GünAz TV: “Azərbaycan Türkiyə və İranla eyni zamanda viza rejimini aradan qaldırmağa texniki cəhətdən hazır deyil”

“Biz Türkiyə ilə viza rejiminin ləğvində problem görmürük, amma İran buna kəskin etiraz edərək, ona münasibətdə də eyni addımı atılmasını istədi, əks halda Azərbaycanın Naxçıvanla quru əlaqəsini kəsəcəyinə dair xəbərdarlıqla çıxış etdi”.

 GünAz TV mətbuat mərkəzinin APA-ya istinadən yaydığı məlumata görə, bunu Azərbaycan Prezident Administrasiyası (nəhade riyasəte cemhuri) ictimai-siyasi şöbəsinin müdiri Əli Həsənov Türkiyənin “Today’s Zaman” qəzetinə müsahibəsində deyib.

Ə. Həsənov bildirib ki, Azərbaycan viza rejimini həm Türkiyə, həm də İrana münasibətdə eyni vaxtda qaldırmalıdır: “Amma hazırkı mərhələdə Azərbaycan hökümətinin hər iki dövlətlə viza rejimini eyni vaxtda ləğv etməyə hazır olduğunu düşünmürəm”.

Ə. Həsənov bildirib ki, əsas narahatlıq İran sərhədi və buradan yarana biləcək müxtəlif fəsadlarla bağlıdır. Onun sözlərinə görə, İrandan Azərbaycan vasitəsilə Avropaya 300 tona qədər narkotik (müxəddir maddələri) vasitə qaçaqmal yolu ilə daşınır və bunun yalnız 5-10 tonunu ələ keçirmək mümkün olur. Nəticədə azərbaycanlı gənclər arasında narkomaniya (etiyad) yayılır.

Azərbaycan rəsmisi habelə deyib ki, İran kimi böyük dövlətlə münasibətdə vizasız rejim siyasəti yürütmək hazırkı mərhələdə Azərbaycanın milli maraqlarına uyğun deyil: “İranda siyasi qeyri-sabitlik bizim tərəfə qaçqın axınına təkan verə bilər. Biz isə kiçik ölkəyik və milli təhlükəsizliyimiz barədə yaxşıca düşünməliyik”.

Ə. Həsənov APA-ya açıqlamasında isə İran tərəfdən hər-hansı hədə ilə bağlı müsahibədə əks olunmuş fikirlərin jurnalistin onun sözlərini yanlış anlaması nəticəsində meydana çıxdığını deyib: “Türkiyəli jurnalistlərlə söhbət zamanı onlar viza məsələsini qaldırarkən mən söylədim ki, Azərbaycanla viza rejimini həm Türkiyə, həm İran ləğv edib. Biz də qarşılıqlı şəkildə viza rejimini ləğv etmək üçün hər iki dövlətə eyni vaxtda təxminən oxşar münasibət bəsləməliyik. Buna isə Azərbaycanın texniki cəhətdən hazır olması lazımdır. İran-Azərbaycan, Türkiyə-Azərbaycan sərhədi, Naxçıvandakı keçid məntəqələri isə texniki cəhətdən vətəndaşların kütləvi şəkildə vizasız rejimdə keçidinə hələlik hazır deyil. Sərhəd məntəqələrində vətəndaşların yoxlanma sistemi də buna hazır deyil. Bilirsiniz ki, uzun müddət BMT (Birləşmiş Millətlər Təşkilatı)  və digər beynəlxalq qurumlar İran ərazisi vasitəsilə Əfqanıstandan narkotik vasitələrin Azərbaycandan keçməklə Rusiya və digər ölkələrə daşınması haqqında xəbərdarlıqlar edir. Nəzarətsiz Dağlıq Qarabağ ərazisindən İran vasitəsilə narkotik vasitələrin daşınması məsələsi də var. Ona görə də Azərbaycan həm təhlükəsizlik, həm miqrasiya (köç) proseslərinin (sürəcinin)  tənzimlənməsi, həm də təhlükəsizliyi ilə bağlı bu tipli məsələlərin təmin olunması anlamında hazırda iki böyük dövlətlə - İran və Türkiyə ilə münasibətdə viza rejimini aradan qaldırmağa hazır deyil. Burada hər-hansı hədə söhbəti jurnalistin yanlış anlaması nəticəsində yazdığı qeydlərdir. Bütövlükdə söhbət ondan gedir ki, Azərbaycan özünün sərhəd-keçid, miqrasiya, təhlükəsizlik məsələləri ilə bağlı texniki cəhətdən hər iki dövlətlə eyni zamanda viza rejimini aradan qaldırmağa hazır deyil”.