GünAz TV: Dünən Bakıda Dünya azərbaycanlılarının III qurultayı keçirilib. Qurultayın birinci iş gününün sonunda bir sıra sənədlər qəbul olunub.

GünAz TV mətbuat mərkəzinin SİA-ya istinadən yaydığı məlumata görə, tədbirdə çıxış edən Diasporla İş üzrə Dövlət Komitəsinin sədri Nazim İbrahimov ötən 5 il ərzində diasporun gördüyü işlər, həyata keçirdiyi layihələr və gələcəkdə nəzərdə tutulan yeniliklər barədə məlumat verib. O bildirib ki, Dünya azərbaycanlılarının III qurultayı əlamətdar tarixdə - Azərbaycan Respublikasının Dövlət Müstəqilliyini elan etməsinin 20-ci ildönümünü qeyd etdiyi ildə keçirilir: “Bu qurultay tarixi məzmunu və ictimai əhəmiyyətinə görə 2006-cı ildə keçirilən Dünya azərbaycanlılarının II qurultayından bir çox cəhətləri ilə seçilir. Bu gün Azərbaycan iqtisadi cəhətdən qüdrətli dövlətə çevrilib, dünya miqyaslı layihələr gerçəkləşdirir, dünyanın inkişaf etmiş ölkələri Azərbaycanı tərəfdaş və müttəfiq kimi görməyə maraqlıdırlar. Azərbaycanın etibarlı tərəfdaş imici (vəchəsi) qazanması dövlətimizin yeritdiyi müstəqil xarici siyasət kursu ilə bağlıdır. Malik olduğu bütün bu üstünlüklər Azərbaycan dövlətinə dünyanın ayrı-ayrı ölkələrində yaşayan azərbaycanlılara, Azərbaycan diasporuna daha böyük qayğı göstərməsinə şərait yaradıb. Bunun nəticəsidir ki, Dünya azərbaycanlılarının II qurultayından keçən dövr ərzində qurultay zamanı qarşıya qoyulmuş vəzifələrə nail olunub. Bu gün biz artıq Azərbaycan diasporunun yaxşı təşkilatlandığını, azərbaycanlıların yaşadıqları ölkələrin ictimai-siyasi proseslərinə (sürəçlərinə) təsir göstərə bilmək imkanlarının əhəmiyyətli dərəcədə artması sayəsində onların Azərbaycanın milli maraqlarını müdafiə etmək iqtidarında olduqlarını qəti şəkildə söyləyə bilərik”.

N.İbrahimov qeyd edib ki, ötən 5 il ərzində xaricdə yaşayan azərbaycanlıların təşkilatlanmasında çox böyük işlər görülüb. Onun sözlərinə görə, KİV-lər (Kütləvi İnformasiya Vasitələri), sosial şəbəkələr vasitəsilə Azərbaycan həqiqətlərinin dünya ictimaiyyətinə çatdırılması istiqamətində əhəmiyyətli tədbirlər həyata keçirilib: “Heydər Əliyev Fondunun prezidenti Mehriban Əliyevanın Azərbaycanın maddi-mənəvi irsinin təbliğ olunmasında müstəsna rolu vardır. Heydər Əliyev Fondunun vitse-prezidenti (müavini) Leyla Əliyevanın təşəbbüsü ilə dünyanın əksər ölkələrində keçirilən “Xocalıya ədalət kampaniyası” Azərbaycan diasporunun əldə etdiyi ən böyük uğurlardandır. Bu kampaniya sayəsində dünyanın elə bir ölkəsi qalmayıb ki, orada Azərbaycan xalqına qarşı törədilmiş bu soyqırımı aktından (əməlindən) xəbərsiz olsunlar. Bu bir daha onu göstərir ki, effektiv (təsirli)  diaspor fəaliyyəti yalnız diaspor təşkilatlarının doğma Vətənlə əməkdaşlığı sayəsində mümkündür”.

DİDK sədrinin sözlərinə görə, hazırda dünyada 416 Azərbaycan diaspor təşkilatının fəaliyyət göstərin ki, onlarn da 103-ü II qurultaydan keçən dövr ərzində yaradılıb: “Azərbaycan diasporu erməni lobbisinin Azərbaycanın maraqlarına zidd fəaliyyətini zərərsizləşdirmək iqtidarındadır. Bu ona görə baş verməyib ki, erməni lobbisi zəifləyibdir. Erməni lobbisi böyük tarixə, hakimiyyət və qanunverici strukturlarla (saxtar, yapısal) sıx əlaqələrə malikdir və öz düşmənçiliyini davam etdirir. Bu ona görə baş verib ki, dünyadakı Azərbaycan diasporu artıq 20 il, 10 il və hətta 5 il bundan əvvəlki diaspor deyil. Yaxşı təşkilatlanmış, əlaqəli şəkildə fəaliyyət göstərən, mövcud olduğu ölkələrin ictimai-siyasi həyatında fəal iştirak edən, hökumətdə və seçkili orqanlarda təmsil olunmağa başlayan, rəsmi strukturlarla əlaqələr yaratmış Azərbaycan diasporu hazırda erməni lobbisinin fəaliyyətinin bütün istiqamətləri üzrə ona tutarlı cavab verməyə qadirdir. Bu gün Azərbaycan diasporunun fəaliyyəti hücum taktikası üzərində qurulub”.

Tədbirin davamında Qırğızıstan parlamentinin sədri Ahmedbek Çeldibekov çıxış edərək qurultay iştirakçılarını təbrik edib. Gürcüstanın Kvemo-Kartli bölgəsinin qubernatoru (vali) David Kirkitadze Gürcüstan prezidenti Mixail Saakaşvilinin qurultaya təbrik məktubunu oxuyub.

Daha sonra çıxış edən Milli Məclisin vitse-spiker (müavin) Ziyafət Əsgərov bildirib ki, Dünya azərbaycanlılarının III qurultayının Azərbaycanın dövlət müstəqilliyinin 20-ci ildönümünə təsadüf etməsi bu tədbiri daha da təkmilləşdirir. Onun sözlərinə görə, Dünya azərbaycanlılarının III Qurultayının keçirilməsi ümummilli lider Heydər Əliyevin azərbaycançılıq ideyalarının uğurla həyata keçirildiyinin bir daha təzahürüdür: “Azərbaycan demokratik ənənələrin təşəkkülü, insan hüquq və azadlıqlarının qorunması, əhalinin sosial rifahının təmin edilməsi, vətəndaş həmrəyliyinin yaradılması, iqtisadi azadlıqların bərqərar edilməsi və dünya birliyinə inteqrasiya (idğam) sahəsində bir çox nailiyyətlərə imza atıb. Bu uğurların qazanılmasında dünya azərbaycanlılarının birliyi və həmrəyliyi müstəsna rol oynayıb. Prezident İlham Əliyevin başçılığı ilə 2006-cı ilin mart ayında keçirilən Dünya azərbaycanlılarının II qurultayı diasporumuzun tarixində yeni bir mərhələnin başlanğıcı olub 5 il ərzində 100-dən çox təşkilat yaradılıb, bir çox ölkələrdə icma və dərnəklər yaradılıb. Xalqlar arasında əalqələrin inkişafına xidmət edən bu tədbirlər dünyada Azərbayacn dövlətinin nüfuzunu daha da artırıb”.

Z.Əsgərov vurğulayıb ki, Bakıda keçirilən Dünya azərbaycanlılarının III qurultayına 1272 nümayəndə seçilib. Qurultayda dünyanın 42 ölkəsindən 579 nümayəndə və 211 qonağın iştirak etdiyini deyən vitse-spiker qeyd edib ki, ən çox nümayəndə və qonaqla təmsil olunan ölkələr sırasında Rusiya Federasiyası 155, Türkiyə 101, Ukrayna 49, Almaniya 43, Gürcüstan 41, ABŞ (Amerika Birləşmiş Ştatları) 28, İsveç Krallığı 23, Niderland Krallığı 21, İsrail dövləti 17, Özbəkistan 13, Fransa 12, Böyük Britaniya və Şimali İrlandiya Krallığı 11, Kanada 10 nəfərlə təmsil olunublar.

“Qurultayda Azərbaycan Respublikasını (Cümhuriyyətinin) ölkənin bütün bölgələrini əhatə edən dövlət və hakimiyyət strukturları, qeyri-hökumət təşkilatları, elm, təhsil, mədəniyyət və digər yaradıcı qurumlar və siyasi partiyalardan 677 bütün bölgələrindən olan nümayəndə və 405 qonaq təmsil edib. Ümumilikdə 13 ölkənin parlamentinin 29 deputatı tədbirə qatılıb. Bütün bunlar tədbirin əhəmiyyətini göstərməklə yanaşı, ölkənin beynəlxalq aləmdə nüfuzunu sübut edir”, - deyə o əlavə edib.

Tədbirin davamında çıxış edən qonaqlar, diaspor təşkilatlaırnın nümayəndələri Dünya azərbaycanlılarının III Qurultayının keçirilməsini yüksək qiymətləndirib və bu tədbirin gələcək 5 il ərzində xaricdə yaşayan azərbaycanlılara böyük töhfələr verəcəyini qeyd ediblər. Qonaqlar çıxışları zamanı müxtəlif təkliflər də irəli sürüblər.

Qurultayın birinci iş gününün sonunda bir sıra sənədlər qəbul olunub. Yeni qərarlar və sənədləri Prezident administrasiyasının (nəhade riyasəte cümhuri) ictimai-siyasi məsələlər şöbəsinin müdiri Əli Həsənov açıqlayıb. “Dünya azərbaycanlılarının III qurultayının qətnaməsi”, “Dünya azərbaycanlılarının III qurultayı nümayəndələrinin Azərbaycan Prezidenti İlham Əliyevə müraciəti”, “Dünya azərbaycanlılarına müraciət” və “Ermənistan-Azərbaycan, Dağlıq Qarabağ münaqişəsi ilə əlaqədar dünya ictimaiyyətinə, beynəlxalq təşkilatlara, xarici ölkələrin dövlət və hökumət başçılarına, parlamentlərinə müraciət” adlı sənədlərin hər biri qurultay nümayəndələrinin səsverməsi ilə qəbul edilib. O bildirib ki, “Dünya azərbaycanlılarının III qurultayı nümayəndələrinin Azərbaycan Prezidenti İlham Əliyevə müraciəti” tədbirdə təklif olunan fikirlər də daxil olmaqla bir gün sonra tamamlanmalı və sonradan mətbuatda səslənərək prezidentə ünvanlanmalıdır.

Sonra isə Dünya Azərbaycanlılarının əlaqələndirmə Şurasının yenidən təşkil olunması məsələsi səsverməyə çıxarılaraq qəbul edilib. Digər qərarla Əlaqələndirmə Şurasının rəyasət heyəti ləğv edilərək onun əvəzində icra katibliyi yaradılıb. Dünya Azərbaycanlıların Əlaqələndirmə Şurasının sədri prezident İlham Əliyev, icra katibi isə Diasporla İş üzrə Dövlət Komitəsinin səri Nazim İbrahimov seçilib. Bundan əlavə, Şura üzlərinin sayı 5 nəfər də əlavə edilməklə 117–dən 125-dək artırılıb.