Xalq şairi Balaş Azəroğlu ikinci Fəxri Xiyabanda dəfn olunub

SON XƏBƏRLƏR

Xalq şairi Balaş Azəroğlu ikinci Fəxri Xiyabanda dəfn olunub

2021.10.20, 07:36

Gunaz.tv

GünAz TV: Azərbaycanın xalq şairi Balaş Azəroğlu dünən ikinci Fəxri Xiyabanda dəfn olunub. Qeyd edək ki, şair iki gün öncə günorta saatlarında 90 yaşında vəfat edib.

Xalq şairi Zöhrab Tahirin sözlərinə görə, Balaş Azəroğlu hər zaman çalışırdı ki, gözdən yayınsın: “Elə şairlər, yazıçılar var ki, çalışır özünü gözə soxsun. Çalışırlar ki, özlərinə yubiley (ildönümü), yaradıcılıq gecələri keçirsinlər. Yaxud da ki, hər hansısa uca, yüksək tribunalardan çıxış etmək istəyirlər. Amma Balaş Azəroğlu belə deyildi”. Xalq şairi deyir ki, onun belə olmasının isə bir çox səbəbləri var idi: “Bir səbəbi isə odur ki, Balaş Azəroğlunun ürəyi sınıq idi. Onda Təbriz əhval-ruhiyyəsində müəyyən qədər sınıqlıq var idi”.

Xatırladaq ki, Şair, ədəbiyyatşünas, filologiya elmləri namizədi Balaş Azəroğlu 1921-ci il noyabrın 11-də Bakı şəhərində anadan olub. İlk mətbu şeri “Dnepr” 1937-ci ildə Bakıda çapdan çıxıb.1938-ci ildə ailəliklə Cənubi Azərbaycanın Ərdəbil şəhərinə köçdüklərindən burada fars ibtidai məktəbində təhsil alır. Milli azadlıq hərəkatına qoşulur (1941). İran Xalq Partiyasına daxil olur (1942). “Azərbaycan zidd faşist cəmiyyəti”nin Ərdəbil vilayəti şöbəsinə sədr seçilir (1943). Bu cəmiyyətin orqanı “Yumruq” qəzetinin redaktoru olur. “Vətən yolunda” qəzeti redaksiyasının müsabiqəsində “Səttarxan” şerinə görə mükafata layiq görülür. Azərbaycan Demokratik firqəsi Ərdəbil vilayət komitəsinin şöbə müdiri, “Cövdət” qəzetinin redaktoru, “Şairlər məclisi”nin Ərdəbil şöbəsinin rəhbəri olub (1943-1945). Təbrizdə Milli hökumət tərəfindən Azərbaycan Dövlət Radio Verilişləri Komitəsinin sədr müavini təyin olunub. 1981-1991-ci illərdə Azərbaycan Yazıçılar İttifaqının katibi vəzifəsində çalışıb. İttifaqın İdarə Heyətinin Cənubi Azərbaycan ədəbiyyatı üzrə baş müşaviri olub.

GUNAZ.TV

SON XƏBƏRLƏR