İran müxalifəti seçkilərlə bağlı yeni şərtlər irəli sürüb

SON XƏBƏRLƏR

İran müxalifəti seçkilərlə bağlı yeni şərtlər irəli sürüb

2021.10.20, 07:36

Gunaz.tv

GünAz TV: Müxalifət nümayəndələri Mirhüseyn Musəvi və və Mehdi Kərrubiyə yaxın olan “Yaşıl Ümid Yolu” Koordinasiya (həmahəngi, əlaqələndirmə) Şurası iyulun (July) 7-də bəyanat verərək növbəti parlament seçkilərində iştirak etmək üçün öz şərtlərini irəli sürmüşdür.

Şura bu şərtləri “seçki standartları və əsasları” adlandıraraq bunlarsız seçkilərin keçirilməsini mümkünsüz hesab etmişdir. Bəyanatda eyni zamanda bildirilmişdir ki, bu şərtlər yerinə yetirilmədiyi təqdirdə İran xalqı seçkilərin ədalətsiz, qeyri-sağlam və qərəzli olduğuna inanacaq.

“Yaşıl Ümid Yolu” Koordinasiya Şurası seçkilərdə iştirak üçün həbs olunanlara bəraət verilməsi, Musəvi və Kərrubinin, eləcədə onların həyat yoldaşlarının ev dustaqlığının ləğv edilməsi, təhlükəsizlik və silahlı qüvvələrin siyasi rəqabətə və seçkilərə müdaxiləsinin qarşısının alınması, azad siyasi fəaliyyətə şərait yaradılması, siyasi partiyalar və təşkilatların, eləcə də qeyri-hökumət təşkilatlarının azad fəaliyyətini təmin etmək, hüquq-mühafizə orqanlarının müdaxilələrinə son qoymaq və nəhayət ölkədə elan olunmamış fövqəladə halın aradan qaldırılması kimi şərtlər irəli sürmüşdürlər.

Şura İranın siyasi, iqtisadi və sosial durumunu da təhlil edərək, dövlət dairələrində maliyyə fırıldaqlarının, cəmiyyətdə əxlaqi pozuntularının, ictimai asayişdə qətl, oğruluq, qadınlara təcavüz hallarının artmasını, eləcə də incəsənət xadimlərinə qarşı təzyiqlərin getdikcə çoxalmasını ciddi tənqid etmiş və hakimiyyəti mövcud vəziyyətin səbəbkarı kimi təqdim etmişdir. “Yaşıl Ümid Yolu” bildirmişdir ki, ölkədə inflyasiyanın (təvərrüm) gündən-günə artması, cəmiyyətdə iqtisadi təbəqələr arasında uçurumun böyüməsi, işsizlik və iqtisadi inkişafın mənfi olması səbəbiylə vəziyyətdən narazı olan insanlar tezliklə müxalifətin cərgəsinə qoşulacaq. Şura İrana qarşı beynəlxalq sanksiyaları (təhrimləri) hakimiyyətin bacarıqsızlığı kimi dəyərləndirərək, yaxın gələcəkdə iflicedici sanksiyaların tətbiqini və İranın beynəlxalq iqtisadi və siyasi təklənməsinin mümkün ola biləcəyini də vurğulamış, Əhmədinejadın xarici siyasətini “macəraçı siyasət” kimi qiymətləndirmişdir.

Bütün bu tənqidlərə baxmayaraq şura indiki şəraitdə seçkilərdə iştirak edə biləcəyini qeyri-mümkün hesab etsə də, seçkiləri boykot etmək siyasətini də məqbul hesab etmir. Bəyanat müəllifləri bildirir ki, onlar seçkilərə yalnız şərtləri qəbul olduğu halda qatıla bilərlər. Araztm

GUNAZ.TV

SON XƏBƏRLƏR