Yisrael Katz: “İranın nüvə proqramının genişləndirilməsi Amerika və müttəfiqlərinin kəskin cavabı ilə nəticələnəcək”

SON XƏBƏRLƏR

Yisrael Katz: “İranın nüvə proqramının genişləndirilməsi Amerika və müttəfiqlərinin kəskin cavabı ilə nəticələnəcək”

2021.10.20, 07:36

Gunaz.tv

GünAzTV: İsrailin kəşfiyyat naziri Yisrael Katz sentyabrın 12-də jurnalistlərə açıqlamasında İranın nüvə fəaliyyətinin genişləndirilməsindən və Qərbin buna mümkün reaksiyasından danışıb.

İsrailli nazirin açıqlaması, İran Atom Enerjisi Təşkilatının rəisi Əli Əkbər Salehinin ölkənin sentrifuqların istehsalına və uranı yüksək səviyyədə zənginləşdiriləməyə hazır olmasını elan etməsindən bir gün sonraya təsadüf edib.

Sentyabrın 11-də jurnalistlərə açıqlama verən Salehi deyib ki, İran nüvə fəaliyyətini yenidən bərpa etməyə tam hazırdır: “İran inkişaf etdirilmiş sentrifuqaların istehsalına, uranı yüksək səviyyədə zənginləşdirməyə hazırdır. Əlbəttə, bu bizim hazırda sentrifuqaların istehsalına başladığımız demək deyil. Sadəcə olaraq bildiririk ki, bu işə başlamağa, çoxlu sayda sentrifuqa istehsal etməyə hazır vəziyyətdəyik”.

İsrailin kəşfiyyat naziri Yisrael Katz bildirib ki, İranın nüvə fəaliyyətini davam etdirməsi ona çox baha başa gələcək: “Əgər İran nüvə fəaliyyətini genişləndirməyə qərar versə, birbaşa Amerika və onun müttfiqlərinin kəskin cavabı ilə qarşılaşacaq, təhdid ediləcək. İran bilməlidir ki, onun başqa çıxış yolu yoxdur. O, ya ABŞ prezidenti Donald Trampın şərtlərini qəbul etməli, ya da öz iqtisadiyyatının çökməsinin şahidi olmalıdır”.

Xatırladaq ki, Amerika prezidenti Donald Tramp mayın 8-də Ağ Evdə çıxış edərək Vaşinqtonun İranla imzalanmış nüvə sazişindən çıxdığını rəsmən elan edib: “İran rejimi terrorizmin əsas himayədarı olaraq qalır. Bu rejim, bölgənin müxtəlif ölkələrinə və terrorçu qruplara raket göndərir, bütün Orta Şərqdə yaşanan çaxnaşma və qarşıdurmaları qızışdırır, od-alov üstünə benzin səpir, “Hizbullah”, “Həmas”, “Taliban” və “Əl-Qaidə” kimi terrorçu qruplaşmalara dəstək verir”.

A.M

GUNAZ.TV

SON XƏBƏRLƏR