş patronları (güllələri) ilə atəş açmaq əmri verib, həmçinin kütləvi həbslər aparıb, tutulanlara işgəncələr verilməsinə əmr edib.

Məhkəmənin keçirildiyi binanın qarşısında isə keçmiş prezidentin tərəfdarları ilə əleyhidarları arasında güclü toqquşmalar başlayıb. Bildirilir ki, tərəflər əvvəlcə bir-birini söyməyə başlayıb, daha sonra iki dəstə bir-birinə hücum edib. Bir nəfər həlak olub, 15-dən çox adam yaralanıb. Polis vəziyyəti nəzarət altına ala bilmək üçün güc tətbiq edib. Bildirilir ki, məhkəmənin keçirildiyi zalın ətrafında 3 minə yaxın polis yerləşdirilib.

Misir hakimiyyəti bildirir ki, məhkəməni mümkün qədər qısa vaxtda yekunlaşdıracaq (sona çatdıracaq), hər gün iclas keçiriləcək və hökm tezliklə çıxarılacaq. İrəli sürülən ittihamlar üzrə müttəhimlərin hamısını edam cəzası gözləyir. Yeni müsavat