Sərdar Cəlaloğlu inqilabi dəyişikliklər gözləyir, Araz Əlizadə «köhnə hamam, köhnə tas» deyir

Artıq 2010-cu ilin astanasındayıq. İlayrıcında şəxsi həyatımızla bərabər ölkənin ictimai-siyasi həyatında nələr baş verəcək deyə sualları ətrafındla düşünürük. Görəsən, üzümüzə gələn ildə Azərbaycanın siyasi həyatında hansı yeniliklər ola bilər, hansı hadisələr cərəyan edə bilər? Həmişəki kimi politoloqlar və siyasətçilər bu sualları cavablandırmaqda bizə kömək edəcəklər.

Politoloq Razi Nurullayev «2010-cu ildə Azərbaycanda elə bir ciddi dəyişiklik görə bilmirəm» deyir. «Ola bilsin ki, siyasi gərginlik daha da artsın. Bu da əsasən parlament seçkilərində özünü göstərəcək. Ola bilsin ki, Avropa Birliyi və ABŞ-ın mövqeyi daha da sərtləşsin. Və bu da həmin dövlətlərlə Azərbaycan arasında münasibətlərin kəskinləşməsinə gətirib çıxarsın. Müəyyən mənada müxalifətin bir az aktivləşməsini gözləyirəm. Eyni zamanda onu gözləyirəm ki, həm xarici təşkilatlar, həm də daxildə olan müəyyən insanlar müxalifətlə iqtidar arasında müəyyən dialoqun qurulması üçün təşəbbüsdə bulunacaqlar. İqtisadi sahədə isə geriləmə ola bilər. Çünki dünya böhranının Azərbaycana gəlməsinin qarşısı adminstrativ yollarla alındı. Ancaq bu qarşısının alınması yox, ertələnməsi oldu. Ona görə bu təsir Azərbaycana 2010-cu ildə gəlib çıxacaq». R.Nurullayev Dağlıq Qarabağ münaqişəsinin həlliylə bağlı 2010-cu ildə hər hansı irəliləyişin olacağını az ehtimsalla yanaşır: «Yüksək ehtimalla olmasa da gözləyirəm ki, çərçivə konvensiyası imzalansın. Müəyyən yumşalmalar və bir neçə rayonun azad olunması baş verə bilər. Amma münaqişənin tam həllini gözləmirəm. Başqa bir versiya isə ondan ibarətdir ki, ola bilər ki, Azərbaycanla Ermənistan arasında birbaşa danışıqlar dayandırılsın. Çünki Ermənistan Dağlıq Qarabağı müstəqil dövlət olması ideyasından əl çəkmək niyyətində olmadığını bu yaxınlarda bir daha sübut etdi. Ona görə də bu yöndə müəyyən gərginləşmələr ola bilər. Düzü, mən bu varianta daha çox inanıram».

ASDP həmsədri Araz Əlizadə isə əvvəlcə 2010-cu illə bağlı arzusunu bildirdi: «Onun arzusundayam ki, nəhayət, Qarabağı azad edə bilək və bunu elliklə toy-bayram edək». Arzusuna uyğun proqnoz verməkdə isə tanınmış siyasətçi çətinlik çəkdi: «Çünki mən eşitdiyim və bildiyim qədər iqtidar hələki Qarabağı sülh yoluyla qaytarmaqdan danışır, dünya da bizə bunu diqtə edir. Mən isə bu fikirdəyəm ki, Qarabağı ancaq müharibə yoluyla qaytarmaq mümkündür. Ona görə də heç bir yenilik gözləmirəm». Parlament seçkilərindən də A.Əlizadə heç bir yenilik gözləmir: «Köhnə hamam, köhnə tas».

ADP-nin baş katibi Sərdar Cəlaloğlu 2010-cu ildən inqilabi dəyişikliklər gözləyir. «Bilirsiniz ki, üzümüzə gələn il parlament seçkiləri olacaq. Və parlament seçkisi cəmiyyətin yenidən ayağa qalxıb öz taleyini yenidən həll etməsi istiqamətində çox mühüm bir mərhələdir. Ona görə hesab edirəm ki, Azərbaycanda bu seçkilərlə bağlı inqilabi dəyişiklər ola bilər. Əlbəttə, əgər xalqımız öz taleyinə biganə qalmasa». Dağlıq Qarabağ münaqişəsinin həlliylə bağlı isə S.Cəlaloğlu ciddi yenilik gözləmir. «Dağlıq Qarabağ münaqişəsinin həlli istiqamətində isə elə bir ciddi hadisə gözləmirəm. Neçə ki, Azərbaycanda və Ermənistanda demokratiya bərqərar olmayıb, bu problemin həlli mümkünsüz olaraq qalacaq. İkinci tərəfdən isə nə qədər ki, problem danışıqlar yolu ilə, hüquqi müstəvidə həll olunur, həll olunmaq imkanı yoxdur».

«Atlas» Araşdırmalar Mərkəzinin direktoru Elxan Şahinoğlu da Dağlıq Qarabağ məsələsində pessimistdir. «Mən 2010-cu ildən Dağlıq Qarabağla bağlı iləliləyiş gözləmək istəyərdim. Amma pessimistəm. Çünki 2009-cu ildən də böyük nəticələr gözləyirdik. Amma gördüyünüz kimi elə bir irəliləyiş olmadı. Əksinə bəlkə də geriləmə müşahidə olundu. Bununla bağlı mən düşünmürəm ki, baza prinsipləri imzalansın. Bu il Türkiyə ilə Ermənistan arasında protokollar məsələsi aktuallığını qoruyacaq. Və ola bilsin ki, bu protokollar ratifikasiya olunacaq. Amma yenə də deyirəm ki, Dağlıq Qarabağ münaqişəsinin həllində ciddi bir irəliləyiş olacağını hələ ki gözləmirəm. Əksinə ola bilər ki, danışıqlar dalana dirənsə biz lokal toqquşmaların da şahidi ola bilərik».//Üç Nöqtə qəzeti