Tural Əliyev: “Güney Azərbaycan məsələsini hər zaman diqqətdə saxlayırıq”- Müsahibə

SON XƏBƏRLƏR

Tural Əliyev: “Güney Azərbaycan məsələsini hər zaman diqqətdə saxlayırıq”- Müsahibə

2021.10.20, 07:36

Gunaz.tv

GünAz TV mətbuat mərkəzinin növbəti müsahibi, ölkədə ən çox tirajla çıxan “New Baku Post” qəzetinin təsisçisi, tanınmış jurnalist Tural Əliyevdir.

- Tural bəy, bu gün insanlarda belə fikir formalaşıb ki, 15 min tirajla çıxan “New Baku Post” qəzeti nə üçün pulsuz paylanılır? Xüsusilə, əsas maraq nədən ibarətdir?

- Pulsuz qəzet buraxmaq yeni bir kəşf deyil, dünyada bu özünə çoxdan yer tapıb və belə qəzetlərə həm oxucuların, həm də reklam şirkətlərinin böyük marağı var. Tam məsuliyyətlə söyləyə bilərəm ki, “New Baku Post” bu gün Azərbaycanda ən sürətlə yayılan qəzetdir, geriyə qayıdan 1 ədəd belə qəzetimiz yoxdur. Yayım çərşənbə və şənbə günləri paytaxtın 40-dan çox məntəqəsində səyyar qaydada təşkil olunur. Qəzeti, üzərində “New Baku Post” yazısı olan xüsusi geyimlərdə olan xanımlar pulsuz paylayır. 050 2978822 saylı “Qaynar xətti”miz mövcuddur. Qəzetin satışı halı ilə rastlaşan olarsa, bu telefonla xəbər verməyi rica etmişik. Hələlik belə bir müraciət bizə daxil olmayıb. “New Baku Post” indi Cənubi Qafqazda yeganə pulsuz ictimai-siyasi qəzetdir. Biz satılmırıq.

- Ümumiyyətlə, bu gün cəmiyyətin qəzet oxumasını necə dəyərləndirirsiniz? Məsələn, 10 il bundan öncə tamam fərqli vəziyyət var idi və insanlar daha çox qəzet oxuyurdular...

- Açığını desəm, qəzetin ilk sayını 10 min tirajla buraxmaq qərarı verəndə əvvəlcə xeyli tərəddüd etdik. Amma qəzet yayıma çıxandan cəmi 3 saat sonra, yəni günorta kimi tamamilə bitdi və eşidib-bilənlərin hamısı bizdən qəzet istəməyə başladılar. Biz növbəti nömrədən tirajı 50 faiz artırdıq. Buna bizi oxucular məcbur etdi. Aprel ayı həftədə 1 dəfə çıxırdıq, maydan etibarən həftədə 2 dəfə çıxırıq. Amma yenə də çatmır... Odur ki, tirajı yenə də artırmağı və payızdan gündəlik rejimə keçməyi planlaşdırırıq. İndi məni heç kim inandıra bilməz ki, Azərbaycanda qəzet oxumaq istəmirlər. “New Baku Post”un fəaliyyəti buna əyani sübutdur. Əsas odur ki, oxucuya peşəkar, qərəzsiz məhsul verəsən, bizdə qeyri-peşəkar əməkdaş yoxdur. Bu, Tofiq Abbasov, Kənan Quluzadə kimi yüksək peşəkarlarların rəhbərliyi ilə hazırlanan qəzetdir. Orxan Fikrətoğlu, Hamlet İsaxanlı, Musa Qasımlı, Çingiz İsmayılov kimi şəxslər bu qəzetin köşə yazarları sırasında yer alır.

- Bəs, qəzetdə Güney Azərbaycan məsələsinə önəm verilirmi? Əgər verilirsə, hansı məsələlər qabardılır?

- Bizim üçün əsas olan Azərbaycanın dövlətçilik maraqlarıdır. Milli maraqlara istər daxildən, istərsə də xaricdən təhdid olarsa, buna səssiz qalmağı heç kim bizdən gözləməsin. Güney Azərbaycan məsələsini hər zaman diqqətdə saxlayırıq, bu, 30 milyondan artıq soydaşımız qarşısında bizim borcumuzdur. Yeri gəlmişkən deyə bilərəm ki, yaxın günlərdə www.bakupost.az adlı internet səhifəmiz də açılacaq və güneyli soydaşlarımız qəzetimizi elektron(ünvan) formada rahatlıqla əldə edə biləcəklər.

Söhbətləşdi: Elnur Eltürk

N.S

GUNAZ.TV

SON XƏBƏRLƏR