GünAz TV: “Qara qutu”nun tapıldığı barədə xəbərlər əvvəl təyyarənin məxsus olduğu “Silk Way” şirkəti tərəfindən təkzib olundu, daha sonra təsdiqləndi.

Azərbaycanın “Silk Way” şirkətinə aid İl-76 təyyarəsinin NATO-ya yük daşıyarkən Əfqanıstanda qəzaya uğraması ilə bağlı ziddiyyətli məqamlar qalmaqdadır. Dünən təyyarənin “qara qutu”sunun tapıldığı barədə xəbərlər yayılıb. Əvvəlcə bu xəbəri ANS-ə AZAL-ın vitse-prezidenti, hadisəni araşdıran komissiyanın (komisiyonun)  sədri İlham Əmirov verib. Qutunun şəkli Kabildəki nümayəndələrimizə göstərilib. Bildirilib ki, qutunun özü Əfqanıstan tərəfdən yaradılmış komissiyadadır. Amma çox maraqlıdır ki, qutunun götürülməsinə nail olan komissiya təyyarənin heyət üzvlərinin taleyinə bir o qədər də həssaslıq göstərmir. Bunu da ANS-ə komissiyanın sədri bildirib.

Qeyd edək ki, bazar günü Azərbaycana məxsus “IL-76" yük təyyarəsinin qəzaya uğramasının səbəblərini araşdıran komissiyanın Əfqanıstanın paytaxtı Kabildə yerli hökumət rəsmiləri və koalisiya (etilaf) qüvvələri ilə apardığı növbəti danışıqlar da nəticəsiz başa çatmışdı. Xatırladaq ki, İL-76 təyyarəsi iyulun (July) 6-da gecə saat 00:10 radələrində Əfqanıstanın Baqram Hava Limanı yaxınlığında enməyə hazırlaşarkən rabitə ani olaraq kəsilib və radarlarda görüntü itib. Təyyarənin göyərtəsində olan 9 ekipaj (xədəmə) üzvünün hamısı həlak olub. Azərbaycan tərəfinin yaratdığı komissiya hələ hadisə yerinə gedə bilməyib. Belə ki, ərazinin yarısına Daxili İşlər Nazirliyinin qoşunları, yarısına isə ”Taliban" qruplaşması nəzarət edir.

Təyyarənin “qara qutu”sunun tapıldığını Azərbaycanın Pakistandakı, eyni zamanda Əfqanıstanda akkreditə (mötəbər) olunmuş səfirliyinin 3-cü katibi Çinqiz Qəribli də təsdiq edib: “Əfqanıstan tərəfi bizim komissiyanın üzvlərinə təyyarənin ”qara qutu"sunun əks olunduğu bir fotoşəkil təqdim edib. Hazırda komissiya üzvləri fotodakı “qara qutu”nun qəzaya uğramış Azərbaycan təyyarəsinə aid olub-olmadığını araşdırırlar. Əfqan tərəfi iddia edir ki, foto Azərbaycan təyyarəsinin qəzaya uğradığı bölgədə çəkilib. Lakin bunu dəqiqləşdirməyə ehtiyac var. Bizim komissiya üzvlərinin qəza bölgəsinə yetişməsi isə Əfqanıstandakı beynəlxalq koalisiya qüvvələrinin - İSAF-ın yaradacağı şəraitdən asılı olacaq".

Diplomatın sözlərinə görə, Azərbaycandan olan komissiya üzvləri, İSAF təmsilçiləri və əfqan hökumətinin nümayəndələri mütəmadi təmasda olur, birgə iclaslar keçirirlər: “Lakin beynəlxalq qüvvələr və əfqan rəsmiləri qəza bölgəsinin təhlükəli və relyef (yardım) baxımından çətin rayon (məntəqə) olduğunu əsas gətirərək, hələlik oraya getməyin mümkün olmadığını bildirirlər”. Diplomat bildirib ki, əfqan rəsmiləri Azərbaycan tərəfinə əllərindən gəldiyini etdiklərini, İSAF isə qəza bölgəsinin “riskli rayon” olduğunu deyir: “İSAF təmsilçiləri cəsədlərin götürülməsi yollarını araşdırdıqlarını bildirirlər. Azərbaycan tərəfdən komissiyanın üzvləri isə Əfqanıstanın paytaxtı Kabildədir”.

Azərbaycanın Pakistanda və Əfqanıstandakı səfiri Daşqın Şikarov isə “Trend”ə bildirib ki, Əfqanıstanda qəzaya uğrayan Azərbaycan təyyarəsinin “qara qutu”su amerikalı hərbçilər tərəfindən tapılıb və şifrəni açmaq üçün ən yaxın zamanda Beynəlxalq Mülki Aviasiya (havacılıq, həvanəvərdi) Təşkilatının (ICAO) ofisinə çatdırılacaq. Lakin “qara qutu”nun tapıldığı barədə xəbərləri əvvəlcə “Silk Way” şirkətinin rəhbərinin müşaviri Adil Qasımov təkzib edib. ATV-yə açıqlamasında bu xəbərə münasibət bildirən şirkət nümayəndəsi qeyd edib ki, “qara qutu”nun tapılması barədə deyilənlər həqiqəti əks etdirmir: “Bütün məlumatlar ilk olaraq bizə gəlir. Deyə bilərəm ki, ”qara qutu"nun tapılması barədə deyilənlər düz deyil. Bu barədə məndə heç bir məlumat yoxdur. Təyyarənin düşdüyü yer “Taliban”çılar tərəfindən atəşə tutulur. Odur ki, əraziyə yaxınlaşmaq olmur. Çətinliklər yaranıb. Son hadisələrlə bağlı vəziyyət gərginləşib. Buna baxmayaraq, komissiya işini davam etdirir". Bu ziddiyyətli xəbərlərlə bağlı günün sonunda A.Qasımovla əlaqə saxladıq. O, “qara qutu”nun tapıldığını təsdiqlədi və bildirdi ki, hazırda Kabildə olan komissiyadan bu barədə xəbər alıblar: “Bizə bildirildiyinə görə ”qara qutu"nu əfqan tərəfi götürüb, onlar öz bildikləri yollarla qəza yerinə çata biliblər. Lakin cəsədlərin nəyə görə götürülmədiyi barədə bizim komissiyanın suallarına aydın cavab verilməyib. Onlar deyirlər ki, mümkün olanı edirlər. Biz əfqan tərəfi ilə vasitəçilər üzərindən danışırıq. Səylər davam etdirilir, biz cəsədləri götürə bilmək üçün onlarla danışıqları davam etdiririk".

Qeyd edək ki, Əfqanıstandakı koalisiya qüvvələrinin komandanlığının qəza bölgəsinə yaxınlaşmaq üçün yetərli tədbirlər görməməsi Azərbaycanla NATO arasında mübahisə yaradıb. Müəmmalar isə qalmaqdadır və göründüyü kimi, “qara qutu”nu götürənlər heyət üzvlərinin cəsədlərini qəza yerində qoyublar. Eyni zamanda aydın olmur ki, Azərbaycan tərəfinin göndərdiyi komissiyaya nəyə görə “qara qutu”nun özü yox, şəkli göstərilib. Yeni müsavat