GünAz TV: Xəbər verdiyimiz kimi, iyulun (July) 3-də Azərbaycan-İran sərhədində atışma olub.

Dövlət Sərhəd Xidmətinin Mətbuat Mərkəzindən verilən məlumata görə, həmin gün saat 13.15 radələrində Yardımlı rayonunun (şəhərinin) Arvana kəndi yaxınlığında yerləşən sərhəd zastavasının (mərzi post) xidməti ərazisində İran İslam Respublikasının (Cümhuriyyətinin) ərazisindən silahlı şəxslər tərəfindən sərhəd pozulub. Sərhəd naryadına (növbətçisinə) qarşı qəfildən silah tətbiq edilib. Nəticədə sərhəd naryadının başçısı leytenant (sitvan) Quliyev Rüfət Firudin oğlu ağır güllə yarası alıb, zastavaya aparılarkən yolda vəfat edib. Dövlət sərhədinin pozulmasının qarşısı alınıb, silahlı şəxslər İran İslam Respublikasına qaçıb.

Onu da qeyd edək ki, Azərbaycan Sərhəd Xidmətinin hadisə barədə yaydığı ilkin məlumata əsasən, toqquşmaya səbəb bir qrup silahlının Azərbaycan sərhədini pozaraq ölkəmizə daxil olmaq istəməsi olub. Bəyanata əsasən, qrupun üzvləri Azərbaycan hərbçilərinin onları həbs etmək cəhdindən yayınaraq İrana qaçıb. İran-Azərbaycan sərhədinin narkotik (müxəddir maddələr) qaçaqmalçılar tərəfindən geniş istifadə olunduğu barədə dəfələrlə məlumat verilib. İrandan gələn narkotacirlər (müxəddir maddələrinin tacirləri) Azərbaycan vasitəsilə regiona (bölgəyə), həm də Avropaya narkotik maddələr daşıyır. Ümumiyyətlə, görünən odur ki, Azərbaycandan fərqli olaraq, İran tərəfdə qaçaqmalçılıq və narkotik ticarəti geniş vüsət alıb. Onun nəticəsidir ki, cənub sərhədlərimizdə İran tərəfindən edilən bu kimi pozuculuq hallarına daha tez-tez rast gəlinir. Tez-tez sərhədlərimizi pozan həmin dəstələrin silahlı olması da İrandakı narkotik alverçilərinin geniş dəstəyə malik olduqlarını göstərir.

   Hadisəyə gəldikdə, görünən odur ki, ilk olaraq İran tərəfdən əsgərlər atəş açıb. Ən azı bəyanatlardan belə görünür. Bu isə təsadüf ola bilməz. Böyük ehtimalla, həmin hadisənin arxasında nəsə dayanır. Bunun arxasında nəyin dayandığını ayırd etmək üçün ekspertlərə (karşünaslara)  müraciət olunub.

Milli Məclisin Analitik-İnformasiya (təhlili bilgilər) Şöbəsinin müdiri Aydın Ağayevin fikrincə, olayın arxasında sırf qaçaqmalçılıq amili dayanır: "Bizim tərəfdən verilən izahatın xarakterində (mahiyyətində) İran tərəfdən bir qrup silahlının sərhədi keçmək cəhdi daha çox diqqət çəkəsi məqamdır. İran tərəfdən silahlılar bizim əraziyə hansı məqsədlərlə gələ bilər? Son dövrlərin hadisələrinə nəzər salsaq, açıq-aydın bəlli olar. İndiyə qədər ötən dövr göstərir ki, İran tərəfdən Azərbaycan sərhədlərini yalnız qaçaqmalçılıq məqsədlərilə pozublar. Burada narkotik məsələləri və qaçaqmalla bağlı olan digər məsələlər dayanır. Sözügedən hadisənin arxasında da məhz bu amil dayanır. Amma hadisəni tamam başqa məqsədlə sərhədi pozub ərazimizə daxil olmaq kimi fikirlərlə izah etməzdim. Ona görə də, fikrimcə, sözügedən olayı qaçaqmalçılıq məqsədilə sərhədi keçmək cəhdi kimi dəyərləndirmək daha doğrudur. Hadisənin arxasında da, heç şübhəsiz, bu amil dayanır".

Azərbaycanın Tehrandakı keçmiş səfiri Əlyar Səfərli də düşünür ki, belə hərəkətin arxasında əsasən qaçaqmalçılıqla bağlı proseslər (sürəçlər) dayanır. Amma o, digər məqamları da istisna etmədi: "İran tərəfindən sərhədlərimizin pozulması kimi hadisələr birinci dəfə deyil, baş verir. Bunun başlıca səbəbi də İranın özü ilə bağlıdır. Bu ölkədəki bir sıra quldurlar tez-tez Azərbaycan sərhədlərini pozur, müxtəlif vasitələrlə ölkəmizə soxulmağa cəhd edirlər. Bəziləri ölkəmizə narkotik maddələr gətirir, qaçaqmalçılıqla məşğul olur. Bəziləri də başqa məqsədlərlə bura soxulur, nəticədə də ölkəmizdə bu və ya digər hadisələr baş verir.

Belə hərəkətlər İranın təxribatıdır və heç də təsadüf deyil. Ciddi səbəbləri var. Onlar bu yollarla ölkəmizdə müxtəlif tədbirlər həyata keçirmək cəhdində buluna bilər. Müstəqil dövlətin sərhədini pozaraq zabitini (əfsərini) öldürmək xəyanətdir. Azərbaycan dövləti bu hallara münasibətini bildirib, qarşı tərəfə ultimatum verməlidir". Həsən İSLAMOV / Bakı-xəbər