GünAz TV mətbuat mərkəzinin növbəti müsahibi, Azadlıq Partiyasının sədri tanınmış siyasətçi Əhməd Orucdur.

-Əhməd bəy, Güney Azərbaycan Televiziyasının Güney məsələsində rolunu necə dəyərləndirirsiniz?- GünAz TV faktiki (əməli, vaqei) olaraq Güney Azərbaycan məsələsi ilə bağlı birbaşa efirdə müzakirələrin aparıldığı yeganə televiziyadır. Bu televiziya vasitəsilə Güney Azərbaycanda baş verən proseslər təhlil olunur. Cənub probleminin mahiyyəti, indiki vəziyyəti, inkişaf dinamikası ilə bağlı siyasilərin, ideoloqların, konfiliktoloqların fikirləri, dialoqları bu efir vasitəsilə dünyaya yayılır. Bu gün Vahid Azərbaycan məsələsində GünAz TV ən ağır işi, ideoloji və əlaqələndirmə işini təkbaşına həyata keçirir. Bunlara görə mən bu televiziyanın fəaliyyətini yüksək qiymətləndirirəm və gələcəkdə işini daha peşəkar səviyyədə həyata keçirə biləcəyinə inanıram. GünAz TV-yə uğurlar arzulayıram. 

- Bu günlərdə millət vəkili Sabir Rüstəmxanlı açıqlamasında GünAz TV-ni İranın Səhər kanalı ilə eyniləşdirib və əməkdaşlarını isə İrana işləməkdə ittiham edib. Belə fikiri bildirmək nə qədər doğrudur?

- İranın Səhər telekanalının açıq antiazərbaycan mövqe tutduğunu Sabir bəy hamıdan yaxşı bilir. Bu televiziyalar tamamailə əks düşərgələrdə dayanır. Sabir bəy bu fikri yəqin ki, DAK məsələsindəki mübahisələrin təsiri altında söyləyib. 25 ildir milli birlikdən danışsaq da, təəssüfki, çox böyük əksəriyyətimiz hələ də birləşməyi öyrənə bilmədik! Təsssüf ki, Dünya azərbaycanlılarının Konqresini yaratmaq istəyənlər heç özlərinin illərlə bir yerdə olan, çiyin-çiyinə işləyən adamların konqresini qoruyub saxlaya bilmirlər. Bir ada bu qədər iddia, enerji, hirs nəyə gərək!  Zənnimcə daha üstün, daha güclü tərəf adını dəyişməli, bu utanc gətirən məsələni qurtarmalıdır.Azərbaycan türklüyünə qarşı dayanan tərəflərin nə cür təşkilatlandığını, necə fəaliyyət göstərdiyini nəzərə alsaq bizə didişmək yox, daha böyük əzmlə, bir yerdə, əlaqəli çalışmaq lazım daha aydın dərk olunar. GünAz TV-nin böyük basqılar və çətinliklər içində fəaliyyət göstərdiyi mənə yaxşı məlumdur. İmkan daxilində hər birimiz bu televiziyaya kömək göstərməliyik. 

- Ümumiyyətlə, ziyalılarımızın, siyasətçilərimizin güney məsələsində mövqeyi Sizi qane edirmi?

- Bu gün Azərbaycan ictimai fikri üzərində çox böyük bir basqı var. Həm ərazi bütövlüyü, həm demokratik cəmiyyət quruculuğu problemi, eləcə də bölgədə baş verən proseslər, böyük dövlətlərin Azərbaycanla bağlı projeləri qarışıq bir vəziyyət yaradıb. Bu vəziyyətdə məncə proseslərlə bağlı mövqe bildirmək, ideya vermək çox çətindir. Çoxları nə baş verdiyini heç axıra qədər də dərk eləmirlər. Mənim fikrimcə bu gün ən əsas məsələ Vahid Azərbaycan mövqeyində dayanan siyasi, ictimai təşkilatların fəaliyyətlərinin əlaqələndirilməsidir. Bu gün Vahid Azərbaycan Cəbhəsi hər gün genişlənməli və bütün imkanlardan istifadə edərək haqlarımızı, istəklərimizi daha gur səslə söyləməli, haqqımıza sahib durmalıyıq. İndiki həssas dönəmdə daxildəki xırda ambisiyaları (maraqları), ziddiyyətləri, münaqişələri diqqət mərkəzinə çəkmək qətiyyən doğru olmazdı. Vahid Azərbaycan uğrunda mübarizə aparanlar Vahid Cəbhədə fəaliyyətlərini mütləq əlaqələndirməlidirlər.

Söhbətləşdi: Elnur Eltürk

N.S