GünAz TV mətbuat mərkəzinin növbəti müsahibi, Azərbaycan Milli Demokrat (Bozqurd) Partiyasının (AMDEP) başqanı Tufan Kərimdir.

- Bu günlərin önəmli hadisələrdən biri də, Azərbaycan Milli Demokrat (Bozqurd) Partiyası ilə Güney Azərbaycan İstiqlal Partiyası (GAİP) arasında əməkdaşlıq sazişinin imzalanması oldu. Belə bir sazişin imzalanması hansı zərurətdən yarandı?

- Güney Azərbaycan İstiqlal Partiyası Azərbaycanımızın Güneyində soydaşlarımızın milli və insan haqları uğrunda mübarizə aparan beynəlxalq (uluslararası) səviyyəli öncül siyasi qurumlardan biridir. Digər tərəfdən, GAİP Bütöv Azərbaycan qayəsindən çıxış edərək ermənilər tərəfindən Azərbaycan Respublikasına (cümhuriyyəti) qarşı işğal və soyqırım siyasəti barədə həqiqətlərin dünya ictimaiyyətinə çatdırılması işində böyük qeyrət nümayiş etdirir. Mühacirətdəki bəzi üzdəniraq qondarma qurumlardan fərqli olaraq, GAİP milli namus və milli qeyrət məfkurəsindən çıxış edərək xarici ölkələrdə  Azərbaycan Respublikası (Cümhuriyyəti) əleyhinə aksiyalarda (yürüşlərdə) iştirakı özünə sığışdırmır. GAİP Azərbaycan Türklüyünün mövcudluğuna qarşı yönəlmiş fars, rus və erməni anti-türkizminə  qarşı da mübarizədə öncüllərədən biridir. Bu siyasi partiya öz mübarizəsini Azərbaycan Türklüyünün milli əqidəsinə uyğun sivil metodlarla aparır və Güney Azərbaycanda milli özünüdərk sahəsində onun fəaliyyəti önəmlidir. Azərbaycan Milli Demokrat Bozqurd Partiyasının və Güney Azərbaycan İstiqlal Partiyasının ülküsü və məramı üst-üstə düşür. Faktiki (gərçək olaraq) bu iki partiya qardaşdır. Bu iki siyasi qurumun pərakəndə mübarizəsi az məhsuldar ola bilər. Bax, zərurət buradan doğmuşdur. Ona görə də biz Millətimizin mənafelərinə uyğun əməkdaşlıq yaratmaq qərarına gəldik.

- Bəs, əməkdaşlıq şərtləri necə olacaq?

- Bu barədə biz mediaya xəbər vermişik. İlk növbədə biz partiyalararası informasiya mübadiləsi, daha sonra, Millətimiz və Vətənimiz üçün önəmli olan sinxron (birgə) tədbirlərin keçirilməsini planlaşdırırıq (tərhini tökürüq). Zaman axarında yeni əməkdaşlıq formaları da ortaya çıxa bilər.  

- Bu gün nə etmək lazımdır ki, Güney Azərbaycanda cərəyan edən hadisələr uğurlu və xalqımızın arzu, istəyi ilə nəticələnsin?

- Millətimiz dünyaya qüvvə olduğunu nümayiş etdirməlidir. Bizim qüvvə olduğumuzu görən dünya gücləri bizim milli məqsədlərimizi nəzərə almağa, milli mənafelərimiz ilə hesablaşmağa məcbur olacaq. Pişəvərinin başçılığı ilə Milli Hökumətin acı taleyi bizim üçün dərs olmalıdır. Dünya güclərinə anlatmalıyıq ki, Millətimizin maraqları ilə hesablaşmasalar onların regiondakı (bölgədəki) bütün projeləri iflasa uğrayacaq. 

- Sizcə, bu gün ərəb dünyasında inqilabların və dəyişikliklərin baş verdiyi bir zamanda, İran rejimi proseslərin qarşısında nə qədər dayana bilər?

-  Ərəb dünyasında baş verənlərin kökündə ABŞ (Amerika Birləşmiş Ştatları) başda olmaqla Batı koalisiyasının (birlik, etilaf) Çin, Hindistan, Pakistan və Rusiya kimi ölkələrin neftə çıxışını öz nəzarəti altına almaq marağı durur. Ona görə də, süni “inqilablar”dan, muzdlu “qiyamçılardan”, ərəb ölkələrindəki etnik, dini və tayfa qarşıdurmasından geniş istifadə edildi. Məqsəd ərəb ölkələrində hakimiyyətə idarə olunan marionetlərin (oyuncaq, əlaltı) gətirilməsi və ya bu ölkələri daha xırda hissələrə parçalamaqdır.

     İran sözsüz ki, bu projedə əsas hədəfdir. Söhbət İran rejiminin möhkəmliyindən getmir. Seçim dünya güclərinindir. İranın NATO və ya qonşu ölkələrlə müharibə yolu ilə özünü tükəndirilməsi və ya daxildəki qarşıdurma ilə zəiflədilməsi kimi planların mövcudluğunu duymaq çətin deyil. Bu məqamlarda bizi yalnız Azərbaycan Türklüyünün taleyi maraqlandırır. Fars şovinizmi ölkəni saxlamaq üçün müxtəlif tədbirlərə əl ata bilər. Bu məsələdə biz, bəlkə də təsəvvür edə bilmədiyimiz gedişatdan ehtiyatlanmalıyıq. Bunlardan biri odur ki, xarici təzyiqin altında İranın parçalanmasını görən fars şovinistləri, o cümlədən, PJAK və ermənilər Azərbaycan Türklüyünə qarşı soyqırıma başlaya bilər. İkinci əsas ssenari budur ki, Bütöv Azərbaycan və Türkiyə birliyindən ehtiyatlanan Batı dünyası İranda yalnız özünə sadiq fars şovinistlərinin hakimiyyətə gətirilməsi ilə kifayətlənər.  

Söhbətləşdi: Elnur Eltürk