Tehranda tələbələr yenidən ayağa qalxdı

Öldürülən nümayişçilərin dəfni növbəti etiraz aksiyalarına çevrilə bilər

ABŞ və Avropa Tehranı ittiham edir; Tehran qəzəb püskürür

İranda 27-28 dekabrda baş verən qanlı toqquşmalardan sonra nisbi sakitlik yaranıb. Lakin sakitliyin qısa çəkəcəyi, yeni toqquşmaların baş qaldıracağı ehtimalı böyükdür.BBC xəbər verir ki, şahidlər paytaxt Tehranda hələlik sakitlik olduğunu, amma növbəti zorakılıq qorxusuyla gərginliyin yaşandığını deyirlər. Növbəti toqquşmanın son nümayişlərdə öldürülənlərin dəfni zamanı baş verə biləcəyi də istisna edilmir.Elə bu arada Tehranın Elm və Sənaye Universiteti tələbələrinin kütləvi aksiyaya cəhd etdiyi haqda xəbərlər yayılıb. Bildirildiyinə görə, Universitetin 2 minə yaxın tələbəsi dekabrın 29-da universitetin həyətində aksiya keçirərək hakimiyyətə qarşı şüarlar səsləndiriblər (medaforum). “Bu ay qan ayıdır, Yezid devrilməlidir” və “Diktatora ölüm” şüarları səsləndirən və universitet həyətindən çıxıb küçədə yürüş keçirmək istəyən aksiyaçılar “Bəsic” (hökumət tərəfdarı olan könüllülər dəstəsi) təşkilatının dəyənəkli üzvlərinin və digər hökumət qüvvələrinin hücumuna məruz qalıb. Onlarla tələbə yaralanıb. Kimlərinsə tutulub-tutulmadığı barədə məlumat yoxdur.

“İranda geriyədönməz vəziyyət yaranıb”

Londondakı Şərqi və Afrika elmləri institutunun İran üzrə mütəxəssisi doktor Məsumeh Torfi BBC-yə deyib ki, son nümayişlər bu vaxta qədər baş verənlərdən fərqlidir və daha uzağa gedir: “Biz indi İrandakı siyasi vəziyyətlə bağlı geriyədönməz bir məqama gəlib çatmışıq. Son bir neçə həftədə müxalifət ali dini liderin və eləcə də İslam respublikasının devrilməsinə çağırıb. Bundan uzağa isə gedə bilmirlər. Digər tərəfdə isə ayətullah Xamneyinin və rejimin tərəfdarları var və onlar ən ağır cəza tədbirlərinin tətbiq olunmasına çağırırlar. Şəkillərdən də göründüyü kimi qarşıdurmada çox qəddarlıqlar baş verir və növbəti bir neçə həftə ərzində vəziyyətin daha da gərginləşəcəyi görünür”.

Avropada İran müxalifətinə dəstək yürüşləri

İran müxalifətinə Qərbdən verilən dəstək də getdikcə güclənir və bu, rəsmi Tehranda aşkar qıcıq yaradır.İran müxalifətinə dəstək məqsədilə Avropanın bir sıra şəhərlərində yürüşlər keçirilib. Aksiyaları əsasən Avropada yaşayan iranlılar təşkil ediblər.Parisdə nümayişçilər üzərində “Onlar hansı cinayəti etmişdilər ki, öldürüldülər?” şüarı yazılmış plakatlar qaldırıblar. Nümayişçilərdən biri Həmid Əsədullahi deyib: “İranda xalqının barbar rejimə qarşı müqaviməti güclənməkdədir”.Berlində də nümayişlər keçirilib və nümayişçilərdən biri son günlər İranda baş verən etirazların hətta əvvəllər hökuməti müdafiə edənlərin də fikrini dəyişdiyini deyib.Londondakı yürüşdə isə iştirakçılar İranda demokratiya və azadlığa çağıran şüarlar səsləndiriblər.

Tehran Qərbə qəzəb püskürür

Yeri gəlmişkən, İranın xarici işlər naziri Mənuçöhr Mötakki son nümayişlərlə bağlı xaricdən verilən bəyanatlara sərt münasibət göstərib. O, nədənsə, Böyük Britaniyanı xüsusi hədəf alaraq “Britaniya çərənləməyinə son qoymasa ağzının üstündən yumruq zərbəsi alacaq” deyə bildirb.Qeyd edək ki, Britaniyanın xarici işlər naziri Devid Milbənd İrandakı son olaylara toxunaraq etirazçıların mərd davrandıqlarını və Tehranın bu insanların hüquqlarına hörmət etməli olduğunu demişdi.ABŞ-ın İrandakı etirazçılarla həmrəy olduğunu deyib, yol verdiyi zorakılıqlara görə Tehranı tənqid eən Barak Obamaya isə İran parlamentini sədri Əli Laricani cavab verib. Laricani parlamentədki çıxışında deyib: “Cənab Obama öz qoşunlarının Quantanamo, Əbu-Qreyb, Əfqanıstan və İraqda törətdiyi anti-humanist hərəkətlərə görə utanmalıdır. Sizin müxalifətçi dəstəyə heyranlığınız elə özününzün reputasiyanızı məhv edəcək və bu dinsizlərin kimə bağlı olduqlarını nümayiş etdirəcək. Onları dayandırmağın məsuliyyəti İran hökumətinin çiyinlərinə düşəcək”.

azadlıq.az