Dünya şöhrətli azərbaycanlı yazıçı İranda həbsdə olan şairlərlə bağlı dünyaya müraciət etdi

SON XƏBƏRLƏR

Dünya şöhrətli azərbaycanlı yazıçı İranda həbsdə olan şairlərlə bağlı dünyaya müraciət etdi

2021.10.20, 07:36

Gunaz.tv

GünAz TV: Azərbaycan Yazıçılar Birliyinin katibi Çingiz Abdullayev İranda həbsdə olan azərbaycanlı şairlər Fərid Hüseyn və Şəhriyar Hacızadə ilə bağlı dünya ictimaiyyətinə müraciət edib.

Aşağıda müraciətin tam mətni dərc edilir:

“Məlumat üçün yüksək diqqətinizə çatdırırıq ki, Azərbaycan Respublikasının (Cümhuriyyət) vətəndaşları, gənc şairlər Fərid Hüseyn və Şəhriyar Del Gerani (Hacızadə) cari ilin 29 aprel tarixində poeziya (şeir) festivalında iştirak etmək üçün İran İslam Respublikasına səfər ediblər.

Adıçəkilən şəxslər festivalda iştirak etdikdən sonra may ayının 2-də naməlum şəraitdə Təbriz şəhərində yoxa çıxıblar.

İranın bəzi kütləvi informasiya vasitələri Təbrizdə yoxa çıxan azərbaycanlı şairlərin narkotik (müxəddir) qaçaqmalçılığı və İsrail lehinə casusluq etməkdə təqsirləndirildiyini iddia etsə də, bu ölkənin rəsmi orqanları Azərbaycan Respublikasının Xarici İşlər Nazirliyinin beş Notasına, eləcə də Azərbaycan tərəfinin çoxsaylı müraciətlərinə bu günə kimi münasibət bildirməmişdir.

İki gənc insanın yoxa çıxdıqdan sonra vəkil ilə təmin edilməməsi, saxlanma şəraitinə, sağlıq durumuna aydınlıq gətirilməməsi, saxlanılmalarına dair Səfirliyə və ailələrinə məlumat verilməməsi və hüquqlarının pozulması, həmçinin onlarla görüşə şərait yaradılmaması haqlı olaraq Azərbaycan xalqında, eləcə də onların valideynlərində və qohumlarında böyük narahatlıq yaratmışdır.

İnsan hüquq və azadlıqlarına hörmət, demokratiya, sülh, tolerantlıq (xoşgörü), bərabərlik, ədalət və insan ləyaqəti kimi yüksək dəyərlərinin qorunmasına və təşviq edilməsinə yüksək ehtiyac duyulduğu bir dövrdə iki azərbaycanlı gəncə qarşı İranda edilən bu ədalətsizliklər və onların hüquqlarının təmin edilməməsi beynəlxalq hüquq və normalara da zidd olmaqla yanaşı, insan hüquqlarının təməl prinsiplərinin (ilkə, əsl) kobud pozulması faktıdır.

Azərbaycanda vicdan azadlığı, insan hüquq və azadlıqlarına hörmət, eləcə də ümumbəşəri dəyərlərə sadiq olaraq bütün dünya xalqları ilə dostluq, sülh və əmin-amanlıq şəraitində yaşamaq və bu məqsədlə qarşılıqlı fəaliyyət göstərmək hörmət olunan prinsiplərdir.

Sizi iki istedadlı gənc şairin azad edilməsi, o cümlədən onların hüquqlarının bərpa edilməsi və Vətənə geri dönməsi üçün səylərin birləşdirilməsinə çağırıram. Çünki, insan hüquq və azadlıqları kimi ümumbəşəri prinsipləri qorumaq və müdafiə etmək hər bir beynəlxalq və qeyri-hökumət təşkilatlarının, o cümlədən dövlətlərin əsas prioriteti (öncəlik) olmaqla yanaşı hər bir insanın mənəvi borcudur”.

N.S

GUNAZ.TV

SON XƏBƏRLƏR