GünAz TV: Azərbaycanlı millət vəkilləri gürcü soyadı altında maskalanmış erməninin dərsini verdi.

Gürcüstan parlamentində dava düşüb. Bu dəfə davanın başlıca səbəbi qondarma erməni soyqırımı məsələsi olub. Müxalifətçi deputat (millət vəkili) Condi Baqaturiya Gürcüstanda yaşayan ermənilərin qondarma soyqırımın tanınması üçün parlamentə müraciət etməsini istəyib. Gürcü mətbuatı xəbər verir ki, bu zaman zalda (salon) olan azərbaycanlı deputat Azər Süleymanov tribunaya yaxınlaşaraq orada içində su olan stəkanı götüb Baqaturiyaya atmaq istəyib. Lakin bunu etməyə imkan tapmayıb. Baqaturiya isə ona əlindəki qələmi atıb. Bundan sonra deputatlar münaqişənin böyüməsinə imkan verməyiblər. Digər bir məlumatda isə vurğulanır ki, Baqaturiyanın çıxışına etiraz edən Azər Süleymanov cavab kimi əlində tutduğu "Vazelin" qabını ona tullayıb. Bundan sonra deputatlar əlbəyaxa olublar. Hadisəyə müdaxilə edən gürcü deputat Kako Boqoxidze Condo Boqaturiyaya əl qaldırıb və onun bu hərəkətini "klassik təxribat" adlandırıb. Azər Süleymanov da Boqaturiyaya "əsil soyqırımı ermənilər Azərbaycanda törədiblər, sənin kimi ermənilərin dəstəyi ilə" deyib. Başqa bir azərbaycanlı deputat Ramin Bayramov isə Xocalı soyqırımı barədə sənədləri deputata təqdim edərək, onları oxumasını təklif edib. Parlamentin sədri David Bakradze deputatları sakitləşdirib. A. Süleymanov məsələyə münasibət bildirərək Baqaturiyanın familiyasını ermənicə səsləndirib:

  "Bizim erməni həmkarımız Baqaturyan özünün qatı ermənipərəst mövqeyindən çıxış edir. Hansı soyqırımdan söhbət gedir. 1918-ci ildə ermənilər Azərbaycanın müxtəlif bölgələrində 60 mindən çox sakini qətlə yetiriblər. Bu gün parlamentdə deputat Condi Baqaturiya bu məsələni qaldırdı. Erməni diasporası bu məsələ ilə bağlı ona böyük miqdarda pul təklif edib. Bu gün biz də ona "payını" verdik. Azərbaycanlı deputat Ramin Bayramov Xocalı hadisəsi ilə bağlı tarixi faktlarla (sənəd, gərçək) dolu sənədləri şəxsən Baqaturiyanın sifətinə çırpdı. Əsl soyqırımı görmək üçün yüz il əvvələ getməyə ehtiyac yoxdur. 20 il əvvəl bir gecədə baş verən Xocalı faciəsi zamanı 600-dən çox insanımız öldürüldü, minlərlə azərbaycanlı yaralandı və itkin düşdü, bir şəhər yerlə-yeksan oldu. Bunlar dünənki faktdır. Belə təxribat xarakterli (mahiyyətli) çıxışlara yol vermək olmaz. Gürcüstan bizim vətənimizdir".

   Gürcüstanda 500 mindən çox azərbaycanlı və 350 minə qədər erməni var. Bütün vətəndaşlarımız Gürcüstanda sülh və sabitlik şəraitində yaşayır. Bu gün kimlərsə Gürcüstanda sabitliyi pozmağa çalışır. Bu, təxribatdır". Bu sözləri Gürcüstan parlamentinin sədr müavini Levan Vepxvadze jurnalistlərə açıqlamasında deyib. O bildirib ki, ölkədə fəaliyyət göstərən partiyaların məqsədi xalqlar arasında mehriban ünsiyyət yaratmaq olmalıdır: "Bu gün Gürcüstan parlamentində baş verən hadisə təxribatdır. Bizim keçmişlə bağlı bir çox problemlərimiz var, amma indi bunlardan danışmaq Gürcüstanın suverenliyinə və ərazi bütövlüyünə, dövlətçiliyinə xələl gətirə bilər. Hesab edirəm ki, bu "soyqırım" məsələsini qaldıranların kiçik məqsədləri var". L. Vepxvadze "Gürcüstan Qrupu" Partiyasının lideri, parlamentin deputatı Condi Baqaturiyanın hərəkətinin cəzasız qalmayacağını söyləyib: "Belə deputatların cəzası seçkilərdə veriləcək. Sadəcə olaraq xalq öz səsini belə deputatlara verməyəcək və onlar parlamentdə olmayacaqlar. Bizim sanksiyamız (təhrim) yoxdur, buna xalq öz etiraz səsini ucaltmalıdır".

   Gürcüstan parlamentinin sədr müavini Azərbaycanın Gürcüstanı hər zaman dəstəklədiyini vurğulayıb: "Bizim Azərbaycanla ümumi çox şeyimiz var. Gürcüstan həmişə Azərbaycanın ərazi bütövlüyünü dəstəkləyib və buna cavab olaraq Azərbaycanın dəstəyini də həmişə hiss edir. Biz beynəlxalq təşkilatlarda da Azərbaycanla əməkdaşlıq edirik. Azərbaycana minnətdarıq ki, bu yaxınlarda BMT-də (Birləşmiş Millətlər Təşkilatı) etnik təmizləmə haqqında deklarasiya (declaration) qəbul olunarkən də bizi dəstəklədi".

   Gürcüstan Azərbaycanlıları Tələbələr Assosiasiyasının (GATA) üzvləri bu gün Gürcüstan parlamentinin iclası zamanı baş vermiş olayla əlaqədar parlament binası qarşısında etiraz aksiyası keçiriblər.Tələbələr "Baqaturiya - xain!", "Xocalıya ədalət!" sözləri yazılmış şüarlar qaldırıblar. Assosiasiyanın sədri Samirə İsmayılova hadisəni canlı yayında izləyərkən dözə bilmədiklərini və qısa vaxt ərzində toplanıb azərbaycanlı millət vəkilləri ilə həmrəyliklərini bildirmək üçün parlamentin qarşısına gəldiklərini deyib. O, deputat Condi Baqaturiyanın hərəkətini çoxmillətli Gürcüstanda təxribat törətmək cəhdi kimi qiymətləndirib. Həftə içi

N.S